માત્ર એકને બાદ કરતા ક્રિકેટના તમામ રેકોર્ડ તોડી શકે છે વિરાટ : સ્ટીવ વૉ

પૂર્વ કાંગારુ કેપ્ટને વિરાટની ભરપેટ પ્રશંસા કરી

ભારતીય કેપ્ટન વિરાટ કોહલીની બેટિંગના પ્રશંસકો માત્ર ભારતમાં જ નહીં પણ આખી દુનિયામાં છે. તેની બેટિંગ સ્ટાઈલને પસંદ કરનારા લોકોમાં વધુ એક દિગ્ગજનું નામ જોડાઈ ગયું છે. આ દિગ્ગજ છે ઓસ્ટ્રેલિયાનો પૂર્વ કેપ્ટન સ્ટીવ વૉ. તેણે વિરાટની ભરપેટ પ્રશંસા કરી અને કહ્યું કે, લેજન્ડ ડૉન બ્રેડમેનની એવરેજના રેકોર્ડને બાદ કરતા કિકેટની દુનિયાના દરેક રેકોર્ડને તોડી નાખશે.
અમારા ન્યૂઝ Whatsapp પર મેળવવા અહીં ક્લિક કરો

ડૉન બ્રેડમેનનો આ રેકોર્ડ નહીં તોડી શકે વિરાટ

વૉએ ક્રિકેટ ઑસ્ટ્રેલિયાને કહ્યું કે, ‘વિરાટમાં ભૂખ છે, તેની ફિટનેસ ગજબ છે અને તે ઈચ્છાશક્તિ સાથે રમે છે. તે આ રમતને પસંદ કરે છે. જો તે ગંભીર રીતે ઈજાગ્રસ્ત ન થાય તો મને લાગે છે કે, ડૉન બ્રેડમેનની એવરેજ સિવાયના તમામ રેકોર્ડ્ઝને તે તોડી નાખશે.’

બ્રેડમેન અને કોહલીના કરિયરની તુલના

જણાવી દઈએ કે, લેજેન્ડરી બેટ્સમેન ડૉન બ્રેડમેને પોતાની કરિયરમાં કુલ 52 ટેસ્ટ મેચ રમી હતી જેમાં તેણે 80 ઈનિંગ્સમાં 29 સેન્ચુરી સાથે 6996 રન બનાવ્યા હતા. તે 1948માં ઑવલ ગ્રાઉન્ડ પર ઈંગ્લેન્ડ સામે કરિયરની છેલ્લી મેચમાં શૂન્ય રને આઉટ થઈ જતા તેમની એવરેજ 99.94 રનની રહી. બીજી તરફ 73 રમ્યા બાદ કોહલીની ટેસ્ટમાં એવરેજ 54.58 રનની છે. આમ, કોહલી માટે ડૉન બ્રેડમેનની એવરેજને પાર કરવી અશક્ય જ છે.

સૌથી ઝડપી બનાવ્યા 10 હજાર વન-ડે રન

જણાવી દઈએ કે, કોહલીએ તાજેતરમાં જ વન-ડેમાં 10 હજાર રન પૂરા કરવાની સિદ્ધિ મેળવી છે. તેણે આ કારનામુ સૌથી ઓછી વન-ડે ઈનિંગ્સમાં કર્યું છે. અગાઉ સચિનના નામે આ રેકોર્ડ હતો જેના કરતા વિરાટે 54 ઈનિંગ્સ ઓછી રમી 10 હજારનો આંકડો પાર કરી લીધો. કોહલીના નામે અત્યારે 38 વન-ડે સેન્ચુરી છે અને તે સચિન બાદ દુનિયાનો સૌથી વધુ સદી ફટકારનારો બેટ્સમેન બની ગયો છે.