હવે દિલ્હીમાં પણ રાજ કરશે ગુજરાતનું અમૂલ દૂધ, આ ડેરીનો કરશે ઉપયોગ

અમૂલ હવે દિલ્હીમાં વધુ મજબૂત બનશે

પ્રશાંત રુપેરા, વડોદરાઃ ગુજરાત કો-ઓપરેટિવ મિલ્ક માર્કેટિંગ ફેડરેશન(GCMMF) ઉર્ફે આપણે જેને અમૂલના નામથી ઓળખીએ છે ગુજરાતની આ ડેરીએ દિલ્હી મિલ્ક સ્કિમ(DMS)નું ટેન્ડર પોતાના ફાળે મેળવીને દેશના પહેલા રાષ્ટ્રપતિ રાજેન્દ્ર પ્રસાદ દ્વારા 1959માં શરુ કરવામાં આવેલ ડેરી યુનિટના સંચાલનને પોતાના હાથમાં લીધું છે. કેન્દ્રીય એગ્રિકલ્ચર વિભાગ દ્વારા DMSના 30 વર્ષની લીઝ પર આપવા માટે પ્રપોઝલ માગવામાં આવી હતી. જેમાં અમૂલ અને નેશનલ ડેરી ડેવલોપેન્ટ બોર્ડની માલિકીની મધર ડેરી વચ્ચે સ્પર્ધા હતી.
અમારા ન્યૂઝ Whatsapp પર મેળવવા અહીં ક્લિક કરો

મધર ડેરીને હંફાવી અમૂલે માર્યું મેદાન

જોકે ટેન્ડર ખોલવાની પ્રક્રિયામાં મધર ડેરી દ્વારા વાર્ષિક રુ.42.2 કરોડ રુપિયા DMSના પ્લાન્ટ, મિલ્ક કલેક્શન સેન્ટર અને બુથ સહિતના રિટેલ નેટવર્કના વપરાશ પેટે ચુકવવા ઓફર કરી હતી. જ્યારે અમૂલની ઓફર તેના કરતા થોડી વધુ રુ. 42.3 કરોડ રુપિયાની હતી. જેથી અમૂલના ફાળે આ ટેન્ડર આવ્યું હતું. હવે DMSને ઓપરેટ અને મનેજ કરવા પેટે અમૂલ વર્ષે 42.3 કરોડ રુપિયા લીઝ પેટે ચૂકવશે. જે દર વર્ષે 6-7 ટકા વધશે. DMSની જગ્યા, બિલ્ડિંગ અને બ્રાન્ડ સરકારના જ રહેશે પણ અમૂલ ફક્ત તેને મેનેજ કરશે.

DMSની અબજોની સંપત્તિ 30 વર્ષ માટે અમૂલના નામે

જોકે અમૂલ માટે આ પણ ફાયદાનો સોદો છે. રાજધાની દિલ્હી અને તેના આસપાસના વિસ્તારમાં અમૂલનું દૂધ સૌથી વધુ વેચાય છે પણ જ્યારે નેટવર્કની વાત આવે ત્યારે DMS પાસે 25 એકરમાં ફેલાયેલ પ્રતિદિવસ 5 લાખ લિટરની કેપેસિટીનો મિલ્ક પ્રોસેસિંગ પ્લાન્ટ છે. તેમજ દિલ્હી અને તેની આસપાસ પાંચ મિલ્ક કલેક્શન સેન્ટર તથા 566 જેટલા બૂથ પણ છે. અમૂલ પાસે દિલ્હીમાં હાલ એક પણ મિલ્ક સેન્ટર નથી તેની સામે મધર ડેરી પાસે 1300 જેટલા મિલ્ક બૂથ છે. હવે અમૂલ DMSની મદદથી દિલ્હી પર પોતાનું પ્રભુત્વ વધુ સહેલાઈથી જમાવી શકશે.

અમૂલની આવક વધી જશે

જો કે 30 વર્ષમાં અમૂલ સરકારને ફક્ત લીઝ પેટે જ કુલ રુ. 3400 કરોડ ચૂકવશે. હાલ દિલ્હીમાં પ્રતિદિવસ અમૂલનું દૂધ અને ડેરી પ્રોડક્ટનું વેચાણ 35 લાખ લીટર છે. જ્યારે મધર ડેરીનું વેચાણ 30 લાખ લીટર જેટલું છે. તો DMSનું વેચાણ માત્ર 3.25 લાખ લીટર છે.