અમદાવાદની પોળમાં ‘આઝાદી’ માટે લડી રહ્યા છે મૌની અને રાજકુમાર રાવ

‘મેડ ઈન ચાઈના’ માટે અમદાવાદમાં મૌની-રાજ

2017માં આવેલી કોમેડી-ડ્રામા ફિલ્મ ‘હિન્દી મીડિયમ’ આ વર્ષે 4 એપ્રિલે ચીનમાં રિલીઝ કરવામાં આવી. ‘હિન્દી મીડિયમ’ની સફળતા બાદ પ્રોડ્યુસર દિનેશ વીજાન ફરી ‘મેડ ઈન ચાઈના’ ક્વરી કોમેડી ફિલ્મ બનાવી રહ્યા છે. આ ફિલ્મમાં સ્ટ્રગલિંગ ગુજરાતી બિઝનેસમેનના રોલમાં રાજ કુમાર રાવ જોવા મળશે. 11 સપ્ટેમ્બરથી અમદાવાદમાં 26 દિવસનું આ ફિલ્મનું શૂટિંગ શિડ્યુલ શરૂ થયું છે. મૌની રોય ફિલ્મમાં રાજકુમાર રાવની પત્નીનો રોલ પ્લે કરી રહી છે.

મિખિલ મુસલેનું બોલિવુડ ડેબ્યૂ

‘મેડ ઈન ચાઈના’થી ગુજરાતી ડિરેક્ટર મિખિલ મુસલે બોલિવુડ ડેબ્યૂ કરવા જઈ રહ્યા છે. 2016માં મિખિલે ડિરેક્ટ કરેલી ગુજરાતી થ્રિલર-ડ્રામા ફિલ્મ ‘રોંગ સાઈડ રાજુ’ને ‘બેસ્ટ ફીચર ફિલ્મ ઈન ગુજરાતી’નો નેશનલ અવોર્ડ મળ્યો.

કાર નહીં રિક્ષામાં લોકેશન પર પહોંચે છે એક્ટર્સ

ફિલ્મ વિશે વાત કરતાં પ્રોડ્યુસર દિનેશ જણાવે છે કે, “સ્ટ્રગલિંગ પરંતુ મહત્વકાંક્ષી બિઝનેસમેન તરીકે રાજકુમાર એકદમ પરફેક્ટ છે. મૌની અને રાજના લૂક ફિલ્મના પાત્રો માટે બેસ્ટ છે. જૂના અમદાવાદમાં શૂટિંગ ચાલી રહ્યું છે, વીકએંડ હોવા છતાં શૂટિંગ કરવામાં કોઈ મુશ્કેલી નડી નથી. ગલીઓ એટલી સાંકળી છે કે ગાડીઓ પસાર નથી થઈ શકતી. એટલે બંને એક્ટર્સને લક્ષ્મી નારાયણ પોળમાં રિક્ષામાં લઈ જવા પડ્યા. લીડ એક્ટર્સ સાથે 200 ભેંસો પણ ફિલ્મમાં છે.”

15 ઓગસ્ટે રિલીઝ થશે ફિલ્મ

આવતા મહિને ફિલ્મનું શૂટિંગ ચીનમાં કરવામાં આવશે અને ફિલ્મનું ફાઈનલ શિડ્યુલ મુંબઈમાં છે. નવેમ્બરના અંત સુધીમાં શૂટિંગ પૂરું કરી દેવાનો પ્લાન છે. 15 ઓગસ્ટ 2019ના દિવસે ફિલ્મ રિલીઝ થશે. રિલીઝ ડેટ 15 ઓગસ્ટ રાખવા પાછળનું કારણ જણાવતાં દિનેશ કહે છે કે, “સ્વતંત્ર દેશમાં રહેતા હોવા છતાં સ્ટ્રગલમાંથી મુક્ત થવાનો વિચાર અઘરો છે. બધા જ પોતાના સપનાને જીવવા માટે મુક્ત નથી, જે ઈચ્છે છે તે બનાવ માટે સ્વતંત્ર નથી. આ પ્રકારની સ્વતંત્રતા બધા ઈચ્છે છે અને આ મેળવવા લડવું જોઈએ. આ સ્વતંત્રતા દિવસે આઝાદ થાઓ તે અમારી ફિલ્મનો મેસેજ છે.”