હવે શિમલાની ફેમસ ટોય ટ્રેનમાં લાગશે વડોદરામાં બનેલા એસી કોચ

નવા કોચ જમાવશે આકર્ષણ

પ્રશાંત રુપેરા, વડોદરા: કાલકાથી શિમલા જવાનું સૌથી મોટું કોઈ આકર્ષણ હોય તો તે છે ટોય ટ્રેન. અત્યાર સુધી ખખડધજ હાલતમાં રહેલી આ ટોય ટ્રેનની હવે કાયાપલટ થઈ રહી છે, અને જુના કોચનું સ્થાન નવા એસી કોચ લેવા જઈ રહ્યા છે. ગુજરાતી તરીકે ગૌરવ લેવા જેવી વાત એ છે કે, જાન્યુઆરીથી આ ફેમસ નેરોગેજ ટ્રેનમાં જોડાનારા નવા એસી કોચ વડોદરામાં બનેલા છે.

અમારા ન્યૂઝ Whatsapp પર મેળવવા માટે ક્લિક કરો

હિમવર્ષા, વરસાદનો લુત્ફ ઉઠાવી શકાશે

વડોદરાની હિંદુસ્તાન ફાઈબર ગ્લાસ વર્ક્સ નામની કંપનીએ વિસ્ટાડોમ કોચ ડિઝાઈન કર્યા છે. આ કોચની છત પણ એ રીતે બનાવાઈ છે કે કોચમાં સવાર ટુરિસ્ટ વરસાદ તેમજ હિમવર્ષાને જોઈ શકે, અને તેનો આનંદ માણી શકે. હિન્દુસ્તાન ફાઈબર ગ્લાસ વર્ક્સના સીઈઓ આશિષ પટેલના જણાવ્યા અનુસાર, ગ્લાસ સિલિંગની વિઝિબિલિટી કંટ્રોલ પણ કરી શકાય છે.

વિન્ડો પણ ખૂબ જ મોટી અને પારદર્શક

આ કોચમાં એલઈડી લાઈટ્સ તેમજ જીપીએસ બેઝ્ટ ઈન્ફોર્મેશન સિસ્ટમ પણ છે. વળી, તેની બારી પણ ખૂબ જ મોટી અને ગ્લાસની બનાવાઈ છે, જેથી ટુરિસ્ટને બહારના દ્રશ્યોનો પેનોરેમિક વ્યૂ મળે. કાલકાથી શિમલા વચ્ચે ચાલતી ટોય ટ્રેન 92 કિલોમીટરનું ડિસ્ટન્સ કવર કરે છે, જેમાં આ કોચ લાગશે. રેલવેના સૂત્રોના જણાવ્યા અનુસાર, આ કોચમાં સવાર થવા માટેની ટિકિટ 500 રુપિયાની આસપાસ હશે.

આ રુટ્સ પર છે આવા કોચ

હાલ તો આ ટ્રેનમાં આ પ્રકારનો એક જ કોચ લાગશે, પરંતુ ટૂંક જ સમયમાં વધુ કોચ પણ તેમાં જોડવામાં આવશે. હાલ દાર્જિલિંગ હિમાલયન રેલવે લાઈન પર આ પ્રકારનો એક કોચ છે, જેમાં ગ્લાસની છત છે. આ ઉપરાંત, મુંબઈ-ગોવા , વિશાખાપટ્ટનમન-અરાકુ વેલી વચ્ચે દોડતી બ્રોડ ગેજ ટ્રેનમાં પણ આવા કોચ લગાવાયા છે.

કુલ 100 કોચનો પ્લાન

ભારતીય રેલવે પ્રવાસીઓને આકર્ષવા પસંદગીના રુટ્સ પર આ પ્રકારના 100 સુપર લક્ઝી ગ્લાસ-રુફ્ડ વિસ્ટાડોમ કોચ લગાવવાનું આયોજન કરી રહી છે. જેના માટે પણ વડોદરાની હિન્દુસ્તાન ફાઈબર ગ્લાસ વર્ક્સ બીડિંગ કરશે તેમ કંપનીના સૂત્રોએ જણાવ્યું હતું.

from Lifestyle Tips in Gujarati, જીવનશૈલી ટીપ્સ, Daily Lifestyle Tips – Page Array – I Am Gujarat https://ift.tt/2QeeEH6