ડેબ્યૂ પહેલા જ સેહવાગે કહી દીધું હતું, ‘ભારત માટે પહેલી ત્રેવડી સદી હું ફટકારીશ!’

19 નવેમ્બરે પ્રકાશિત થશે લક્ષ્મણની આત્મકથા

ભારતીય ટીમના પૂર્વ દિગ્ગજ બેટ્સમેન વીવીએસ લક્ષ્મણે ‘બિયૉન્ડ 281’ નામથી પોતાની આત્મકથા લખી છે. આ પુસ્તક ક્રિકેટ ફેન્સ 19 નવેમ્બરથી ખરીદી શકશે. ઈન્ટરનેશનલ ક્રિકેટમાંથી નિવૃત્તિ લીધા બાદ લક્ષ્મણ પોતાની આત્મકથા લોકો સમક્ષ લાવવા માગતો હતો જે આખરે હવે હકીકત બની છે. લક્ષ્મણે આ પુસ્તકનું નામ પોતાના કરિયરની સૌથી યાદગાર ઈનિંગ પરથી રાખ્યું છે. તેણે 2001માં ઓસ્ટ્રેલિયા વિરુદ્ધ કોલકાતા ટેસ્ટમાં 281 રનની ઐતિહાસિક ઈનિંગ રમી હતી. આ ઈનિંગ દ્વારા લક્ષ્મણે ક્રિકેટ વિશ્વમાં એક આગવી ઓળખ ઊભી કરી હતી.
અમારા ન્યૂઝ whatsapp પર મેળવવા માટે અહીં ક્લિક કરો

સેહવાગ વિશે કર્યો મોટો ખુલાસો

લક્ષ્મણનું પુસ્તક માર્કેટમાં આવે તે પહેલા તેના કેટલાક અંશ ‘ટાઈમ્સ ઑફ ઈન્ડિયા’માં છાપવામાં આવ્યા છે. લક્ષ્મણે ભારતીય ટીમના પૂર્વ વિસ્ફોટક ઓપનર વીરેન્દ્ર સેહવાગ વિશે એક ચોંકાવનારો ખુલાસો કર્યો છે. અસલમાં સેહવાગે જ્યારે ટેસ્ટ ક્રિકેટ રમવાનું પણ શરૂ નહોતું કર્યું ત્યારે જ તેણે લક્ષ્મણને કહી દીધું હતું કે, તે ભારત તરફથી ટેસ્ટમાં ત્રેવડી સદી ફટકારનારો પ્રથમ ખેલાડી બનશે.

281 વાળી ઈનિંગ બાદ લક્ષ્મણને વીરુએ કહ્યું…

અસલમાં 281 રનની ઈનિંગ રમ્યા બાદ લક્ષ્મણ, ઝહીર ખાન અને સેહવાગ સાથે ડિનર માટે ગયા હતા. અહીં સેહવાગે તેને કહ્યું કે, ભાઈ કોલકાત્તા ટેસ્ટમાં તારી પાસે 300 રન બનવવાની શાનદાર તક હતી પણ ટેન્શન ન લે, હું ભારત તરફથી પ્રથમ ત્રેવડી સેન્ચુરી ફટકારનારો બેટ્સમેન બનીશ.

ત્યારે ડેબ્યૂ પણ નહોતું કર્યું

સેહવાગની આ વાત સાંભળી લક્ષ્મણ સ્તબ્ધ રહી ગયો હતો, કારણ કે, તે વખતે સેહવાગે માત્ર 3-4 વન-ડે જ રમી હતી અને ટેસ્ટમાં તો હજુ ડેબ્યૂ પણ બાકી હતું. આ સમયે લક્ષ્મણે સેહવાગની વાતને મજાકમાં લીધી હતી પણ વીરુએ ત્રણ વર્ષ બાદ 2004માં પાકિસ્તાન વિરુદ્ધ આ વાતને હકીકત કરી બતાવી હતી.

ત્રણ વર્ષમાં પૂરું કર્યું વચન

લક્ષ્મણ કહે છે કે, જ્યારે સેહવાગે મુલ્તાનમાં પાકિસ્તાન વિરુદ્ધ ત્રેવડી સદી પૂરી કરી ત્યારે તે તેની પાસે આવીને હસવા લાગ્યો અને કહ્યું કે, મેં મારી વાત પૂરી કરી. લક્ષ્મણે સેહવાગની પ્રશંસા કરતા લખ્યું કે, ‘તે એક અલગ જ શૈલીનો ક્રિકેટર રહ્યો, આ જ કારણે તે આવી મોટી સિદ્ધિ બે-બે વાર સરળતાથી મેળવી શક્યો.’