31 ડિસેમ્બર સુધીમાં HSRP નખાવવાની મુદ્દતને સરકારે ફરી લંબાવી

એક મહિનો લંબાઈ મુદ્દત

અમદાવાદ: તમામ વાહનોમાં હાઈ સિક્યોરિટી રજિસ્ટ્રેશન પ્લેટ નખાવવાની મુદ્દતને લંબાવવામાં આવી છે. જુની મુદ્દત પ્રમાણે 31 ડિસેમ્બર 2018 સુધીમાં HSRP નખાવવી ફરજિયાત હતી, પરંતુ હવે 31 જાન્યુઆરી 2018 સુધીમાં કોઈપણ વાહનમાં HSRP નખાવી શકાશે. ઉલ્લેખનીય છે કે, 31 ડિસેમ્બર 2017 સુધીમાં સરકારે HSRP ફરજિયાત બનાવવાનો નિયમ કર્યો હતો, પરંતુ એક વર્ષ બાદ પણ તેની મુદ્દત વધારવી પડી છે.

સાતમી વાર તારીખ લંબાવાઈ

રાજ્યમાં હજુય લાખો વાહનોમાં HSRP નાખવાની બાકી હોવાથી સાતમી વાર તેની મુદ્દત લંબાવવાની સરકારને ફરજ પડી છે. છેલ્લે 31 ઓગસ્ટની મુદ્દતને 31 ડિસેમ્બર 2018 સુધી લંબાવવામાં આવી હતી. જોકે, ચાર મહિના પછી પણ હજુય અનેક વાહનોમાં HSRP ઈન્સ્ટોલ કરવાની બાકી છે. જેના માટે 1 મહિનાનો વધારાનો સમય અપાયો છે.

ડીલરો 500 રુપિયા લે છે

હાલની તારીખે અમદાવાદ આરટીઓમાં જૂના વાહનોમાં HSRP નખાવવા માટે કાયમ ભીડ રહે છે. આમ તો ખાનગી ડીલરોને પણ તેનું કામ અપાયું છે, પરંતુ આરટીઓમાં જે કામ રુ. 140માં થાય છે તેના માટે ડીલરને ત્યાં 500 રુપિયા ખર્ચવા પડે છે. RTO દ્વારા સોસાયટીઓમાં કેમ્પ કરીને પણ HSRP નાખવાની જાહેરાત કરાઈ છે, પરંતુ તેને મોળો પ્રતિસાદ મળ્યો છે.

HSRPની ક્વોલિટી સામે સવાલ

જે વાહનચાલકો પોતાના જૂના વાહનોમાં HSRP નખાવી રહ્યા છે તે તેની ક્વોલિટીને લઈને પણ સવાલ ઉઠાવી રહ્યા છે. જૂના વાહનોની નંબર પ્લેટને વર્ષો સુધી કંઈ નહોતું થતું, પરંતુ નવી નંબર પ્લેટ હાથથી પણ થોડું જોર કરતો તો વળી જાય તેવી છે. નાના અકસ્માતમાં પણ જો નંબર પ્લેટ ડેમેજ થઈ જાય તો ફરી નખાવવી પડે છે.

ફી ભરવા RTO ધક્કો ખાવો પડે છે

આરટીઓ દ્વારા મોટાભાગની કામગીરીને ઓનલાઈન કરી દેવાઈ છે, પરંતુ HSRPની ફી ભરવા હજુય આરટીઓનો ધક્કો ખાવો જ પડે છે. ફી ભરવામાં પણ મોટાભાગે લાંબી લાઈન હોવાથી લોકોનો સમય બગડે છે. ફી ભર્યા બાદ અઠવાડિયામાં નંબર પ્લેટ તૈયાર થયાનો મેસેજ મળે છે, અને પછી ઓનલાઈન અપોઈન્ટમેન્ટ લઈ નંબર પ્લેટ નખાવવા જવું પડે છે.

from Page Array – I Am Gujarat http://bit.ly/2Am3Cp5