12 કરોડથી વધુ લોકો લેવાના છે કુંભની મુલાકાત, તમારો વિચાર હોય તો આટલું જાણી લો, ફાયદામાં રહેશો

કુંભ 2019:

પ્રયાગરાજઃ આવતા મહિનાથી શરૂ થયેલા અર્ધકુંભ મેળા માટે પ્રયાગરાજ સંપૂર્ણ રીતે હાઈટેક થઈ ચૂક્યુ છે. 14 જાન્યુઆરી 2019થી 4 માર્ચ 2019 સુધી યોજાતા કુંભ મેળામાં 12 કરોડથી વધુ શ્રદ્ધાળુઓ આવવાની શક્યતા છે. જો તમે કુંભમાં જવાનું વિચારતા હોવ તો જાણી લો કે તમારા બજેટ પ્રમાણે ક્યાં રોકાઈ શકાય, ત્યાં કેવી સુવિધા મળે. પ્રયાગરાજ (અલહાબાદ)માં એક નહિ, અનેક ટેન્ટ સિટીનું નિર્માણ થઈ ચૂક્યું છે. અહીં એવા લક્ઝરી ટેન્ટ પણ છે જેમાં રોકાવા માટે તમારે એક રાતના 35 હજાર રૂપિયા ચૂકવવા પડી શકે છે. ઓછા બજેટ ધરાવતા લોકો માટે 650 રૂપિયામાં પણ ટેન્ટ મળે છે. કુંભ માટે કોઈપણ ઑફિશિયલ માહિતી તમે ભારત સરકારની વેબસાઈટ https://kumbh.gov.in/ પરથી મેળવી શકો છો.

અમારા ન્યુઝ WhatsApp પર મેળવવા અહીં ક્લિક કરો

ઈન્દ્રપ્રસ્થમઃ

આ ટેન્ટમાં એવી કેટલીય સુવિધાઓ છે જે ફાઈવસ્ટાર હોટેલથી કમ નથી. અલહાબાદમાં ગણીગાઠી ફાઈવ સ્ટાર હોટેલ છે જે નેતાઓએ પહેલેથી જ બુક કરાવી દીધી છે. આથી યુ.પી સરકારે દિલ્હીની હિતકારી પ્રોડક્શન એન્ડ ક્રિએશન્સ સાથે મળીને લક્ઝરી ટેન્ટ સિટી ઈન્દ્રપ્રસ્થમ બનાવ્યું છે. તેમાં સૌથી મોંઘો ટેન્ટ 35 હજારનો છે. તેમાં ઓછી જગ્યામાં વધારેમાં વધારે સુવિધા અપાઈ છે. 900 સ્ક્વેર ફીટના આ ટેન્ટમાં બે બેડરૂમ અને એક લિવિંગ રૂમ છે. તેમાં ફર્નિચરથી માંડીને પ્રાઈવેટ વોશરૂમ, એલઈડી ટીવી અને અન્ય લક્ઝરી આઈટમ્સ છે. આ ઈન્દ્રપ્રસ્થનું પ્રીમિયમ ટેન્ટ છે.

ગુજરાતી કંપનીઓના ટેન્ટઃ

આ ઉપરાંત પરિસરમાં 600 કોટેજ ટેન્ટ છે. તેમાં 200 લક્ઝરી અને 250 ડીલક્સ ટેન્ટ શામેલ છે. અહીં રોકાવાની કિંમત 16 હજાર અને 12 હાર રૂપિયા છે. આ ટેન્ટમાં ગંગા ઘાટનો વ્યુ મળશે. તમે અહીંથી નદીઓના સંગમનો શાનદાર નજારો જોઈ શકશો. આ વખતે કુંભમાં બીજી 5 કંપનીઓ પણ છે જેણે યુપી ટૂરિઝમ સાથે પાર્ટનરશિપ કરીને કુંભ મેળા ગ્રાઉન્ડમાં ટેન્ટ લગાવ્યા છે. તેમાં ગુજરાતી કંપની ગાંધી કોર્પોરેશન અને લાભ ડેકોરેટરે વૈદિક ટેન્ટ સિટી બનાવ્યું છે. તેમાં 24 હજારમાં પ્રીમિયમ વિલા મળશે. આ ઉપરાંત લક્ઝરી ટેન્ટની કિંમત 19,000થી 15,000 સુધી હશે. અહીં 1200 ટેન્ટ લગાવવામાં આવ્યા છે જ્યાંથી તમને ત્રિવેણી સંગમ જોવા મળશે. આ સાથે જ આયુર્વેદિક સ્પા સેન્ટર, યોગ અને મેડિટેશન સેન્ટરની સુવિધા પણ મળશે.

