જ્યોર્જ ફ્લોયડ ડેથ: અમેરિકા, બ્રિટેન અને ઑસ્ટ્રેલિયામાં વિરોધ પ્રદર્શન, USના 40 શહેરોમાં કરફ્યુ

હજારો લોકો રસ્તા પર ઉતર્યા

અમેરિકા: જ્યોર્જ ફ્લોયડના મૃત્યુ બાદ યુ.એસ., યુકે અને ઑસ્ટ્રેલિયામાં વારંવાર વિરોધ કરવામાં આવી રહ્યો છે. થોડા દિવસો પહેલા જ્યારે કોરોના વાયરસને કારણે અમેરિકા, બ્રિટન અને ઑસ્ટ્રેલિયાના રસ્તાઓ પર કોઈ જોવા નહોતું મળતું તેવામાં આજે હજારો લોકો ન્યાયની માંગ સાથે રસ્તાઓ રહીને દેખાવો કરી રહ્યા છે. અમેરિકામાં પરિસ્થિતિ એટલી ખરાબ થઈ ગઈ હતી કે લગભગ 40 શહેરોમાં કર્ફ્યુની જાહેરાત કરવામાં આવી હતી. જો કે, અન્ય દેશોમાં હિંસાના કોઈ અહેવાલ નથી.

અમેરિકામાં વિરોધ પ્રદર્શન ચાલુ

પોલીસના હાથે અશ્વેત અમેરિકન જ્યોર્જ ફ્લોયડના મોત બાદ ન્યાયની માંગ કરનારા વિરોધીઓ હવે મુશ્કેલીનો સામનો કરી રહ્યા છે. વિરોધ પ્રદર્શન દરમિયાન અનેકવાર પોલીસનું કડક વળણ જોવા મળ્યું છે. જેના કારણે ઘણા લોકો ઘાયલ થયા છે અને કેટલાક લોકોનાં મોત નીપજ્યાં છે. આવી સ્થિતિમાં પોલીસની સંવેદનશીલતા સામે અવાજ ઉઠાવવામાં આવી રહી છે. નોંધનીય છે કે, રાષ્ટ્રપતિ ડોનાલ્ડ ટ્રમ્પે ખુદ વિરોધકારો સામે બળનો ઉપયોગ કરવાની હિમાયત કરી છે.

52 વર્ષ પછી અમેરિકામાં હિંસા

એવું માનવામાં આવી રહ્યું છે કે, 52 વર્ષ પછી અમેરિકાના ઇતિહાસમાં આ સૌથી ભયાનક હિંસા છે. આ પહેલા વર્ષ 1968 માં માર્ટિન લ્યુથર કિંગની હત્યા બાદ આવા હિંસક સંઘર્ષ જોવા મળ્યા હતા. ન્યૂયોર્ક, શિકાગો, ફિલાડેલ્ફિયા અને લોસ એન્જેલિસમાં વિરોધીઓ સાથે પોલીસ અથડામણના અહેવાલો પણ છે. ઘણાં શહેરોમાં આ મામલો પોલીસના નિયંત્રણમાં નથી તે જોતાં અમેરિકાના રિઝર્વ ગાર્ડ નેશનલ ગાર્ડને ઘણા શહેરોમાં તહેનાત કરવામાં આવ્યા છે.

બ્રિટેનના કેટલાય શહેરોમાં પ્રદર્શન

USમાં જ્યોર્જ ફ્લોયડના મૃત્યુ પછી શરૂ થયેલા જાતિવાદ વિરોધી પ્રદર્શનમાં બ્રિટનનાં હજારો લોકોએ ભાગ લીધો છે. આ પ્રદર્શન લંડન, માન્ચેસ્ટર, કાર્ડિફ, લિસેસ્ટર અને શેફિલ્ડ સહિતના શહેરોમાં યોજવામાં આવ્યું હતું. લંડનમાં વિરોધીઓએ no justice, no peace અને black lives matterના સુત્રોચ્ચાર કર્યા હતા. બ્રિટનમાં આ વિરોધ મોટાભાગે શાંતિપૂર્ણ રહ્યો, જોકે કેટલાક લોકોએ વડાપ્રધાનના નિવાસસ્થાન નજીક અરાજકતા ફેલાવવાનો પ્રયાસ કર્યો હતો, ત્યારબાદ પોલીસે કાર્યવાહી કરી હતી.

લંડનમાં પ્રદર્શનકારીઓની ધરપકડ

લંડનના મેયર સાદિક ખાને વિરોધીઓને કહ્યું હતું કે હું તમારી સાથે ઉભો છું અને હું તમારો ગુસ્સો અને તમારી પીડા સમજુ છું. જણાવી દઈએ કે વડાપ્રધાનના નિવાસસ્થાન 10 ડાઉનિંગ સ્ટ્રીટની બહાર એક પ્રદર્શનમાં 10 પોલીસકર્મી ઈજાગ્રસ્ત થયા હતા. પોલીસે 14 પ્રદર્શનકારીઓની ધરપકડ પણ કરી છે. લંડનના પોલીસ કમિશનરે કહ્યું કે આ વિરોધ ગેરકાયદેસર છે અને આ માટે કોઈ મંજૂરી આપવામાં આવી નથી.

ઑસ્ટ્રેલિયામાં પણ હજારો લોકો રસ્તા પર ઉતર્યા

જ્યોર્જ ફ્લોયડના મોતના વિરોધમાં ઑસ્ટ્રેલિયામાં પણ હજારો લોકો રસ્તાઓ પર ઉતર્યા હતા. કોરોના વાયરસને કારણે ઑસ્ટ્રેલિયન સત્તાવાળાઓએ રેલીની મંજૂરી નહોતી આપી છતાંય લોકોએ વિરોધ પ્રદર્શન કર્યો હતો. સિડનીમાં કેટલાક આયોજકોને આરોગ્યના નિયમનો ભંગ કરવા બદલ દંડ ફટકારવામાં આવ્યો હતો. આ રેલીઓ બ્રિસ્બેન, મેલબોર્ન, હોબાર્ટ, એડિલેડ અને અન્ય જગ્યાએ યોજાઇ હતી.

હિંસાના છૂટાછવાયા બનાવો

પોલીસે કહ્યું કે, સિડનીના સેન્ટ્રલ સ્ટેશન પર પોલીસે કેટલાક પ્રદર્શનકારીઓ પર પેપર સ્પ્રેનો ઉપયોગ કર્યો હતો. આ સિવાય તમામ રેલી શાંતિપૂર્ણ રીતે સમાપ્ત થઈ હતી. પોલીસે ત્રણ લોકોની અટકાયત કરવાની પુષ્ટિ કરી છે. રેલી દરમિયાન ઘણા લોકોએ જાતિવાદી કાર્યવાહીના આરોપ સાથે ઑસ્ટ્રેલિયન પોલીસ સામે વિરોધ પણ કર્યો હતો.

from Page Array – I Am Gujarat https://ift.tt/2XC1MMS