રણવીરે કર્યો ખુલાસો, ક્યારે જાગી હતી દીપિકા માટે સ્પેશિયલ ફિલિંગ

6 વર્ષ રિલેશન બાદ કર્યા લગ્ન

રણવીર સિંહ અને દીપિકા પાદુકોણ 6 વર્ષ લાંબા રિલેશનશિપ બાદ આખરે લગ્નના બંધનમાં બંધાઈ ચૂક્યા છે. તેમના લગ્નનું સેલિબ્રેશન હજુ પણ ચાલી રહ્યું છે. બુધવારે બંનેએ મુંબઈમાં પોતાની રિસેપ્શન પાર્ટી રાખી છે. દીપિકા અને રણવીરના પરિવારની સાથે-સાથે ફેન્સ પણ આ કપલના એક થવાથી ખૂબ ખુશ છે. હવે રણવીર સિંહે પોતાના રિલેશનશિપ માટે એક ખાસ વાત શેર કરી છે.

ક્યારે જાગી એ ખાસ ફિલિંગ?

ફિલ્મફેરને અપાયેલા ઈન્ટરવ્યુમાં રણવીરે જણાવ્યું કે, તેને ક્યારે પહેલીવાર એવો અહેસાસ થયો કે, દીપિકા તેના માટે જ બની છે. રણવીરે કહ્યું કે, ‘રિલેશનશિપના 6 મહિના બાદ સમજાયું હતું કે, તે મારા માટે બની છે. મેં આ સંબંધને આ જ વિચારીને આગળ વધાર્યો હતો. હવે 6 વર્ષ થઈ ગયા છે. તે ખૂબ જ સારી અને પ્રેમાળ છે. તે કુદરતની ગિફ્ટ છે અને તે મને તરત સમજાઈ ગયું હતું.’

‘જાણતો હતો કે, દીપિકા જ મારી જીવનસાથી બનશે’

રણવીર અને દીપિકા પોતાના જીવનની નવી ઈનિંગ શરૂ કરી ચૂક્યા છે. અગાઉ પણ રણવીર અવારનવાર ખુલીને દીપિકાના વખાણ કરતો રહ્યો છે. તેણે આગળ જણાવ્યું કે, ‘મને સારી રીતે ખબર હતી કે, આ જ તે છોકરી છે જેની સાથે હું લગ્ન કરીશ. આ જ એ છોકરી છે જે મારા બાળકોની માતા બનશે.’

‘સિમ્બા’માં સારા સાથે દેખાશે રણવીર

રણવીર સિંહ લગ્ન બાદ હવે રોહિત શેટ્ટી નિર્દેશિત ફિલ્મ ‘સિમ્બા’ દ્વારા મોટા પડદે દેખાશે. આ ફિલ્મમાં તેની ઑપોઝિટ સારા અલી ખાન જોવા મળશે.