કાર્તિકે તોડ્યો સંગાકારાનો રેકોર્ડ, હવે માત્ર ધોની જ આગળ

કાર્તિકનું દમદાર પ્રદર્શન, ટીમને અપાવી જીત

ભારતે રવિવારે કોલકાતાના ઈડન ગાર્ડન્સ ખાતે પ્રથમ ટી20 મેચમાં વિન્ડીઝને 5 વિકેટે હરાવી. અપેક્ષાથી ઉલટ મેજબાન ટીમે આ મેચમાં ઋષભ પંતના સ્થાને દિનેશ કાર્તિક પાસે વિકેટકીપિંગ કરાવી. કાર્તિકે આ તકનો ભરપૂર ફાયદો ઉઠાવ્યો અને દરદાર પ્રદર્શન કર્યું. આ મેચમાં તેણે ટી20 ક્રિકેટમાં સૌથી વધુ કેચ પકડવા બાબતે કુમાર સંગાકારાને પાછળ છોડી બીજા સ્થાને પહોંચી ગયો. હવે માત્ર મહેન્દ્રસિંહ ધોની જ તેના કરતા આગળ છે.

વિકેટકીપિંગ-બેટિંગ બંનેમાં કરી કમાલ

કાર્તિકે આ મેચ દરમિયાન સ્ટમ્પ્સની પાછળ અને આગળ બંને જગ્યાએ શાનદાર પ્રદર્શન કરતા ભારતની જીતમાં મહત્વની ભૂમિકા ભજવી પહેલા તેણે ત્રણ કેચ ઝડપ્યા અને બાદમાં અણનમ 31 રનની ઈનિંગ રમી ટીમના વિજયમાં મહત્વનું યોગદાન આપ્યું.

સંગાકારાનો રેકોર્ડ ધ્વસ્ત કર્યો

કાર્તિકે આ મેચમાં દિનેશ રામદીન, શિમરન હેટમાયર અને રોવમેન પૉવેલના કેચ ઝડપ્યા. કાર્તિકે બુમરાહની બોલિંગમાં હેટમાયરનો કેચ પકડવાની સાથે જ સંગાકારાની બરાબરી કરી લીધી. બાદમાં તેણે કુલદીપ યાદવની બોલિંગમાં પોવેલનો કેચ ઝડપી સંગાકારાને પાછળ છોડી દીધો. આ તેના કરિયરનો 143મો કેચ હતો.

હવે માત્ર ધોનીથી જ પાછળ

કાર્તિકે અત્યાર સુધી તમામ 252 ટી20 મેચોમાં 198 શિકાર કર્યા છે, જેમાં 143 કેચ અને 55 સ્ટમ્પિંગ્સ શામેલ છે. હવે તેનાથી આગળ માત્ર પૂર્વ ભારતીય કેપ્ટન મહેન્દ્રસિંહ ધોની જ છે. ધોની અત્યાર સુધી 297 મેચોમાં કુલ 228 શિકાર કરી ચૂક્યો છે જેમાં 151 કેચ અને 77 સ્ટમ્પિંગ્સ છે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2RE5MXs