નવી દિલ્હી ખાતે યોજાયેલી કોંગ્રેસ વર્કિંગ કમિટી (CWC) ની મહત્વપૂર્ણ બેઠક બાદ લોકસભામાં વિરોધ પક્ષના નેતા રાહુલ ગાંધીએ ચૂંટણી પંચ અને ભારતીય જનતા પાર્ટી (BJP) પર તીખા પ્રહારો કર્યા છે. રાહુલ ગાંધીએ દાવો કર્યો છે કે મુખ્ય ચૂંટણી કમિશ્નર (CEC) જ્ઞાનેશ કુમારને વડાપ્રધાન અને ગૃહમંત્રીનું રક્ષણ મળેલું છે, પરંતુ ટૂંક સમયમાં વડાપ્રધાન નરેન્દ્ર મોદી પોતે જ્ઞાનેશ કુમારનું રાજીનામું લેવા મજબૂર બનશે.
“80 ટકા જનતા માનવા લાગી છે કે વોટની ચોરી થઈ રહી છે”: રાહુલ ગાંધી
બેઠક બાદ પત્રકારોને સંબોધતા રાહુલ ગાંધીએ જણાવ્યું હતું કે, “મુખ્ય ચૂંટણી કમિશ્નર રાજકીય સંરક્ષણ વગર કામ કરી શકતા નથી. CEC એ પોતાના પદ પરથી હટવું જ પડશે અને તેમનું રાજીનામું નક્કી છે. હવે આપણે જનતાની વચ્ચે જવું પડશે. દેશના 80% લોકો હવે એવું માનવા લાગ્યા છે કે ચૂંટણીમાં વોટની ચોરી થઈ રહી છે.”
કોંગ્રેસની માંગ: PM મોદી, અમિત શાહ અને CEC તુરંત રાજીનામું આપે
ઇન્ડિયા ગઠબંધનની મહત્વની બેઠકના એક દિવસ પહેલાં જ કોંગ્રેસે વડાપ્રધાન નરેન્દ્ર મોદી અને ગૃહમંત્રી અમિત શાહના રાજીનામાની માંગણી કરી છે. CWC ની બેઠકમાં પસાર કરવામાં આવેલા પ્રસ્તાવમાં મુખ્ય માંગણીઓ રજૂ કરવામાં આવી છે:
મુખ્ય ચૂંટણી કમિશ્નર જ્ઞાનેશ કુમારનું તાત્કાલિક રાજીનામું.
વિવિધ રાજ્યોમાં ચાલી રહેલા વોટર લિસ્ટના સ્પેશિયલ ઇન્ટેન્સિવ રિવિઝન (SIR) પર તુરંત રોક.
મતદાતા યાદીમાંથી હટાવવામાં આવેલા 13 લાખથી વધુ મતદારોના નામો ફરીથી ઉમેરવામાં આવે.
CWC ના પ્રસ્તાવમાં વધુમાં જણાવાયું છે કે, દેશના બંધારણ અને લોકશાહીની સુરક્ષા સુનિશ્ચિત કરવા માટે શાસક પક્ષના ઉચ્ચ નેતૃત્વની જવાબદારી નક્કી થવી જરૂરી છે.
ઇન્ડિયા ગઠબંધનની બેઠકમાં દેશવ્યાપી આંદોલનની રણનીતિ ઘડાશે
કોંગ્રેસના સાંસદ અને સંગઠન મહાસચિવ કે. સી. વેણુગોપાલે માહિતી આપી હતી કે આ સમગ્ર મુદ્દાને ઇન્ડિયા ગઠબંધનની આગામી બેઠકમાં ગંભીરતાથી ઉઠાવવામાં આવશે. તેમણે ઉમેર્યું કે, “દેશમાં લોકશાહીને બચાવવા માટે તમામ વિરોધ પક્ષોના સહયોગથી એક મોટું આંદોલન ઊભું કરવાનો કોંગ્રેસનો નિશ્ચય છે. ગઠબંધનના નેતાઓ તરફથી મળનારા સૂચનોના આધારે ભવિષ્યની સ્પષ્ટ કાર્યયોજના જાહેર કરવામાં આવશે.”
The post PM મોદી પોતે CEC જ્ઞાનેશ કુમારનું રાજીનામું લેશે:રાહુલ ગાંધી appeared first on chitralekha.
from chitralekha https://ift.tt/JnEqQTo
via
No comments:
Post a Comment