રાજકોટ: સીએમ રુપાણીએ તેમના હોમટાઉન રાજકોટને નવા વર્ષની ગિફ્ટ આપી છે. શહેરમાં પાંચ નવા ઓવરબ્રિજ બનાવવા માટે રાજ્ય સરકારે 230 કરોડ રુપિયા ફાળવ્યા છે. પાંચ નવા બ્રિજમાંથી ચાર તો સીએમ રુપાણીના મતવિસ્તારમાં જ બનાવવાની દરખાસ્ત છે. શહેરમાં બનનારા આ બ્રિજમાંથી કુલ ત્રણ બ્રિજ 150 ફુટ રિંગ રોડ પર બનાાવાશે, જ્યાં ટ્રાફિકજામની સમસ્યા સૌથી વધુ થાય છે.
હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો
અમદાવાદ-રાજકોટ વચ્ચે ટ્રાફિકજામ ન થાય તે માટે કાલાવાડ રોડ પર પણ બે બ્રિજ બનાવવાની દરખાસ્ત છે. રાજકોટ મ્યુનિસિપલ કોર્પોરેશનની સ્ટેન્ડિંગ કમિટિએ પાંચ બ્રિજની દરખાસ્ત રાજ્ય સરકારને મોકલીને ફંડની માગ કરી હતી. આ જ વર્ષે રાજકોટ મહાનગરપાલિકાની ચૂંટણી પણ થવાની છે ત્યારે સરકારે પાંચેય બ્રિજને બનાવવાની મંજૂરી પણ આપી દીધી છે.
RMCની દરખાસ્ત અનુસાર, નવા બ્રિજ નાના મઉવા ચોકડી, રામાપીર ચોકડી, કાલાવાડ રોડ (જડ્ડુસ રેસ્ટોરાં નજીક), ઉમિયા ચોક અને ગ્રીનલેન્ડ ચોકડી પર બનાવાશે. 150 ફુટ રિંગ રોડ પર પહેલાથી જ ત્રણ ફ્લાયઓવર છે. નવા બ્રિજ રિંગ રોડના બંને છેડે ગોંડલ ચોકડી અને માધાપર ચોકડી પર બનાવવાની દરખાસ્ત છે. આ બ્રિજ બની જતાં જ 11 કિમી લાંબા રિંગ રોડ પર ફ્લાયઓવરની સંખ્યા વધીને 9 થઈ જશે, અને એક અંડરબ્રિજ પણ આ રોડ પર છે.
નાના મઉવા ફ્લાયઓવર RMCના વોર્ડ નંબર 11માં પૂરો થાય છે, જ્યાં 2015ની ચૂંટણીમાં કોંગ્રેસના ચારેય ઉમેદવારો ચૂંટાયા હતા, રુપાણીને વોર્ડ નંબર 1માંથી સારા એવા વોટ મળ્યા હતા જ્યાં રામાપીર ચોકડી પર ફ્લાયઓવર બનાવવાની દરખાસ્ત છે, અને વોર્ડ નંબર 10માં જ્યાં કાલાવાડ રોડ પર બ્રિજ બનવાનો છે ત્યાંથી મેયર બિનાબેન આચાર્ય ચૂંટાયા હતા. ઉમિયા ચોકમાં જ્યાં ફ્લાયઓવરને મંજૂરી મળી છે ત્યાં આસપાસના વિસ્તારોમાં પાટીદારોની મોટી વસ્તી છે.
RMCમાં વિરોધ પક્ષના નેતા વશરામ સંગાથિયાનો આક્ષેપ છે કે ભાજપના કેટલાક નેતાઓએ 150 ફુટ રિંગ રોડ અને કાલાવાડ રોડ પર ભારે રોકાણ કર્યું છે, જેથી તમામ પ્રોજેક્ટ શહેરના પશ્ચિમ ભાગમાં જ બનાવાઈ રહ્યા છે. સરકાર આ પ્રકારની જાહેરાતો કરીને સસ્તી પ્રસિદ્ધિ મેળવી રહી છે. જે ચાર બ્રિજની જાહેરાત કરાઈ છે તેનું કોઈ કામ હજુ સુધી ચાલુ નથી થયું.
from Page Array – I Am Gujarat https://ift.tt/2QqKm2h
No comments:
Post a Comment