66523155
રજત અરોરાનવી દિલ્હી:જમ્મુ અને કાશ્મીરમાં ₹6,800 કરોડના ખર્ચે વ્યૂહાત્મક રીતે મહત્ત્વની ઝો જિલા ટનલના બાંધકામ માટે નવેસરથી બિડ મંગાવવામાં આવે તેવી શક્યતા છે. આ ટનલનું કામ ઇન્ફ્રાસ્ટ્રક્ચર લીઝિંગ એન્ડ ફાઇનાન્શિયલ સર્વિસિસ (આઇએલએફએસ)ને સોંપવામાં આવ્યું હતું.
સરકારે દેવા હેઠળ ડૂબેલી IL&FSના નવા બોર્ડને વહેલી તકે જણાવવા કહ્યું છે કે કંપની મહત્ત્વના અને મોટા કદના ઇન્ફ્રાસ્ટ્રક્ચર પ્રોજેક્ટ પાર પાડવા માટે સક્ષમ છે કે નહીં. ઝો જિલા પ્રોજેક્ટ હેઠળ ટનલની લંબાઈ 14.2 કિલોમીટર હશે અને દેશની સૌથી લાંબી રોડ ટનલ હશે.
આ ટનલ શ્રીનગર-કારગિલ-લેહ નેશનલ હાઈવે પર બાંધવામાં આવશે અને તે 11,578 ફૂટની ઊંચાઈ પર આવેલી છે. IL&FSને ગયા વર્ષે આ પ્રોજેક્ટ મળ્યો હતો. મે મહિનામાં વડાપ્રધાન નરેન્દ્ર મોદીની કાશ્મીર મુલાકાત વખતે તેનું શિલારોપણ કરવામાં આવ્યું હતું.
IL&FSની નાણાકીય કટોકટીના પગલે રોડ ટ્રાન્સપોર્ટ અને હાઈવે મંત્રાલયને આ પ્રોજેક્ટ પૂર્ણ કરી શકાશે કે નહીં તેનો ભય છે. નેશનલ હાઈવેઝ અને ઇન્ફ્રાસ્ટ્રક્ચર ડેવલપમેન્ટ કોર્પોરેશન મંત્રાલય વતી આ પ્રોજેક્ટને હેન્ડલ કરે છે. એક વરિષ્ઠ સરકારી અધિકારીએ જણાવ્યું હતું કે, “અમે તેમને પૂછ્યું છે કે તેઓ પ્રોજેક્ટને પાર પાડવાની ક્ષમતા ધરાવે છે કે નહીં. જો તેઓ સક્ષમ ન હોય તો સરકાર વધારે સમય વેડફવા નથી માંગતી અને તે તેના માટે નવેસરથી બિડ મંગાવશે.”
અધિકારીએ જણાવ્યું કે મંત્રાલય IL&FSને મદદ કરવા માંગતું હતું અને તેણે જોઇન્ટ મિકેનિઝમ રચવાનું સૂચન કર્યું હતું જેથી આઇએલએફએસ હેઠળના નેશનલ હાઈવે પ્રોજેક્ટને કઈ રીતે પાર પાડવા તે જાણી શકાય.
IL&FSના નવા બોર્ડને આશા છે કે તે હાઈવે પ્રોજેક્ટ્સનો હિસ્સો વેચીને ઓછામાં ઓછા 20,000 કરોડ રૂપિયા એકત્ર કરી શકશે. તેમણે કહ્યું કે તેઓ પહેલેથી ઓપરેશનલ નેશનલ હાઈવે પ્રોજેક્ટ લિક્વિડેટ કરવા માંગતા હોય તો અમે તેમને તાત્કાલિક મંજૂરી આપીશું. આ ઉપરાંત આર્બિટ્રેશન કેસનો તાત્કાલિક ઉકેલ લાવવામાં આવશે.
No comments:
New comments are not allowed.