રૂપિયો ઇન્ટ્રા-ડે 72.67: 72.45ના રેકોર્ડ તળિયે

મુંબઈ:ક્રૂડના ભાવ અને વૈશ્વિક ટ્રેડ વોર સહિતનાં વૈશ્વિક પરિબળોના દબાણ હેઠળ રૂપિયો ફરી એક વખત રેકોર્ડ નીચી સપાટીએ ગબડ્યો છે. ડોલરની સટ્ટાકીય માંગ અને આયાતકારોમાં ગભરાટને પગલે ભારતીય ચલણ ઇન્ટ્રા-ડે 94 પૈસા ઘટીને 72.67ના સ્તરે પહોંચ્યું હતું. જોકે, RBIની દરમિયાનગીરીને કારણે રૂપિયો નીચી સપાટીએથી સુધરી 72.45ના સર્વોચ્ચ નીચા સ્તરે બંધ રહ્યો હતો. શુક્રવારના બંધની તુલનામાં રૂપિયો 72 પૈસા ઘટ્યો હતો.
અમેરિકન પ્રેસિડન્ટ ડોનલ્ડ ટ્રમ્પે શુક્રવારે ફરી ટ્રેડ વોરને આગળ ધપાવવાનો નિર્ણય લેતાં વૈશ્વિક બજારોમાં સેન્ટિમેન્ટ ખરડાયું હતું. તેને લીધે રૂપિયામાં શુક્રવારની આંશિક રિકવરી ધોવાઈ ગઈ હતી. ઉલ્લેખનીય છે કે, રૂપિયો શુક્રવારે સતત સાત દિવસના ઘટાડા પછી 26 પૈસા વધીને બંધ રહ્યો હતો.
જોકે, સોમવારે ફોરેક્સ માર્કેટ ફરી વોલેટાઇલ બન્યું હતું. કરન્સી ડીલર્સના જણાવ્યા અનુસાર ભારતની રાજકોષીય ખાધ અને ટૂંકા ગાળાની ઋણ જવાબદારી વધવાની ચિંતાને કારણે રૂપિયા પર દબાણ વધ્યું હતું. ઇન્ટર-બેન્ક ફોરેક્સ માર્કેટમાં રૂપિયો શુક્રવારના 71.73ના બંધ સામે 72.18ના સ્તરે ખૂલ્યો હતો. ક્રૂડના ભાવમાં વધારો અને ચલણની નબળાઈએ પહેલેથી જ સેન્ટિમેન્ટ બગાડ્યું છે.
એપ્રિલ-જૂન ક્વાર્ટરમાં ભારતની ચાલુ ખાતાની ખાધ સાધારણ ઘટીને 2.4 ટકા થઈ છે, જે અગાઉના વર્ષના સમાન ગાળામાં 2.5 ટકા હતી. રૂપિયામાં તીવ્ર ઘટાડાને અટકાવવા રિઝર્વ બેન્કે ડોલર વેચ્યા છે. તેને લીધે 31 ઓગસ્ટે પૂરા થયેલા સપ્તાહમાં ભારતનું ફોરેક્સ રિઝર્વ ઘટીને 400.101 અબજ ડોલર થયું છે. ઉલ્લેખનીય છે કે, છેલ્લાં કેટલાંક વર્ષમાં ભારતના ફોરેક્સ રિઝર્વમાં મોટા ઉછાળાથી સ્થાનિક ચલણને ટેકો આપવામાં મદદ મળી છે.
ભારતના 10 વર્ષની મુદતના બેન્ચમાર્ક બોન્ડની યીલ્ડ સોમવારે 0.13 ટકા ઘટીને 8.16 ટકા થઈ હતી. સેન્ટિમેન્ટમાં ખરાબીને કારણે ઊભરતાં બજારોની કરન્સી અને વૈશ્વિક શેરબજારોમાં ઘટાડો નોંધાયો હતો. ક્રૂડના ભાવમાં પણ ઘટાડો ચાલુ રહ્યો છે. નવેમ્બરથી ઇરાન પર ક્રૂડની નિકાસનો પ્રતિબંધ અમલી બનવાથી પુરવઠામાં ઘટાડાનો અંદાજ છે. બ્રેન્ટ ક્રૂડનો ભાવ બેરલ દીઠ 77.22 ડોલરની આસપાસ હતો. ઉલ્લેખનીય છે કે, ભારતીય અર્થતંત્રએ એપ્રિલ-જૂન ક્વાર્ટરમાં 8.2 ટકાની પ્રોત્સાહક વૃદ્ધિ દર્શાવી છે. જોકે, રેટિંગ એજન્સી મૂડીઝના જણાવ્યા અનુસાર ચલણના ઘટાડાથી રૂપિયામાં આવક મેળવતી અને ડોલરમાં ઋણ ધરાવતી કંપનીઓ પર દબાણ વધવાનો અંદાજ છે.