બુકિંગઃ

આ માટે તમે https://kumbh.gov.in/hi/tent-city પર જઈને વૈદિક સિટીની વેબસાઈટ અને ફોન નંબરની જાણકારી મેળવી શકો છો. અથવા તો ડાયરેક્ટ વૈદિક ટેન્ટ સિટીની વેબસાઈટ પર બુકિંગ કરાવી શકો છો.

બજેટ ઓછું હોય તોઃ

તમારુ બજેટ ઓછુ હોય તો નિરાશ થવાની જરૂર નથી. પ્રયાગરાજના લલ્લુજી બર્ધર્સે કલ્પવૃક્ષ ટેન્ટ સિટી ઊભુ કર્યું છે. અહીં 3500થી 8500 પ્રતિ રાતના હિસાબે ટેન્ટ મળશે. બજેટ સાવ ઓછુ હોય તે 650 રૂપિયામાં પણ ટેન્ટ બુક કરાવી શકશે. આ માટે તમે કલ્પવૃક્ષની વેબસાઈટ અથવા કુંભની વેબસાઈટ પર જઈને ટેન્ટ બુક કરાવી શકો છો.

18 હજારમાં મહારાજા કોટેજઃ

યુ.પી સરકાર દ્વારા UPSTDC સાથે મળીને સંગમ ટેન્ટ સિટી નામનું પોતાનું ટેન્ટ સિટી ઊભુ કર્યું છે. તેમાં 18000 રૂપિયા પ્રતિ રાતમાં મહારાજા કૉટેજ અને 9000 રૂપિયામાં સ્વિસ કોટેજ બુક કરી શકાય છે. તેમાં વાઈ-ફાઈ કનેક્ટિવિટી, સીસીટીવી, એટેચ્ડ પ્રાઈવેટ વોશરૂમની સુવિધા છે.

નેચરોપેથી, સ્પા, હેલિકોપ્ટર રાઈડ શામેલઃ

રાજ્ય સરકારના જણાવ્યા અનુસાર બધાના બજેટને ધ્યાનમાં રાખીને સુવિધા ઊભી કરાઈ છે. જેમ કે યોગ, આરતી, સાઈકલિંગ, વોટર સ્પોર્ટ્સ, નેચરોપથી, કૉફી લાઉન્જ. સંગમ અને કુંભ મેળા ગ્રાઉન્ડ માટે હેલિકોપ્ટર ટૂર પણ શામેલ છે. ટેન્ટમાં LED ટીવી, હાઈ ક્વોલિટી લિનન, વેજિટેરિયન ફૂડ કોર્ટ, વાઈ-ફાઈ, સીસીટીવી, ફર્નિચર અને 24 કલાક ગેસ્ટ સર્વિસ ઉપલબ્ધ છે. ભજન સંધ્યા, પ્રવચન અને મેડિટેશન હૉલ પણ ઉપલબ્ધ છે.

ક્રૂઝની વ્યવસ્થાઃ

પ્રયાગમાં 14 જાન્યુઆરી 2019થી શરૂ થનારા કુંભમાં શ્રદ્ધાળુઓ માટે રેલ, સડક અને હવાઈ માર્ગની વ્યવસ્થા ઊભી કર્યા બાદ ક્રૂઝ પણ શરૂ કરવામાં આવી છે. ક્રૂઝ શ્રદ્ધાળુઓને કુંભની આજુબાજુના સ્થળોની સેર કરાવશે. આ માટે બધી જ તૈયારીઓ પૂર્ણ થઈ ગઈ છે. ભારતીય અંતર્દેશીય જળમાર્ગના ઉપાધ્યક્ષ પ્રવીર પાંડેયે બુધવારે જણાવ્યું, “પ્રયાગરાજ અને વારાણસી વચ્ચે મોટી બોટ અને ક્રૂઝ ચલાવવાની યોજના તૈયાર કરી દીધઈ છે. આ માટે યમુના અને ગંગા નદીમાં પાંચ અસ્થાઈ ટર્મિનલ પણ તૈયાર કરાયા છે.” આ માટે બે જહાજ સીએન કસ્તૂરબા અને એસએલ કમલા પ્રયાગરાજ પહોંચી ચૂક્યા છે. સીએલ કસ્તૂરબાની ક્ષમતા 150 યાત્રીઓની છે. બંનેનો ઉપયોગ કુંભ દરમિયાન યાત્રીઓના પરિવહન માટે કરવામાં આવશે. આ સાથે જ અંગત ક્રૂઝ અને મોટી બોટ પણ લાયસન્સ લઈને ગંગા-યમુના નદીમાં ચાલશે.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat http://bit.ly/2SoNZUW