Wild Life ફોટોગ્રાફીનો શોખ હોય તો આંટો મારો આ પાર્કમાં, પ્રાકૃતિક સૌદર્ય પણ છે બેસ્ટ

વાઈલ્ડ લાઈફ લવર્સ માટે સ્વર્ગ

વાઈલ્ડ લાઈફની વાત આવે ત્યારે આપણે જૂનાગઢ અને ખીજડીયા પંખી અભ્યારણ યાદ આવે. આ સિવાય ક્યારેક પ્રાણી સંગ્રહાલયમાં ફોટા ક્લિક કરીને સંતોષ માનવો પડે. પણ ખુલ્લા મેદાનમાં આંટો મારતા વાઘ, હાથી, હરણ અને મોટા મોટા શિગળાવાળી જંગલીગાય જોવા મળે તો એ આનંદ કોઈ ટ્રેકિંગના થ્રીલથી ઓછો નથી. આવા લોકેશન પર કુદરતી નજારાને ક્લિક કરવાની પણ મજા હોય છે. ખાસ તો જ્યારે સફારી પાર્ક વાળાની સેફ ગાડીમાં બેસીને ક્લિક કરવાનું હોય ત્યારે વાઈલ્ડ લાઈફના શોખીનોને સ્વર્ગ જેવી અનુભૂતિ થાય. આવું જ પાર્ક છે બાંદીપુર નેશનલ પાર્ક. જોઈએ એક રીપોર્ટ.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ક્યાં આવેલું છે આ પાર્ક

બેંગ્લુરુથી 255 કિમી અને કોઈમ્બતુરથી માત્ર 84 કિમીના અંતરે આવેલું આ બાંદીપુર નેશનલ પાર્ક ખાસ તો વાઘ અને હાથી માટે જાણીતું છે. પૂર્વના કિનારે કર્ણાટકના પશ્ચિમ ઘાટ પર આવેલું આ પાર્ક દેશનું પ્રથમ વાઘની સુરક્ષા કરતું અભ્યારણ છે. આ પાર્ક એટલું મોટું છે કે, છેક પાડોશી રાજ્ય તામિલનાડું સુધી વિસ્તરેલું છે. તામિલનાડું રાજ્યની બોર્ડર પાસે પણ આ પાર્કનો એક ભાગ મુદુમલાઈ પાર્ક છે. અહીં એક વખત ગાઈડમેપ અને ગાઈડ સાથે સફારીમાં નીકળી પડો એટલે દરેક લોકેશન પર નાના-મોટા પ્રાણીઓ જોવા મળશે. અહીં જંગલની વચ્ચેના મજબૂત રસ્તાઓ પર આરામથી ગાડી આગળ વધશે એમ મન આ પાર્કમાં મગ્ન થતું જશે.

શું જોવા મળશે?

રસ્તાના કિનારે બેઠેલા હાથી, સુકાયેલા ઝાડની ડાળી પર બેઠેલો ચિત્તો, આમ તેમ દોડતા હરણ, દૂર આવતો રીંછનો અવાજ, વાઘની ત્રાડ અને લાલ મોઢાવાળા વાંદરાઓ એવા માહોલની યાદ અપાવશે જે આપણે ડિસ્કવરીમાં નિહાળીએ છીએ. આ સિવાય પણ અહીં લાલ ખિસકોલી, જંગલી બિલાડી, જંગલી ગાય, સિવેટ કેટ, અને જંગલી કૂતરાઓ જોવા મળશે. મુખ્ય રુટથી અંદર સુધી જઈ શકાય અને ક્યાં સુધી પ્રાણીઓનો વિસ્તાર છે એ માટેની સંપૂર્ણ માહિતી ઝાડના થડ પર બોર્ડમાં લખાયેલી હોય છે. તેથી કોઈ પ્રકારના તોફાન કે શોર બકોર કર્યા વગર શાંતિથી ક્લિક કરીને પાછું આવી શકાય છે.

કાયમ લીલુંછમ રહે છે

આ પાર્કની સૌથી ખાસ વાત એ છે કે, માર્ચથી જૂન મહિના સુધીમાં પણ અહીં ટાઢકનો અહેસાસ થાય છે. કારણ કે આ પાર્ક કબીની નદીના કિનારે આવેલું છે. નેશનલ પાર્ક તંત્ર દ્વારા તૈયાર કરાયેલી ઝૂંપડીઓ અને આરામગૃહના લોકેશન કોઈ રીસોર્ટને ટક્કર મારે એવા છે. અહીંથી નજીકમાં ઓરેન્જ કાઉન્ટી રીસોર્ટ પાર્ક છે. જ્યાં દાળ-ભાતનો ટેસ્ટ એક વખત કરવા જેવો છે. આ આ પાર્ક સવારે 8 વાગ્યા આસપાસ ખુલી જાય છે જ્યારે સાંજે 7 વાગ્યે બંધ થઈ જાય છે. 800 સ્કવેર કિમીના વિસ્તારમાં પથરાયેલા આ પાર્કમાં અનેક દેશી-વિદેશી પંખીઓ પણ આવે છે.

રાજવી શિકાર કરવા આવતા

આ જંગલ વિસ્તાર પ્રાણીઓ માટે તો જાણીતો છે જ. પણ પાર્કનો કેટલોક વિસ્તાર ચંદનના લાકડા માટે પણ જાણીતો છે. એક એવી પણ માન્યતા છે કે, જ્યારે રાજાશાહી શાસન હતું ત્યારે અહીં મૈસુરના રાજવી શિકાર કરવા માટે આવતા હતા. પણ પછીથી શિકાર પર પ્રતિબંધ આવતા આ જગ્યાને નેશનલ પાર્ક માટે તૈયાર કરવામાં આવી. સમયાંતરે પાર્કના લોકો રુટના વિસ્તારમાં આવતા કેટલાક ઉપયોગી લાકડાઓનું કટિંગ કરે છે. પણ ઝાડનો નાશ થઈ જાય એ રીતે તેને જળમૂળથી ઉખેડવામાં આવતા નથી.

બેસ્ટ નેશનલ પાર્ક

આ નેશનલ પાર્ક ઈન્ડિયાનું બેસ્ટ નેશનલ પાર્ક છે. મૈસુલ ઊંટી હાઈવે પર આવેલા પશ્ચિમ ઘાટ પર આ પાર્ક હોવાને કારણે આસપાસનો નજારો પણ મસ્ત છે. આજુબાજુ ઊંચા પહાડ અને વચ્ચે તેની વચ્ચે આ નેશનલ પાર્ક. મૈસુર અને ઊંટીથી આ પાર્ક નજીક થાય છે. આ પાર્ક સિવાય પણ જો બેંગ્લુરુ કે ઊંટીમાં અઠવાડિયું રોકાવવાનો પ્લાન હોય તો ગુડીબંદા ફોર્ટ, મનચિનબેલે ડેમ, કુંતીબેટ્ટા ટ્રેકિંગ પોઈન્ટ, ડોડામાકેલી-બર્ડે પેરેડાઈઝ, ગલીબોરે-રિવર પાર્ક, દેવનાહિલ (અહીં કોઈ હિલ નથી પણ પેલેસનું નામ છે) અને ગંડીકોટા પર ખાસ આંટો મારવા જેવું છે. આ એવા લોકેશન છે જ્યાં ફોટાપાડવાની મજા આવશે અને વાઈલ્ડ લાઈફ ટુર એક બેસ્ટ લોકેશન ટુર બની રહેશે.

 

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat http://bit.ly/2E13zAT