અમેરિકાઃ ન્યૂજર્સીમાં રહેતા પટેલ પરિવારના ત્રણ સભ્યોનું સ્વિમિંગ પૂલમાં ડૂબવાથી મોત

ન્યૂયોર્કઃ અમેરિકાના ન્યૂજર્સીમાં રહેતા મૂળ ગુજરાતી એવા પટેલ પરિવારના 3 સભ્યોનું ઘરની પાછળની ભાગમાં આવેલા સ્વિમિંગ પૂલમાં ડૂબવાથી મોત નીપજ્યું હોવાનું સામે આવ્યું છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો:

8 વર્ષની બાળકી સહિત પરિવારના ત્રણ સભ્યો પૂલમાંથી મૃત હાલતમાં મળી આવ્યા હતા, તેમ પોલીસે જણાવ્યું. પરિવારે થોડા સમય પહેલા જ ન્યૂજર્સીના ઈસ્ટ બર્નસ્વિકમાં આવેલું આ આલિશાન ઘર ખરીદ્યું હતું.

પરિવારના જે 3 સભ્યોના મોત થયા છે તેમાં 62 વર્ષીય ભરત પટેલ, 33 વર્ષીય પૂત્રવધુ નિશા પટેલ અને 8 વર્ષની પૌત્રીનો સમાવેશ થાય છે. આ ઘટના સોમવારે બની હતી.

પોલીસને શરૂઆતમાં ઈલેક્ટ્રિક શોક લાગવાથી ત્રણેયના મોત થયા હોવાની આ શંકા હતી. જો કે, ન્યૂયોર્ક પોસ્ટના રિપોર્ટ પ્રમાણે, ડૂબવાથી જ પરિવારના 3 સભ્યોના મોત થયા છે. પોલીસના સૂત્રોના જણાવ્યા પ્રમાણે, પૂલની ઊંડાઈ સામાન્ય કરતાં વધારે ઊંડી હતી.

પરિવારના ત્રણેય સભ્યો કેવી રીતે ડૂબી ગયા તે અંગે તપાસ અધિકારીઓ પણ હજુ જાણી શક્યા નથી. જો કે, ત્રણેયને ખૂબ સારું તરતા આવડતું નહોતું કે પછી ડરી ગયા હોવાના કારણે આમ થયું તે દિશામાં પોલીસ તપાસ કરી રહી છે.

પબ્લિક રેકોર્ડ્સ મુજબ, ત્રણેય લોકો ક્લિયરવ્યૂ રોડ પર આવેલા બંગ્લોમાં રહેતા હતા, જે તેમણે એપ્રિલ મહિનામાં 4,51,000 અમેરિકન ડોલરમાં ખરીદ્યું હતું

સોમવારે ઘરની પાછળના ભાગમાં આવેલા પૂલમાંથી બૂમાબૂમ સંભળાતા પાડોશીઓએ પોલીસને ફોન કર્યો હતો.’અમારૂં માનવું છે કે, મહિલા પૂલની અંદર મદદ માટે બૂમો પાડી રહી હતી’, તેમ પોલીસ પ્રવક્તા ફ્રેન્ક શટરે પ્રેસ કોન્ફરન્સ દરમિયાન જણાવ્યું.

પોલીસે ત્રણેયને પૂલમાંથી બહાર કાઢ્યા બાદ CPR આપવાનો પ્રયાસ કર્યો હતો, જો કે ત્રણેયને ઘટનાસ્થળે જ મૃત જાહેર કરાયા હતા.

મેયર બ્રાડ કોહને NJ.com સાથે વાતચીત કરતાં કહ્યું કે, ‘ત્રણેયના મોત થતાં ઈસ્ટ બર્નસ્વિકના લોકો આઘાતમાં છે. અમે તેમના પરિવાર પ્રત્યે સંવેદના વ્યક્ત કરીએ છીએ’.

પરિવારના ત્રણ સભ્યો મંગળવારે ત્યાં આવી પહોંચ્યા હતા, જો કે તેમણે કંઈ પણ કહેવાનો સ્પષ્ટ ઈનકાર કરી દીધો હતો.

from Page Array – I Am Gujarat https://ift.tt/3hYqZJu