ચોટીલા: 18 વર્ષની છોકરીનું અપહરણ કરી જનારા 50 વર્ષના શિક્ષક પર 1 લાખનું ઈનામ

ચાર મહિનાથી પોલીસ શોધી રહી છે

રાજકોટ: નાની ઉંમરની છોકરીઓને પ્રેમજાળમાં ફસાવી તેમને ભગાડી જનારા 50 વર્ષનો આધેડ શિક્ષક ધવલ ત્રિવેદી ફરી 18 વર્ષની યુવતી સાથે ગાયબ થઈ ગયો છે. છેલ્લા ચાર મહિનાથી પોલીસ ધવલ ત્રિવેદીને શોધી રહી છે, પરંતુ આજ સુધી તેનો કોઈ પત્તો ન મળતા પીડિતાના પિતાએ ધવલની માહિતી આપનારાને 1 લાખનું ઈનામ આપવાનું જાહેર કર્યું છે.

અમારા ન્યૂઝ Whatsapp પર મેળવવા માટે ક્લિક કરો

પેરોલ પર છૂટ્યો ત્યારે જ કર્યો કાંડ

અગાઉ રાજકોટમાં શિક્ષક તરીકે કામ કરતા ધવલ ત્રિવેદીએ આ જ પ્રકારનો ગુનો આચર્યો હતો, જેમાં તે જેલમાં હતો. જોકે, ઓગસ્ટ મહિનામાં તે 15 દિવસના પેરોલ પર છૂટ્યો હતો. આ દરમિયાન તેણે ચોટીલામાં ટ્યૂશન ક્લાસ શરુ કર્યા હતા. 10 ઓગસ્ટે જ તે તેના ક્લાસમાં આવતી નિધિ નામની યુવતીનું અપહરણ કરી તેની સાથે ગાયબ થઈ ગયો હતો.

નિધિના પિતાએ ઈનામ જાહેર કર્યુ

ચોટીલામાં કટલરીની દુકાન ચલાવતા નિધિના પિતાએ ધવલના ફોટાવાળા 1000 પોસ્ટર્સ પણ છપાવ્યા છે, અને તેમને જાહેર સ્થળો પર લગાવ્યા છે. આ પોસ્ટરમાં ધવલ કે નિધિની માહિતી આપનારાને એક લાખ રુપિયાનું ઈનામ આપવાની પણ જાહેરાત કરવામાં આવી છે.

છોકરીનો ફોન પણ વેચી દીધો

નિધિના પિતાએ જણાવ્યું હતું કે, ધવલનું છેલ્લું લોકેશન દિલ્હીના કરોલબાગ વિસ્તારમાં મળ્યું હતું. અહીં જ ધવલે નિધિનો નવો મોબાઈલ ફોન 4000 રુપિયામાં વેચ્યો હતો. ચોંકાવનારી વાત એ છે કે, ધવલે નિધિને તે સમયે પોતાની દીકરી ગણાવી હતી, અને તે બીમાર હોવાથી પૈસાની જરુરને કારણે પોતે ફોન વેચી રહ્યો છે તેમ જણાવી ફોન વેચ્યો હતો. નવો ફોન ખરીદવા માટે પણ તેણે નિધિના પિતાનું જ આધાર કાર્ડ આપ્યું હતું.

નેપાળ તરફ ભાગ્યો હોવાની શંકા

ધવલ જે યુવતીનું અપહરણ કરી ગયો છે તે નિધિ તેના માતા-પિતાનું એકનું એક સંતાન હતી. નિધિના પિતાની ફરિયાદના આધારે ધવલના મોબાઈલનું લોકેશન ચેક કરતા તે નેપાળ હોવાનું જાણવા મળ્યું હતું. પોલીસની એક ટીમ ત્યાં રવાના પણ કરવામાં આવી હતી, પરંતુ તે ખાલી હાથે પાછી ફરી હતી. વળી, ધવલ વારંવાર પોતાનું લોકેશન બદલતો હોવાના કારણે પોલીસ તેના સુધી હજુ પહોંચી શકી નથી.

પંજાબથી પકડાયો હતો

પોલીસને પણ ધવલ અને નિધિના 2200 પોસ્ટર્સ મળ્યા છે, જે વિવિધ જાહેર સ્થળો તેમજ મહત્વની ટ્રેનોમાં લગાવાયા છે. પોલીસે ધવલને 14 જુલાઈ 2014ના રોજ પંજાબથી પકડ્યો હતો. તે રાજકોટ નજીકના પડધરીમાં શિક્ષક તરીકે કામ કરતો હતો ત્યારે 11મા ધોરણમાં ભણતી બે છોકરીઓને લઈને ભાગી ગયો હતો, જેના બે વર્ષે તે પોલીસને હાથ લાગ્યો હતો.

આઠ યુવતીઓ સાથે ભાગી ચૂક્યો છે

મૂળ વડોદરાનો ધવલ બે વાર લગ્ન કરી ચૂક્યો છે, જે બંને નિષ્ફળ રહ્યા હતા. 2010થી અત્યાર સુધી તે લગભગ આઠ મહિલાઓ સાથે ભાગી ચૂક્યો છે. 23 માર્ચના રોજ બે કિશોરીઓના અપહરણ અને રેપના કેસમાં ધવલ ત્રિવેદીને આજીવન કેદની સજા ફરમાવાઈ હતી. જોકે, 28 જુલાઈના રોજ તેને 15 દિવસના પેરોલ મળ્યા હતા. ત્યારે તે ચોટીલા ગયો હતો, અને તેણે પોતાની ઓળખ ધર્મેન્દ્ર સર તરીકે આપી ઈંગ્લિશના કોચિંગ ક્લાસ શરુ કરી દીધા હતા.

from Page Array – I Am Gujarat https://ift.tt/2zi1Pkb