આ રીતે તમે રોજના માત્ર રૂ. 900 ખર્ચીને આખા દેશમાં ટ્રાવેલ કરી શકો

42 દિવસ સુધી ફર્યાઃ

અમદાવાદઃ તમારી બાજુમાં બેઠેલી વ્યક્તિ તમારી ભાષા ન સમજતી હોય તો તમે તેની સાથે વાતચીત કેવી રીતી કરો? એ તો ઠીક, એક જ રૂમમાં કેવી રીતે રહો અને આવામાં બસ ચૂકી જાવ તો? આ પ્રશ્નોના જવાબ મેળવવા માટે આઈઆઈટી ગાંધીનગરના 96 જેટલા વિદ્યાર્થીઓએ ભેગા મળીને 42 દિવસ સુધી આખા ભારતમાં ભ્રમણ કર્યું. આ વર્ષની એક્સપ્લોરર ફેલોશિપના ભાગ રૂપે 32 જેટલી ટીમોએ આખા દેશમાં પ્રવાસ કરીને દેશની વિવિધતાાને સમજવાનો પ્રયત્ન કર્યો. IIT ગાંધીનગરના આસિસ્ટન્ટ પ્રોફેસર અને ફેલોશિપના કોર્ડિનેટર ચેતન પહલાજાનીએ જણાવ્યું કે વિદ્યાર્થીઓને દરરોજ માટે 900 રૂપિયાનું એટલે કે આખા દેશમાં ફરવા માટે કુલ રૂ. 37,800નું બજેટ આપવામાં આવ્યું હતુ.

900 રૂપિયાના બજેટમાં બધુ મેનેજ કર્યુંઃ

વિદ્યાર્થીઓએ સળંગ છ અઠવાડિયા પ્રવાસ ખેડ્યો હતો. તેમણે જણાવ્યું, “પ્રવાસમાં કેટલીક મર્યાદાઓ હતી જેમ કે વિદ્યાર્થીઓને એસી બસ, ટ્રેન કે એસી હોટેલો યુઝ કરવાની મનાઈ હતી. તેમને ખાણી-પીણ, ટ્રાવેલ કે રહેવા માટે પોતાનો એકપણ રૂપિયો ખર્ચ કરવાની મનાઈ હતી. તેમણે તેમને આપેલા બજેટમાંથી જ બધુ મેનેજ કરવાનું હતુ.” તેમણે જણાવ્યું કે વિદ્યાર્થીઓએ કમસેકમ છ સ્ટેટમાં ફરવુ ફરજિયાત હતુ જેમાંથી એક નોર્થ, એક નોર્થ-ઈસ્ટ અને એક રાજ્ય સાઉથનું હોવું જોઈએ.

જીવનના પાઠ શીખ્યાઃ

આ પ્રવાસનો પ્રોજેક્ટ રિપોર્ટ અને વિડિયો ડોક્યુમેન્ટેશન રજૂ કરવામાં આવશે. IIT-ગાંધીનગરના અધિકારીઓએ જણાવ્યું કે આમ કરવા પાછળનો આશય એ છએ કે યુવાન વિદ્યાર્થીઓ દેશના વૈવિધ્યને સમજી શકે અને તેમાંથી જીવનના પાઠ પણ શીખી શકે. આ ટૂરમાં વિદ્યાર્થીઓને વિવિધ લોકો સાથે કેવી રીતે ડીલ કરવું અને મર્યાદિત બજેટમાં કેવી રીતે ગાડુ ગબડાવવું તેના પણ પદાર્થપાઠ મળ્યા હતા. આ સાથે જ આ અનુભવે વિદ્યાર્થીઓની કેટલીય પૂર્વધારણાઓને પણ તોડી નાંખી હતી.

ખાટ્ટા મીઠા અનુભવો થયાઃ

બી.ટેકના બીજા વર્ષમાં અભ્યાસ કરતા વિદ્યાર્થી હર્ષ શાહે જણાવ્યું, “મેં અગાઉ મારી જાતે ક્યારેય ટ્રાવેલ નથી કર્યું પરંતુ મેં જ્યારે 10,000 કિ.મી પૂરા કર્યા ત્યારે મને કોન્ફિડન્સ આવ્યો કે હું એકલો ફરવા જઈ શકુ છું. આ ટ્રીપ દરમિયાન મને અનેક અવનવા અનુભવ થયા. દાખલા તરીકે, ડોર્મિટરીમાં ન રહેવુ પડે તે માટે અમે પુડુચેરીમાં 24 કલાક ખુલ્લા રહેતા એક કેફેમાં પહોંચી ગયા. પાછળથી અમને ખબર પડી કે એ કેફે તો રાત્રે 3 વાગ્યે બંધ થઈ જાય છે. આથી અમારે ચેન્નાઈની ટ્રેન પકડતા પહેલા બાકીની રાત પુડુચેરીના સૂમસામ બીચ પર વીતાવવી પડી હતી.” તેની ટીમને જાણવા મળ્યું કે ભારતના 8 જેટલા રાજ્યોમાં 100 જેટલા વિવિધ સ્ટ્રીટ ફૂડ મળે છે.

મુશ્કેલીમાંથી રસ્તો કાઢવાની શીખઃ

મટિરિયલ સાયન્સના સેકન્ડ યરના વિદ્યાર્થી વરૂણ ડોલિયાએ 10 રાજ્યોમાં ખેતીની અલગ અલગ પદ્ધતિઓનું ડોક્યુમેન્ટેશન કર્યું. તેમણે જણાવ્યું કે તામિલનાડુમાં લોકો તેમની બોલચાલની ભાષાનું ટ્રાન્સેલ્શન કરતી એપ કામ ન કરતી હોવાથી તે તામિલ નાડુના સ્થાનિક ખેડૂતો સાથે વાતચીત કરી શક્યા નહતા. તેણે જણાવ્યું, “અમે તામિલનાડુમાં અમારા એક સિનિયરનો સંપર્ક કર્યો. તેણે ખેડૂતો શું કહે છે તે સ્પીકર ફોન પર સાંભળ્યું અને તેનું ભાષાંતર કરી અમને જણાવ્યું. ટ્રાવેલિંગ સમયે કોઈ મુશ્કેલી ઊભી થાય તો તે સોલ્વ કેવી રીતે કરવી તે અમને શીખવા મળ્યું.”


from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat https://ift.tt/2NUqTql