નવી દિલ્હી:નવા ઓર્ડરમાં ધીમી વૃદ્ધિને કારણે એપ્રિલમાં મેન્યુફેક્ચરિંગ સેક્ટરની પ્રવૃત્તિ ધીમી પડી છે. ચૂંટણીની અનિશ્ચિતતા અને અર્થતંત્રના પડકારોને લીધે નવા નાણાકીય વર્ષના પ્રારંભે નવા બિઝનેસની વૃદ્ધિ ઘટી છે. નિકાઇ ઇન્ડિયા મેન્યુફેક્ચરિંગ PMI એપ્રિલમાં ઘટીને 51.8 થયો છે, જે માર્ચમાં 52.6ના સ્તરે હતો. જોકે, 50ની ઉપરનો PMI વૃદ્ધિનો ટ્રેન્ડ અકબંધ હોવાનું દર્શાવે છે.
IHS માર્કિટના પ્રિન્સિપાલ ઇકોનોમિસ્ટ પોલિઆના દિ લિમાએ જણાવ્યું હતું કે, “વૃદ્ધિમાં ઘટાડો ચાલુ રહ્યો છે. છેલ્લા એક વર્ષમાં રોજગારીમાં સૌથી ધીમી વૃદ્ધિને કારણે ઉત્પાદકો પ્રત્યાઘાતી સુધારાની તૈયાર કરવા માટે ઉદાસીન છે.” એપ્રિલમાં કેપિટલ ગૂડ્ઝ સેક્ટર PMIની નબળાઈનું સૌથી મોટું કારણ છે. સેક્ટરના નવા બિઝનેસ અને આઉટપુટમાં ઘટાડો નોંધાયો છે. કન્ઝ્યુ અને ઇન્ટરમીડિયેટ ગૂડ્ઝ ઉત્પાદકોમાં વૃદ્ધિ જળવાઈ છે. સરવેના અહેવાલ મુજબ નવા ઓર્ડરમાં ધીમી વૃદ્ધિને કારણે મેન્યુફેક્ચરિંગ ઉદ્યોગમાં ઉત્પાદનની વૃદ્ધિ અને રોજગારી ધીમા પડ્યા છે. ઉપરાંત, ઈનપુટ ખરીદી અને બિઝનેસ સેન્ટિમેન્ટ પર પણ અસર પડશે.
એપ્રિલમાં નિકાસનું પરિબળ પ્રોત્સાહક રહ્યું છે. તેમાં નોંધપાત્ર અને માર્ચ કરતાં ઝડપી વૃદ્ધિ નોંધાઈ છે. મેન્યુફેક્ચરિંગ સેક્ટરની ધીમી વૃદ્ધિ સાથે ફુગાવાનો દર પણ ઘટ્યો છે. દિ લિમાએ વધુમાં જણાવ્યું હતું કે, “મેન્યુફેક્ચરિંગ સેક્ટરમાં ભાવના દબાણ અને વૃદ્ધિના મોમન્ટમમાં ઘટાડાને કારણે RBI જૂનમાં સતત ત્રીજી વખત વ્યાજદરમાં ઘટાડો કરે તેવી શક્યતા છે.”
RBIએ ગયા મહિને વ્યાજદર 0.25 ટકા ઘટાડ્યો હતો. વધુમાં એપ્રિલથી સપ્ટેમ્બરના ગાળામાં ખાદ્ય ચીજો અને ઈંધણના નીચા ભાવ તેમજ સામાન્ય ચોમાસાને કારણે રિટેલ ફુગાવો 2.9-3 ટકા રહેવાનો અંદાજ છે. હવામાન વિભાગે 96ટકા વરસાદ સાથે લગભગ સામાન્ય ચોમાસાની આગાહી કરી છે. ઉલ્લેખનીય છે કે, PMI ડેટા 400 કંપનીઓના પરચેઝિંગ એક્ઝિક્યુટિવ્સના સરવે પર આધારિત છે. તેમને બેઝિક મેટલ્સ, કેમિકલ્સ અને પ્લાસ્ટિક્સ, ઇલેક્ટ્રિકલ અને ઓપ્ટિકલ, ફૂડ અને ડ્રિંક, મિકેનિકલ એન્જિનિયરિંગ, ટેક્સટાઇલ્સ અને ક્લોધિંગ, ટિમ્બર અને પેપર તેમજ ટ્રાન્સપોર્ટ એમ 8 કેટેગરીમાં વહેંચવામાં આવે છે.
from Page Array – I Am Gujarat http://bit.ly/2IXHpn3
No comments:
Post a Comment