કલા વિજયરાઘવન/બૈજુ કલેશ
મુંબઈ:ટાટા સન્સના બોર્ડે મર્જર-એક્વિઝિશન ટીમની ટાટા ગ્લોબલ બેવરેજિસ દ્વારા પ્રભાત ડેરીને લગભગ ₹400 કરોડમાં ખરીદવાના પ્રસ્તાવને ફગાવી દીધો છે. સૂત્રના જણાવ્યા અનુસાર “બોર્ડને ડેરી સેક્ટરના પડકારજનક માહોલમાં બોર્ડને બિઝનેસના વિસ્તરણનો ખાસ અવકાશ દેખાયો ન હતો. બોર્ડે કંપનીને કોર બિઝનેસ પર ધ્યાન કેન્દ્રિત કરવા જણાવ્યું હતું.”
ટાટા સન્સના ચેરમેન એન ચંદ્રસેકરનની આગેવાનીમાં બોર્ડે 16 નવેમ્બરે બંને પ્રસ્તાવ પર ચર્ચા કરી હતી. અન્ય પ્રસ્તાવ જેટ એરવેઝનો હતો. જેમાં મર્જર-એક્વિઝિશન ટીમે સોદાને મંજૂરી આપતાં પહેલાં એરલાઇનના ડ્યૂ ડિલિજન્સ રિપોર્ટની માંગણી કરી હતી. સૂત્રએ જણાવ્યું હતું કે, “અન્ય સેગમેન્ટ્સમાં લીડરશિપની તૈયારી કરતાં પહેલાં ટાટા ગ્લોબલ બેવરેજિસે ચાનો મુખ્ય બિઝનેસ સુદૃઢ કરવો જરૂરી છે. કંપની ભારત અને બ્રિટન બંનેમાં સારી કામગીરી દર્શાવવામાં સતત મુશ્કેલી અનુભવી રહી છે. ટેટલીને નંબર-1 બનાવવા કંપનીએ ઘણું કરવાની જરૂર છે.”
જેટ એરવેઝને ખરીદવાની ટાટા ગ્રૂપની યોજના અંગે બોર્ડે વિસ્તારા એરલાઇન્સ અને જેટના મર્જર પહેલાં ડ્યૂ ડિલિજન્સ રિપોર્ટ પર ચર્ચાની માંગણી કરી છે. વિસ્તારા એરલાઇન્સ ટાટા ગ્રૂપ અને સિંગાપોર એરલાઇન્સ વચ્ચેનું સંયુક્ત સાહસ છે. બોર્ડમાં ચેરમેન ઉપરાંત, વરિષ્ઠ ઇન્વેસ્ટમેન્ટ બેન્કર અને અમેરિકન PE ફંડ બેઇન કેપિટલના કન્ટ્રી હેડ અમિત ચંદ્રા, મોટા ઉદ્યોગપતિ અજય પિરામલ અને વેણુ શ્રીનિવાસન તેમજ અમેરિકામાં ભારતના ભૂતપૂર્વ એમ્બેસેડર રોનેન સેનનો સમાવેશ થાય છે. ટાટા સન્સના પ્રવક્તાએ આ બાબતે કંઈ કહેવાનો ઇનકાર કર્યો હતો.
વિશ્લેષકોના જણાવ્યા અનુસાર ટાટા ગ્લોબલ બેવરેજિસના અગાઉના એક્વિઝિશન બહુ સફળ રહ્યા નથી. પ્રભાત ડેરીનો સોદો પણ આકર્ષક જણાતો નથી. એન્ટિક સ્ટોક બ્રોકિંગના વાઇસ પ્રેસિડન્ટ (રિસર્ચ) અભિજિત કુંડુએ જણાવ્યું હતું કે, “ટાટા ગ્લોબલ બેવરેજિસ 15 વર્ષથી ચાના બિઝનેસમાં મુશ્કેલીનો સામનો કરી રહી છે. તેણે ચીન અને રશિયા જેવાં બજારોમાં બિઝનેસ બંધ કરવો પડ્યો છે. કંપનીએ ડેરી બિઝનેસમાં પ્રવેશવું હોય તો મોટી બ્રાન્ડનું એક્વિઝિશન જરૂરી છે. ડેરી ઉદ્યોગમાં અમૂલ અને મધર ડેરી સૌથી મોટી બ્રાન્ડ્સ છે અને બંને ડેરીનું સંચાલન સહકારી મંડળી દ્વારા થાય છે.”
from Page Array – I Am Gujarat https://ift.tt/2DWCSy1
No comments:
Post a Comment