બજારમાં વોલેટિલિટી સાથે ટૂંકા ગાળાની તેજી ચાલુ રહેશે

66634837

વિનોદ નાયર,હેડ-રિસર્ચ,જિયોજિત ફાઈનાન્શિયલ સર્વિસિસ

બજારમાં ઘટાડાનો ટ્રેન્ડ પૂરો થયો હોવાથી અમને ટૂંકા ગાળામાં તેજીની ધારણા હતી. બજાર 26 ઓક્ટોબરના 10,000ના નીચા સ્તરથી વધીને મંગળવારે 10,576એ બંધ આવ્યું હતું, જે બે સપ્તાહના સમયગાળામાં આશરે છ ટકાનો વધારો દર્શાવે છે. વૈશ્વિક બજારમાં વોલેટિલિટી હોવા છતાં ક્રૂડ ઓઇલના વૈશ્વિક ભાવમાં તીવ્ર ઘટાડાથી ઘરેલુ બજારને સપોર્ટ મળ્યો છે.

ક્રૂડ ઓઇલના ભાવમાં તીવ્ર ઘટાડો થયો હોવા છતાં છેલ્લા બેથી ત્રણ દિવસમાં બજાર ઘણું જ અસ્થિર રહ્યું છે. ઘરેલુ બજારમાં લિક્વિડિટીની ચિંતા અને વૈશ્વિક બજારના નબળા સંકેતને કારણે બજાર સાંકડી રેન્જમાં ટ્રેડ થઈ રહ્યું છે. અમેરિકા અને ચીન વચ્ચે વેપાર સમજૂતીની આશામાં ઘટાડો અને ફેડની આગામી નીતિવિષયક બેઠકને કારણે વૈશ્વિક બજારમાં ઊંચી વોલેટિલિટી છે. ફેડ ડિસેમ્બરમાં વ્યાજદરમાં વધારો કરે તેવી ધારણા છે. ટૂંકા ગાળામાં હકારાત્મક વલણ સાથે બજારમાં સાવધ વલણ જળવાઈ રહેવાની ધારણા છે.

કંપનીઓનાં ત્રિમાસિક નાણાકીય પરિણામ અને ક્રૂડ ઓઇલના ભાવમાં ઘટાડાને આધારે સ્ટોક સ્પેસિફિક ખરીદી ચાલુ રહી છે. સીપીઆઇ ફુગાવો ઘટીને 3.31 ટકા થયો છે અને ભારતના ઔદ્યોગિક ઉત્પાદનમાં સ્થિર છે. ડોલર સામે રૂપિયો પણ વધ્યો છે, જેનાથી હકારાત્મક પરિબળો વધ્યાં છે. ક્રૂડ ઓઇલના ભાવ ઘટીને બેરલ દીઠ 65 ડોલર થાય તો નજીકના ગાળામાં ઘરેલુ બજારમાં પોઝિટિવ સેન્ટિમેન્ટ ઊભું થઈ શકે છે.

બજારે ચાલુ નાણાકીય વર્ષના બીજા છ મહિના માટે અર્નિંગ ડાઉનગ્રેડના પરિબળને ધ્યાનમાં લઈ લીધું છે. નિફ્ટી50 ઇન્ડેક્સના શેરોમાં ચોખ્ખું નફો અથવા પીએટીમાં વાર્ષિક ધોરણે આશરે 15 ટકા વૃદ્ધિની ધારણા સાથે બજારમાં આ ક્વાર્ટરનો પ્રારંભ થયો હતો. એકંદરે કોર્પોરેટ રિઝલ્ટ આ અંદાજથી થોડાં નીચાં રહ્યાં છે, જે વાર્ષિક ધોરણે 11.3 ટકા વૃદ્ધિ દર્શાવે છે. કોર્પોરેટ રિઝલ્ટની ક્વોલિટી અને સાતત્યમાં ઘટાડો થયો છે તેનાથી બજારમાં અર્નિંગ ગ્રોથમાં ડાઉનગ્રેડ થયું છે.

બજાર ટૂંકા ગાળા માટે હકારાત્મક લાગે છે, જ્યારે મધ્યમ ગાળામાં ઇન્વેસ્ટમેન્ટ એસેટ તરીકે ઇક્વિટીનું મૂળભૂત મૂલ્ય હવે બહાર આવી રહ્યું છે. વૈશ્વિક સ્તરે આપણને કરન્સી, ડેટ, ઇક્વિટી, કોમોડિટી અને બીજી એસેટના મૂલ્યમાં ફેરફાર જોવા મળી રહ્યો છે. આ ફેરફારને હજુ થોડો વધુ સમય લાગી શકે છે.

બજાર અંગે સાવધ વલણને કારણે જોખમથી દૂર રહેવા માંગતા સરેરાશ રોકાણકારો માટે ઇક્વિટીમાં રોકાણ 40થી 60 ટકા (ડાયરેક્ટ અને મ્યુચ્યુઅલ ફંડ્સ રોકાણ સહિત)ની રેન્જમાં રાખી શકાય છે. બાકીનું રોકાણ જોખમ લેવાની ક્ષમતા અને નાણાકીય હેતુને આધારે શોર્ટ ટર્મ ડેટ અને ગોલ્ડમાં રાખી શકાય છે. શેરબજાર આગામી એકથી ત્રણ ક્વાર્ટર્સ સુધી વોલેટાઇલ રહેવાની ધારણા છે, પરંતુ તે લાંબા ગાળા માટે સંપત્તિનું સર્જન કરશે. તેનાથી આકર્ષક વેલ્યુએશનને જાણીતી બ્રાન્ડના શેર ખરીદીની તક ઊભી થશે.

રોકાણની પ્રક્રિયામાં ચડઊતર આવ્યા કરે છે અને તેમાં સમયગાળો મહત્ત્વનું પરિબળ નથી. બજારની જરૂરિયાતને આધારે જોખમમાં ફેરફારને સમજવાની ક્ષમતા અને પુનર્ગઠન વધુ મહત્ત્વનું બની શકે છે. લાર્જ-કેપ અને મિડ-કેપની વિવિધતા સાથે જાણીતી બ્રાન્ડ, સેક્ટર્સ અને અગ્રણી કંપનીઓનો પોર્ટફોલિયો બનાવવા માટે હેતુને વળગી રહેવાની ધીરજ મહત્ત્વની છે. ભૂલને સમજીને નફો કે નુકસાન બૂક કરવાની સમજથી પોર્ટફોલિયોના હેતુમાં સુધારો થાય છે.

<b>ડિસ્ક્લેમર :</b>વિવિધ બ્રોકરેજ , વિશ્લેષકો અને ફંડ મેનેજરો દ્વારા આ પાના પર દર્શાવાયેલા વિચારો તેમના પોતાના છે. વાચકોએ આ ભલામણોનો અમલ કરતાં પહેલાં વ્યાવસાયિક સલાહકારોની સલાહ જરૂરી છે. ઈટી અહીં દર્શાવેલી પસંદગી માટે જવાબદાર નથી. www.economictimes.com પર ઈટીના સિદ્ધાંતોની આચારસંહિતા ચકાસવા વિનંતી છે.

]]>

from Page Array – I Am Gujarat https://ift.tt/2B9edEO