જમ્મુ-કાશ્મીરમાં હિમવર્ષાથી ગુજરાતમાં ગગડ્યો ઠંડીનો પારો, લોકો ઠૂંઠવાયા

અમદાવાદ: સમગ્ર રાજ્યમાં હવે દિવસે અને રાત્રે કડકડતી ઠંડીનો અનુભવ થઈ રહ્યો છે. ગરમ કપડાં પહેર્યા વિના ઘરની બહાર નીકળવું મુશ્કેલ લાગે છે. ઉત્તરપૂર્વ દિશાથી ફૂંકાઈ રહેલા ઠંડા પવનો ઉપરાંત જમ્મુ અને કાશ્મીરમાં હિમવર્ષાને લીધે રાજ્યમાં શિયાળો જામ્યો છે. ભારતીય હવામાન ખાતાએ આપેલી માહિતી પ્રમાણે, સોમવારે અમદાવાદમાં મહત્તમ તાપમાન 25 ડિગ્રી સેલ્સિઅસ નોંધાયું હતું, જે સામાન્ય કરતાં 4.3 ડિગ્રી નીચું હતું. જ્યારે લઘુત્તમ તાપમાન 12.9 ડિગ્રી હતું જે સામાન્ય કરતાં 0.4 ડિગ્રી નીચું હતું.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

હવામાન વિભાગના અધિકારીએ જણાવ્યા મુજબ, “આગામી બે-ત્રણ દિવસ સુધી જિલ્લાના લઘુત્તમ તાપમાનમાં નોંધપાત્ર ફેરફાર જોવા નહીં મળે. ઉત્તર દિશાથી વાતા ઠંડા પવનો અમદાવાદ સહિત રાજ્યભરમાં કડકડતી ઠંડીનું કારણ બન્યા છે.”

9.6 ડિગ્રી તાપમાન સાથે કચ્છનું નલિયા રાજ્યમાં સૌથી ઠંડું રહ્યું હતું. ત્યારબાદ ડીસા અને વલ્લભ વિદ્યાનગરનો ક્રમ આવે છે. અહીં 10.6 ડિગ્રી તાપમાન નોંધાયું હતું. રાજકોટ અને રાજ્યના પાટનગર ગાંધીનગરમાં 11.8 ડિગ્રી, કંડલામાં 11.9 ડિગ્રી સેલ્સિઅસ તાપમાન નોંધાયું હતું. કેશોદ અને સુરેન્દ્રનગર જિલ્લામાં ઠંડીનો પારો 12.2 ડિગ્રી સેલ્સિઅસ રહ્યો હતો. મોટાભાગના સ્થળોએ તાપમાન 25થી 27 ડિગ્રી સેલ્સિઅસની વચ્ચે રહ્યું હતું. રાત અને દિવસના તાપમાનમાં તફાવત જોવા મળ્યો હતો.

 

from Page Array – I Am Gujarat https://ift.tt/2EpbIPp