ભાજપના આ ધારાસભ્ય છે દેશના સૌથી ધનવાન બિલ્ડર

કુલ 27,150 કરોડની સંપત્તિના છે માલિક

મુંબઈ: માલાબાર હિલથી ભાજપના ધારાસભ્ય મંગલ પ્રભાત લોઢાને દેશના ધનવાન બિલ્ડરની યાદીમાં પહેલા નંબરે સ્થાન મળ્યું છે. કુલ 27,150 કરોડની સંપત્તિ સાથે તેમને GROHE હ્યુરન ઈન્ડિયા રિયલ એસ્ટેટ રિચ લિસ્ટ 2018માં પહેલું સ્થાન મળ્યું છે. તો, 2017માં તેઓ 18,610 કરોડની સંપત્તિ સાથે આ યાદીમાં બીજા નંબરે હતા. એમ્બેસી પ્રોપર્ટી ડેવલપમેન્ટના જિતેન્દ્ર વીરવાણી (52)ને 23,160 કરોડની કુલ સંપત્તિ સાથે બીજું સ્થાન મળ્યું છે. તેઓ ગત વર્ષે 16,700 કરોડની સંપત્તિ સાથે લિસ્ટમાં ત્રીજા સ્થાને હતા.

ડીએલએફના પ્રમોટરની સંપત્તિ ઘટી

એનસીઆર બેસ્ડ ડીએલએફના પ્રમોટર રાજીવ સિંહને આ યાદીમાં 17, 690 કરોડની સંપત્તિ સાથે ત્રીજા નંબરે રાખવામાં આવ્યા છે. 2017માં ડીએલએફ પ્રમોટર અને રાજીવ સિંહના પિતા કેપી સિંહ 23,460 કરોડની સંપત્તિ સાથે સૌથી ધનવાન બિલ્ડર હતા, પરંતુ રિયલ એસ્ટેટમાં ખાસ કરીને એનસીઆરમાં મંદીને પગલે તેમને આ ક્ષેત્રમાં સારું એવું નુકસાન ઉઠાવવું પડ્યું હતું. એ કારણે હવે તેમના પુત્ર રાજીવ આ યાદીમાં ત્રીજા નંબરે પહોંચી ગયા છે. તો, કેપી સિંહની દીકરી રેણુકા તલવાર (62) 2,780 કરોડની સંપત્તિ સાથે સૌથી અમીર મહિલા બિલ્ડર છે.

ધનવાન બિલ્ડર્સની યાદીમાં સૌથી વધુ નામ મુંબઈથી

રિપોર્ટ મુજબ, રિયલ એસ્ટેટના મોટાભાગના ટાયકૂન મુંબઈમાં રહે છે. અમીર બિલ્ડર્સની યાદીમાં સૌથી વધુ 35 નામ મુંબઈથી છે. દિલ્હીથી 22 અને બેંગલુરુથી 21 બિલ્ડર્સ આ લિસ્ટમાં સામેલ છે. ટોપ 100 ધનવાન બિલ્ડર્સની યાદીમાં કુલ સંપત્તિ 2,36,610 કરોડ રૂપિયા છે, જ્યારે 2018માં તે 1,86,700 કરોડ રૂપિયા હતી.

યાદી બનાવવામાં રખાયા હતા આ માપદંડ

આ યાદીમાં 30 સપ્ટેમ્બર, 2018એ ભારતમાં રહેતા બિલ્ડર્સને સામેલ કરવામાં આવ્યા હતા, એ સમયે એક ડોલરની કિંમત 72.46 રૂપિયા હતી. તેમાં ભારતમાં જ જન્મેલા બિલ્ડર્સને સામેલ કરવામાં આવ્યા છે. ખાસ વાત એ છે કે, ટોપ 100 નામોમાંથી 59 ટકા પહેલી પેઢીના આંતરપ્રિન્યોર છે અને તેમની સરેરાશ ઉંમર 59 વર્ષ છે. લિસ્ટમાં સૌથી યુવાન બિલ્ડર આરએમઝેડના 24 વર્ષના કુણાણ મેંદા છે અને સૌથી વૃદ્ધ બિલ્ડર ઈસ્ટ ઈન્ડિયા હોટલ્સના પૃથ્વી રાજ સિંહ ઓબેરોય છે.