સુરતીઓમાં હીરાજડિત ફેસ માસ્કનો ક્રેઝ, ખર્ચી નાખે છે 1થી 4.5 લાખ રૂપિયા

મેલ્વિન રેજી થોમસ, સુરત: મોંઘી જ્વેલરીમાં કંઈક એવું છે કે સુરતીઓ પોતાને તેની તરફ આકર્ષાતા રોકી નથી શકતા. દાંતથી લઈને લેન્સ સુધી તેઓ એવી જગ્યા શોધી જ લે છે જ્યાં તેઓ થોડો ચળકાટ મૂકી શકે. હવે કોરોના વાયરસના ‘ન્યૂ નોર્મલ’માં પણ સ્વેગ બતાવતા કોઈ સુરતીઓ પાસેથી શીખે. મોંની સુરક્ષા કરતાં ફેસ માસ્કને પણ સુરતીઓએ હીરાથી ચમકાવી દીધું છે. સુરતમાં હીરાજડિત ફેસ્ક માસ્ક લોકો બનાવડાવી રહ્યા છે.

હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો

N95 રેટિંગ સર્ટિફિકેટ અને ત્રણ લેયરવાળા માસ્કમાં રિયલ અને સિન્થેટિક ડાયમંડ જડવામાં આવ્યા છે. કોવિડ માર્કેટમાં આ લેટેસ્ટ ટ્રેન્ડ છે. જ્વેલર્સે જણાવ્યું કે, N95 માસ્કની કિનારીઓને રિયલ અને સિન્થેટિક ડાયમંડથી સુશોભિત કરવામાં આવે છે. આટલું જ નહીં કેટલાક તો હીરાજડિત માસ્કની કિનારીએ હીરાની લટકતી વધુ એક સેર બનાવડાવે છે.

શહેરના પોશ વિસ્તાર અઠવાલાઈન્સમાં આવેલા ડી. કુશલદાસ જ્વેલર્સના માલિક દીપક ચોક્સીએ અમારા સહયોગી અખબાર ટાઈમ્સ ઓફ ઈન્ડિયાને જણાવ્યું, “ગયા મહિને અમુક ગ્રાહકોના લગ્ન થયા ત્યારે તેમને કંઈક યૂનિક જોઈતું હતું. આના પરથી જ હીરાજડિત માસ્ક ડિઝાઈન કરવાનો વિચાર આવ્યો. વર અને કન્યા બંને માટે અમે લટકતી હીરાની સેરવાળા અને બોર્ડર પર હીરા જડેલા માસ્ક તૈયાર કર્યા હતા.”

દીપક ચોક્સીએ આગળ કહ્યું, “ત્રણ લેયર અને N95 માસ્ક હીરા જડવા માટે શ્રેષ્ઠ છે. અમે માસ્ક પર હીરાથી ડિઝાઈન બનાવીને તેને શણગારીએ છીએ. પહેલા અમે માસ્ક પર સોનાની પાતળી કાસ્કિટ ફિટ કરીએ છીએ અને પછી તેમાં હીરા લગાવીએ છીએ. સિન્થેટિક ડાયમંડના માસ્ક એકથી દોઢ લાખમાં વેચાય છે જ્યારે રિયલ ડામંડના માસ્ક 4.5 લાખ રૂપિયામાં વેચાય છે. ગ્રાહકોના બજેટના આધારે દરેક માસ્કમાં 150થી 400 હીરા લગાવીએ છીએ.” ચોક્સીનું પોતાનું મેન્યુફેક્ચરિંગ યુનિટ છે અને તેમણે અત્યાર સુધીમાં આવા આઠ જેટલા માસ્ક વેચ્યા છે. આ 8 માસ્કના ઓર્ડર સુરત અને તેની બહારના સ્થળોએથી મળ્યા હતા.

અન્ય એક જ્વેલર નૈનેશ પચ્ચીગરનું કહેવું છે કે, ગ્રાહકોને ખુશ રાખવા માટે નવી-નવી ડિઝાઈનો બનાવતા રહેવું પડકારજનક છે. તેમણે કહ્યું, “N95 માસ્ક પર હીરા જડવા સૌથી અઘરા છે. હીરા લગાવતી વખતે ખાસ તકેદારી રાખવામાં આવે છે, જેથી માસ્ક ધોઈને ફરીથી ઉપયોગમાં લેવાય ત્યારે કોઈ નુકસાન ના થાય.” લેબમાં તૈયાર કરેલા ડાયમંડ ફેસ માસ્ક ડિઝાઈન કરવામાં ઉપયોગમાં લેવાથી સસ્તા પડે છે. “આ ડાયમંડ અસલી હીરા કરતાં 60% સસ્તા છે. આ માસ્ક 60,000થી 1 લાખ રૂપિયામાં વેચાય છે”, તેમ નૈનેશ પચ્ચીગરે જણાવ્યું.

સુરત જ્વેલર્સ અસોસિએશનના પ્રમુખ સલીમ દાગીનાવાલાએ જણાવ્યું, “કોરોના વાયરસ મહામારી અને સોનાના વધેલા ભાવને લીધે જ્વેલરી બિઝનેસ 20 ટકા ઘટ્યો છે. ગ્રાહકોને આકર્ષવા માટે જ્વેલર્સે આવા અનોખા આઈડિયાનો ઉપયોગ કરવો પડે છે.”

from Page Array – I Am Gujarat https://ift.tt/2BR9Wcl