નવી દિલ્હી: પેટ્રોલ અને ડીઝલના ભાવમાં વધારાને પગલે ઓક્ટોબરમાં હોલસેલ પ્રાઈસ ઈન્ડેક્સ (WPI) આધારિત ફુગાવાનો દર વધીને 5.28 ટકાની ચાર મહિનાની ઊંચી સપાટીને સ્પર્શી ગયો હતો. જોકે, સૂચિતગાળામાં ખાદ્ય પદાર્થોના ભાવમાં નરમાઈ જોવા મળી હતી.
ગયા સપ્ટેમ્બરમાં WPI ફુગાવાનો દર 5.13 ટકા અને એક વર્ષ અગાઉના સમાનગાળા દરમિયાન 3.68 ટકા હતો. બુધવારે જારી કરવામાં આવેલા સત્તાવાર આંકડા અનુસાર ઓક્ટોબરમાં ખાદ્ય ચીજવસ્તુઓના ભાવમાં 1.49 ટકાનો ઘટાડો જોવા મળ્યો હતો. સપ્ટેમ્બરમાં ખાદ્ય પદાર્થોના ભાવમાં 0.21 ટકાની વૃદ્ધિ જોવા મળી હતી.
અગાઉના મહિનાના 3.83 ટકાની સરખામણીમાં ઓક્ટોબર મહિનામાં શાકભાજીના ભાવમાં 18.65 ટકાનો ઘટાડો નોંધાયો હતો.
સૂચિતગાળામાં ઈંધણ અને વીજળીના ભાવમાં ભારે વૃદ્ધિ જોવા મળી હતી. સપ્ટેમ્બરના 16.65 ટકાની સરખામણીમાં ઈંધણ અને ઉર્જાના બાસ્કેટમાં 18.44 ટકાની ભાવ વૃદ્ધિ જોવા મળી હતી. ઓક્ટોબરમાં પેટ્રોલ, ડીઝલ અને LPGના ભાવમાં અનુક્રમે 19.85 ટકા, 23.91 ટકા અને 31.39 ટકાનો ઉછાળો નોંધાયો હતો.
ખાદ્ય પદાર્થોમાં બટાટાના ભાવમાં 93.65 ટકાનો ઉછાળો નોંધાયો હતો જ્યારે ડુંગળીના ભાવમાં 31.69 ટકાનો ઘટાડો જોવા મળ્યો હતો જ્યારે કઠોળના ભાવમાં પણ 13.92 ટકાનો ઘટાડો નોંધાયો હતો.
આમ જથ્થાબંધ ભાવાંક આધારિત ફુગાવાનો દર 5.28 ટકાની ચાર મહિનાની ટોચે પહોંચ્યો હતો. આ અગાઉ જૂન મહિનામાં જથ્થાબંધ ભાવાંક આધારિત ફુગાવાનો દર 5.68 ટકાની ઊંચી સપાટીએ હતો.
આ સપ્તાહની શરૂઆતમાં રિટેલ ફુગાવો 3.31 ટકાની એક વર્ષની નીચી સપાટીને સ્પર્શી ગયો હતો. ભારતીય રિઝર્વ બેન્ક પોલિસી રેટ નિર્ધારિત કરવામાં રિટેલ ફુગાવાના આંકડા ધ્યાનમાં લેતી હોય છે.
]]>
from Page Array – I Am Gujarat https://ift.tt/2T8iI9D
No comments:
Post a Comment