ઓગસ્ટમાં સળંગ ત્રીજા મહિને સામાન્ય કરતાં ઓછો વરસાદ પડ્યો

નવી દિલ્હી:ઓગસ્ટ મહિનામાં કેરળમાં ભયાનક પૂરની સ્થિતિ હતી અને બીજાં રાજ્યોમાં પણ વધુ પડતો વરસાદ પડ્યો હતો છતાં આખા દેશની વાત કરવામાં આવે તો ઓગસ્ટ મહિના દરમિયાન વરસાદની સૌથી ઊંચી ખાધ જોવા મળી હતી.
ભારતીય હવામાન વિભાગના સત્તાવાર આંકડા પ્રમાણે સળંગ ત્રીજા મહિને વરસાદમાં ઘટ પડી છે. ઓગસ્ટમાં લોંગ પિરિયડ એવરેજ (એલપીએ)ના 92 ટકા વરસાદ પડ્યો છે, જ્યારે જૂનમાં 95 ટકા અને જુલાઈમાં 94 ટકા વરસાદ પડ્યો હતો એમ ભારતીય હવામાન વિભાગે દર્શાવ્યું હતું.
હવામાન વિભાગે ચોમાસાના રાષ્ટ્રવ્યાપી નબળા દેખાવ માટે પૂર્વ અને ઉત્તરપૂર્વ ભારતમાં વરસાદની ખાધને જવાબદાર ઠેરવી છે. સત્તાવાર રીતે દક્ષિણપશ્ચિમ ચોમાસાની સીઝન
જૂનથી સપ્ટેમ્બર હોય છે. 15 સપ્ટેમ્બરથી ચોમાસુ રાજસ્થાનથી વિદાય લેવા માંડે છે અને તે પછી તબક્કાવાર રીતે વિદાય લે છે. યોગાનુયોગ ઓગસ્ટમાં કેરળમાં અભૂતપૂર્વ વરસાદ પડતાં રાજ્યનો કેટલોક હિસ્સો વરસાદમાં ડૂબી ગયો હતો અને મોટા પાયા પર કટોકટી આવી હતી.
હવામાન વિભાગ મુજબ કેરળમાં ‘અત્યંત ભારે’ વરસાદ પડ્યો છે, જ્યારે કર્ણાટકના દરિયાઈ વિસ્તાર, કર્ણાટકના દક્ષિણના અંતરિયાળ વિસ્તાર, તેલંગણા, દરિયાઈ આંધ્રપ્રદેશ અને જમ્મુ-કાશ્મીરમાં ‘વધુ પડતો’ વરસાદ પડ્યો હતો.
બીજી બાજુ, લક્ષદ્વીપ, પૂર્વ મધ્યપ્રદેશ, પશ્ચિમી મધ્યપ્રદેશ, ઝારખંડ, ગંગા તટના પશ્ચિમ બંગાળ, આસામ અને મેઘાલય, અરુણાચલપ્રદેશ, પૂર્વ રાજસ્થાન, પશ્ચિમ રાજસ્થાન, પંજાબ અને હરિયાણાનું સબડિવિઝન, ચંદીગઢ અને દિલ્હીમાં વરસાદની ઘટ હતી. ઓગસ્ટમાં કુલ 241.4 મિલીમીટર વરસાદ નોંધાયો હતો, જ્યારે સરેરાશ મુજબ તે 261.3 મિલીમીટર હોવો જોઈએ.
દક્ષિણપશ્ચિમ ચોમાસુ 2018 માટે હવામાન વિભાગે આગાહી કરી હતી કે ઓગસ્ટમાં 96 ટકા જેટલો વરસાદ પડશે અને તેમાં 9 ટકા વધઘટ રહેવાની શક્યતા હતી. તેની સામે વરસાદ 92 ટકા પડ્યો હતો. આમ ચોમાસાની કુલ ઘટ સાત ટકા થાય છે. તેમાં સૌથી વધુ પૂર્વમાં 24 ટકા અને હવામાન વિભાગના ઉત્તરપૂર્વ વિભાગનો સમાવેશ થાય છે.
સાઉથના હવામાન વિભાગના આંકડા મુજબ તેણે સાઉથ ડિવિઝને સામાન્ય કરતાં બે ટકા વધુ વરસાદ મેળવ્યો હતો, જ્યારે મધ્યભારત અને ઉત્તરપશ્ચિમની સરેરાશ માઇનસ 3 ટકા અને માઇનસ બે ટકા હતી. આમ આ વિસ્તારમાં વરસાદની ખાધ 3 ટકા અને બે ટકા હતી.
હવામાન ખાતાના ડિરેક્ટર જનરલ કે જે રમેશે જણાવ્યું હતું કે આંકડા દર્શાવે છે કે ચોમાસુ સરેરાશ કરતાં ઓછું રહ્યું છે, પરંતુ સમગ્ર દેશમાં વરસાદ સારો રહ્યો છે. તેમણે વરસાદની ઘટ માટે પૂર્વ અને ઉત્તરપૂર્વ ભારતમાં પડેલા ઓછા વરસાદને જવાબદાર ગણાવ્યો હતો. ગયા વર્ષે અનાજનું વિક્રમ ઉત્પાદન જોવાયું હતું, આ વર્ષે પણ ગયા વર્ષ કરતાં 0.28 ટકા વધારે વાવણી થઈ છે, તેમ રમેશે જણાવ્યું હતું.