હેપ્પી બર્થ-ડે: 39 વર્ષનો થયો મહેન્દ્ર સિંહ ધોની, ‘0’ રનથી શરૂ થઈ હતી ક્રિકેટ સફર

આજે મહેન્દ્રસિંહ ધોનીને 39મો જન્મદિવસ

મહેન્દ્ર સિંહ ધોનીનો આજે 39મો જન્મદિવસ છે. રાંચીની ગલીઓથી ભારતીય ક્રિકેટના સૌથી સફળ કેપ્ટન બનવા સુધી ધોનીએ એક લાંબી સફર કરી છે. હવે તે ટીમમાં યુવા ખેલાડીઓના મેન્ટરની ભૂમિકામાં વધારે દેખાય છે. તેણે બાળપણમાં ઘણા સંઘર્ષ કર્યો. તેનો પરિવાર એક રૂમના મકાનમાં રહેતો હતો. કદાચ બાળપણમાં સંઘર્ષથી જ તેની અંદર જીતનો જુસ્સો અને ધૈર્ય મળ્યું. આજે આ ખાસ દિવસ પર ધોનીના યાદગાર ક્રિકેટ પળો પર એક નજર કરીએ….

2004 ડિસેમ્બરમાં 0 રનથી ડેબ્યૂ

ધોનીએ સૌરભ ગાંગુલીની કેપ્ટનશીપમાં પોતાના ઈન્ટરનેશનલ કરિયરની શરૂઆત કરી હતી. તેણે બાંગ્લાદેશ સામે ચિટ્ટગાંવમાં પહેલીવાર ટીમ ઈન્ડિયાની જર્સી પહેરી. પરંતુ આ મેચમાં ધોની 0 રન બનાવીને આઉટ થઈ ગયો હતો.

પાકિસ્તાન સામે 148 રન

પાકિસ્તાનની ટીમનો પ્રવાસ હતો. આ સીરિઝની બીજી વન-ડે મેચ હતી, જ્યારે કેપ્ટન ગાંગુલીએ ધોનીને ત્રીજા નંબરે બેટિંગ માટે મોકલ્યો. આ પહેલા લાંબા-લાંબા છગ્ગા મારવામાં ધોનીને મોટું નામ મળ્યું હતું, પરંતુ ઈન્ટરનેશનલ ક્રિકેટમાં હજુ તે પ્રભાવ છોડી શક્યો નહોતો. પરંતુ અહીં મળેલી તકનો તેણે ફાયદો ઉઠાવ્યો અને 123 બોલમાં 148 રન ફટકારીને ભારતીય ટીમનો સ્કોર 300ને પાર પહોંચાડી દીધો હતો. આ ઈનિંગ્સમાં ધોનીએ ટીમ ઈન્ડિયામાં પોતાની જગ્યા પાક્કી કરી લીધી હતી. આ તેના વન-ડે કરિયરની પાંચમી મેચ હતી.

શ્રીલંકા સામે અણનમ 183 રન

વર્ષ 2005માં શ્રીલંકા સામે જયપુરમાં રમાયેલી મેચમાં ભારતને 299 રનના ટાર્ગેટનો પીછો કરવાનો હતો. એક વાર ફરી ધોનીને નંબર 3 પર તક મળી અને તેણે 50 ઓવર વિકેટકિપિંગ કર્યા બાદ મેચના અંત સુધી બેટિંગ કરી અને 183 રન ફટકાર્યા. ધોનીના વન-ડે ક્રિકેટ કરિયરનો આ સર્વોચ્ચ સ્કોર છે.

2007માં ભારત ટી-20 વર્લ્ડ ચેમ્પિયન

પહેલીવાર ટી-20 વર્લ્ડકપ રમાઈ રહ્યો હતો અને મહેન્દ્રસિંહ ધોનીની કેપ્ટનશીપમાં ભારતે આ ઈતિહાસ રચી દીધો. ભારત માત્ર ટી-20 વર્લ્ડકપના ફાઈલનમાં જ નહોતું પહોંચ્યું પરંતુ પોતાના કટ્ટર હરીફ પાકિસ્તાનને હરાવીને ટાઈટલ જીત્યું હતું.

2011માં ભારત બીજી વખત ચેમ્પિયન

આ વર્લ્ડકપ ભારત સહિત બાંગ્લાદેશ અને શ્રીલંકામાં આયોજીત થઈ રહ્યો હતો. ભારતે અહીં ફાઈનલમાં શ્રીલંકાને હરાવીને બીજીવાર ટાઈટલ પોતાના નામે કર્યું. કપિલ દેવ બાદ ધોની બીજો ભારતીય કેપ્ટન છે, જેણે દેશને આ ગૌરવ અપાવ્યું છે.

2011ના વર્લ્ડકપમાં અણનમ 91 રન

આ મેચમાં ભારતને 275 રનનો ટાર્ગેટ મળ્યો હતો. સચિન અને સેહવાગ જલ્દી (31 રન) આઉટ થઈ ગયા. આ બાદ વિરાટ આઉટ થયો તો ધોની 5માં નંબરે બેટિંગ પર ઉતર્યો. ધોનીએ આ મેચમાં ગંભીર સાથે મેચ વિનિંગ પાર્ટનરશીપ કરી અને ટીમ ઈન્ડિયાને વિનિંગ સિક્સ મારીને જીત અપાવી.

ટેસ્ટમાં બેવડી સદી

વર્ષ 2013માં ઘરેલુ સીરિઝ ઓસ્ટ્રેલિયા સામે રમાઈ રહી હતી. ઓસ્ટ્રેલિયા સામે ચેન્નઈમાં રમાઈ રહેલી આ ટેસ્ટમાં ધોનીએ પોતાના કરિયરની એકમાત્ર બેવડી સદી ફટકારી હતી. ધોનીએ અહીં 224 રન બનાવ્યા હતા ભારતે આ મેચ 8 વિકેટથી જીતી લીધી હતી.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2ZHtGXv