હેલ્મેટ ન પહેરતા અમદાવાદીઓ નહીં બચી શકે, એક દિવસમાં 5,757 લોકોનાં મેમા ફાટ્યા

19 નવેમ્બરે મેગા ટ્રાફિક ડ્રાઈવ

અમદાવાદ: હેલ્મેટ પહેરીને વાહન ચલાવવામાં કંટાળો અનુભવતા અમદાવાદીઓ હવે પોલીસથી છટકીને જઈ નહીં શકે. 19 નવેમ્બરથી અમદાવાદ શહેર ટ્રાફિક પોલીસ હેલ્મેટ પહેર્યા વગર ડ્રાઈવ કરતા લોકો સામે મોટું અભિયાન શરુ કરી રહી છે. શહેરના 76 પોઈન્ટ પર તૈનાત પોલીસ લોકોને કાયદાનું ભાન કરાવશે.

શહેરમાં માંડ 34 ટકા લોકો હેલ્મેટ પહેરે છે

આ અંગે અમદવાદ વેસ્ટ ટ્રાફિક ડીસીપી સંજય ખરાટે જણાવ્યું હતું કે, સુપ્રીમ કોર્ટે નીમેલી કમિટિએ જણાવ્યું છે કે અમદાવાદમાં માંડ 34 ટકા લોકો હેલ્મેટ પહેરે છે. લોકોમાં આ અંગે જાગૃતિ લાવવા માટે પોલીસ તમામ પ્રયાસ કરશે. જેના માટે શહેરના 76 સિગ્નલો પર 1596 જેટલા પોલીસકર્મીઓ તૈનાત કરાશે, જે હેલ્મેટ ન પહેરનારાને પકડશે.

દરેક સ્પોટ પર 20 કોન્સ્ટેબલ

દરેક સ્પોટ પર એક પીએસઆઈ અને તેમની સાથે 20 કોન્સ્ટેબલ તૈનાત કરાશે. જેઓ ટ્રાફિકના નિયમ ભંગ કરનારાને પકડશે. ઉલ્લેખનીય છે કે, મંગળવારે જ રિવરફ્રંટ પર ચાર જગ્યાએ પોલીસે હેલ્મેટ વગર વાહન ચલાવનારા 4449 લોકોના મેમા ફાડ્યા હતા. પોલીસનું અનુમાન છે કે, 19 નવેમ્બરે એક જ દિવસમાં 80,000 લોકોને મેમો મળી શકે છે.

તમામ પોલીસ સ્ટેશન પોઈન્ટ ઉભા કરશે

19મીએ શહેરના 14 ટ્રાફિક પોલીસ સ્ટેશનોની બે ટીમ વિવિધ લોકેશન પર તૈનાત રહેશે. આ ઉપરાંત 48 પોલીસ સ્ટેશનો પણ સંગલ ચેકપોઈન્ટ ઉભા કરશે. કુલ મળીને 76 જગ્યાઓ પર પોલીસ મેગા ટ્રાફિક ડ્રાઈવ ચલાવશે. બુધવારે રિવરફ્રંટ ઉપરાંત શિવરંજની અને એસપી રિંગ રોડ પર પણ પોલીસે ટ્રાફિક ડ્રાઈવ ચલાવી હતી.