સોનામાં ધારદાર તેજીઃ ગુજરાતમાં પહેલી વાર ₹41,000ની સપાટી વટાવી

અમદાવાદઃ વિવિધ કારણોસર છેલ્લા થોડા સમયથી સોનાની કિંમતોમાં તેજી જારી છે. શુક્રવારે તો સોનાએ 41,000ની સપાટી વટાવી દીધી હતી. શુક્રવારે સોનાના ભાવમાં 1 જ દિવસમાં રૂ. 900નો વધારો થયો હતો અને તે રૂ. 41,200 પ્રતિ 10 ગ્રામની સપાટી સુધી પહોંચી ગયું હતું. ગુરુવારે અમદાવાદમાં સોનાની કિંમત 10 ગ્રામના રૂ. 40,300 હતી. નિષ્ણાંતોના જણાવ્યા અનુસાર બગદાદમાં યુ.એસની એરસ્ટ્રાઈકને પગલે સોનાના ભાવમાં વધારો જોવા મળ્યો હતો.

હવે ટેલિગ્રામ પર મેળવો દરેક મહત્વના સમાચાર, શરૂ કરવા અહીં ક્લિક કરો

ઈન્ડિયા બુલિયન એન્ડ જ્વેલર્સ એસોસિયેશનના ડિરેક્ટર હરેશ આચાર્યએ જણાવ્યું, “ઈરાન અને યુ.એસ વચ્ચે તણાવ વધતા આંતરરાષ્ટ્રીય બજારમાં સોનું પ્રતિ ઔંસ $1420થી વધીને $1448 થઈ ગયું હતું. ભારતીય રૂપિયો અમેરિકાના ડોલર સામે તૂટ્યો હોવાથી ભારતમાં સોનાનો ભાવ ભડકે બળ્યો હતો.”

છેલ્લે 31 ડિસેમ્બર 2019ના રોજ સોનાનો હાઈએસ્ટ ભાવ નોંધાયો હતો જે 10 ગ્રામના રૂ. 40,400 જેટલો હતો. વિશ્લેષકોનું માનવું છે કે આંતરરાષ્ટ્રીય માર્કેટમાં સોનાના ભાવ $1600 પ્રતિ ઔંસ સુધી ઊંચા જઈ શકે છે. ઈન્ડિયા ગોલ્ડ પોલિસી સેન્ટર (IGPC)ના હેડ સુધીશ નંબિયાથે જણાવ્યું, “અત્યારે ભૌગોલિક-રાજકીય અસ્થિરતાને કારણે સોનાના ભાવ માર્ચ મહિનામાં $1625 પ્રતિ ઔંસ સુધી ઊંચા જઈ શકે છે. જો આપણે છેલ્લા થોડા વર્ષનો ટ્રેન્ડ જોઈએ તો સોનાએ છ મહિનાના ગાળામાં 7-10 ટકા રિટર્ન આપ્યું છે, જો તમે 1 જાન્યુઆરીએ ઈન્વેસ્ટ કર્યું હોવાનું ગણીએ તો.”

તેમણે વધુમાં જણાવ્યું, “સોનાના ભાવ વધશે તેવી જાણ હોવા છતાં ભારતમાં સોનાની ડિમાન્ડ નબળી રહે તેવી શક્યતા છે. દેશમાં રોકડની અછતને કારણે ભારતીયો આ તકને વટાવી શકે તેવી શક્યતા ઓછી છે.” સોનાની કિંમત વધતા તેની માંગમાં ધરખમ ઘટાડો થવાની શક્યતા છે. ઈન્ડસ્ટ્રીને આશા છે કે આગામી બજેટમાં સરકાર સોના પર બેઝિક કસ્ટમ ડ્યુટીમાં ઘટાડો કરશે.

આચાર્યએ જણાવ્યું, “અત્યારે સોના-ચાંદી ઘરેણાના સેક્ટરમાં મંદીનો માહોલ છે. તેને ધ્યાનમાં રાખીને કેન્દ્ર સરકાર આગામી બજેટમાં પોલીસીમાં જરૂરી ફેરફારો કરે તેવી શક્યતા છે. અમે સોનાની આયાત પર લાગતી ડ્યુટીમાં ઘટાડાની આશા રાખી બેઠા છીએ.”

જો સોનાના ભાવ નહિ ઘટે તો તેની વિપરીત અસર સોનાના ઘરેણાના વેચાણ પર પડશે. અમદાવાદના અગ્રણી ઝવેરી મનોજ સોનીએ જણાવ્યું, “સોનાની કિંમત રૂ. 39,500 આસપાસ રહે છે તેવી તો ગ્રાહકોને ગણતરી હોય છે પરંતુ હવે ભાવ વધતા માંગમાં ઘટાડો જ થશે.” તેમણે એમ પણ જણાવ્યું કે હાલ 70 ટકાથી વધુ સોનાની ખરીદી જૂના ગોલ્ડના એક્સચેન્જમાં જ થાય છે.

સોનાની ખરીદી કરતી વખતે આ રીતે ચેક કરો હોલમાર્ક

from Page Array – I Am Gujarat https://ift.tt/37AYf3G