વડોદરાના યુવકને બેભાન કર્યા વિના ડૉક્ટરોએ મગજમાંથી કાઢ્યું ટ્યૂમર

મગજમાં હતી છ સેન્ટિમીટરની ગાંઠ

વડોદરા: 34 વર્ષના ભાવિક મોદીને મગજના એવા ભાગમાં ગાંઠ એટલે કે ટ્યૂમર થયું હતું કે જેનાથી આપણે ભાષા બોલી તેમજ સમજી શકીએ છીએ. ટ્યૂમરને કારણે તેમને વારંવાર ખેંચ આવતી હતી, વળી તેની સાઈઝ પણ વધીને છ સેન્ટિમીટર જેટલી થઈ ગઈ હોવાથી તેને તાત્કાલિક સર્જરી કરી બહાર કાઢવું જરુરી હતું.

આ હતું સૌથી મોટું જોખમ

મગજમાંથી ગાંઠ દૂર કરવાની આ સર્જરી ખૂબ જ જટીલ હતી, અને સર્જરી બાદ દર્દી ક્યારેય બોલી ન શકે અને સામેવાળો શું કહે છે તે સમજી ન શકે તેવી કાયમી સમસ્યા થવાનું પણ જોખમ હતું. જોકે, સ્ટર્લિંગ હોસ્પિટલના ડોક્ટરોએ ભાવિકભાઈને ભાનમાં રાખીને જ તેમના પર આ જટિલ સર્જરી કરી. સમગ્ર ઓપરેશન દરમિયાન તેઓ ભાનમાં હતા, અને ડૉક્ટરો સાથે વાતો પણ કરતા રહ્યા હતા.

કેન્સરની પણ હતી શક્યતા

આ સર્જરી કરનારા ન્યૂરોસર્જન ડૉ. મૌલીક વાજાના જણાવ્યા અનુસાર, જે મગજના જે ભાગમાં આ ટ્યૂમર હતું, તેના દ્વારા જ આપણે ભાષા બોલતા અને સમજતા શીખીએ છીએ. પેશન્ટને બેભાન કરી સર્જરી કરાઈ હોત તો તેમાં ઘણું જોખમ હતું, કારણકે ટ્યૂમર એવી જગ્યા પર થયું હતું. વળી, તેને સમયસર દૂર ન કરાયું હોત તો તે એડવાન્સ કેન્સરમાં બદલાઈ જાય તેવી પણ શક્યતા હતી.

મગજમાં નથી થતો ક્યારેય દુ:ખાવો

આપણું મગજ શરીરનો એવો હિસ્સો છે કે તેમાં ક્યારેય દુ:ખાવો નથી થતો. જોકે મગજ સુધી પહોંચવા ચામડી અને હાડકામાં કાપો મૂકવો પડે છે, અને જે ભાનમાં રહેલા પેશન્ટ પર શકય નથી. તેથી ભાવિકભાઈને માથાના ભાગમાં એનેસ્થેશિયા આપી તેમને ભાનમાં રાખીને જ સફળ સર્જરી કરાઈ હતી.