એસ્સારને લઈને સુપ્રીમનો નિર્ણય PSU બેંક્સ માટે પોઝિટિવ

72107376

વૈભવ શાહ,એમડી, મોનાર્ક નેટવર્થ કેપિટલ

માર્કેટ પોઝિટિવ અહેવાલોની તાતી જરૂરિયાત અનુભવી રહ્યું છે. તેજીવાળાઓ છેલ્લાં બે સપ્તાહથી વેચવાલી પચાવી રહ્યા છે. જેને કારણે નિફ્ટી 11,800ના મહત્ત્વના સપોર્ટ પર ટકી શક્યો છે. વીતેલા સપ્તાહ દરમિયાન સ્થાનિક સ્તરે પ્રગટ થયેલા આર્થિક આંકડા બજાર માટે પ્રોત્સાહક નહોતાં તેમ છતાં બજાર ચોખ્ખા સુધારા સાથે બંધ આવ્યું હતું. જમાર્કેટની મજબૂતી સૂચવે છે.

જોકે 12,000ના અવરોધને પાર કરવા માટે સારી એવી તાકાતની જરૂર જણાઈ રહી છે. જે કોણ પૂરી પાડશે તેનો ખ્યાલ હાલમાં તો બજારને પણ નથી અને તેથી જ હું ટ્રેડર્સને વર્તમાન તબક્કો પ્રોફિટ બૂકિંગનો છે એમ સ્પષ્ટપણે જણાવી રહ્યો છું. જો બેન્ચમાર્ક 12,200 પર બેથી ત્રણ ટ્રેડિંગ સત્રો સુધી સતત બંધ દર્શાવવામાં સફળ રહે તો જ માર્કેટમાં નવેસરથી લોંગ પોઝિશન લેવા માટેનું વિચારવું જોઈએ. વીતેલા સપ્તાહે સ્થાનિક સ્તરે કન્ઝ્યુમર પ્રાઇસ ઇન્ફ્લેશન (CPI) વધીને આવ્યું હતું.

ફિસ્કલ ડેફિસિટ પણ ઊંચી જોવા મળી હતી. જે માર્કેટ માટે ચિંતાની બાબત હતી. જોકે આમ છતાં સરકારી બોન્ડ યીલ્ડ્સ નહોતાં વધ્યાં એ સારી બાબત હતી. ગયા શુક્રવારે એક મહત્ત્વના નિર્ણયમાં એસ્સાર કેસમાં સુપ્રીમે બેંકર્સની તરફેણમાં આપેલો ચુકાદો PSU બેંક્સ માટે પોઝિટિવ બાબત હતી. આ નિર્ણયને કારણે SBI, કેનરા બેંક જેવી PSU બેંક્સ ઉપરાંત ખાનગી ક્ષેત્રે ICICI બેંકને ફાયદો થશે.

વૈશ્વિક સ્તરે US-ચીન વચ્ચે ટ્રેડ વોરના મુદ્દે તડકા-છાંયાની રમત રમાઈ હોય તેવું જણાય છે. એકાંતરે દિવસે બંને દેશો તરફથી વિરોધાભાસી નિવેદનોનો સિલસિલો વૈશ્વિક બજારોને ચેન પડવા દેતો નથી. જોકે આમ છતાં યુએસ શેરબજાર તેની સર્વોચ્ચ ટોચ નજીક ટકેલું છે. જર્મનીનું માર્કેટ પણ તેની ટોચ પર છે. એશિયન બજારોમાં સેન્ટિમેન્ટ એટલું સારું નથી જ. હોંગકોંગ ખાતે નાગરિક મૂવમેન્ટ લંબાઈ ગઈ છે અને ત્યાંના અર્થતંત્ર પર તેની વિપરીત અસર અનુભવાઈ રહી છે. કેલેન્ડરની શરૂઆતમાં સારો દેખાવ કરનાર હેંગસેંગ છેલ્લા કેટલાક મહિનાઓમાં દિશાહીન બન્યો છે.

સ્થાનિક મુદ્દા પર પાછા ફરીએ તો ડિસેમ્બરમાં રિઝર્વ બેંક ઓફ ઇન્ડિયા (RBI) તેની બેઠકમાં રેપો રેટમાં 50 બેસિસ પોઇન્ટ્સનો ઘટાડો કરે તેવી અપેક્ષા છે. સતત છેલ્લા બે સીપીઆઇ ડેટામાં વૃદ્ધિ છતાં મધ્યસ્થ બેંક આર્થિક વૃદ્ધિ પર ફોકસ કરી રહી હોવાથી રેટ કટ કરે તેવું સ્ટ્રીટ માની રહી છે. મિડ-કેપ્સમાં એક પખવાડિયાનો તેજીનો ટ્રેન્ડ અવરોધાયો છે. જો નિફ્ટી 12,000ની ટોચ પર બંધ આપવામાં સફળ રહેશે તો મિડ-કેપ્સમાં ચમકારો જોવા મળી શકે છે. જો બેન્ચમાર્કને જરૂરી સપોર્ટ ના મળ્યો તો તે 11,600 સુધી ગગડી શકે છે.

from Page Array – I Am Gujarat https://ift.tt/2NYCUtH