અમદાવાદ: બે લોકોને મોતને ઘાટ ઉતારનારો વિસ્મય શાહ હવે દારુની મહેફિલ માણતા ઝડપાયો છે. પ્રાપ્ત વિગતો અનુસાર, વિસ્મયે તેના નજીકના દોસ્તોને પોતાના મેરેજ નિમિતે પાર્ટીમાં ઈન્વાઈટ કર્યા હતા, જેમાં દારુ પણ સર્વ કરવામાં આવ્યો હતો. વિસ્મયની મહેફિલની માહિતી મળતા ગાંધીનગર લોકલ ક્રાઈમ બ્રાંચે દરોડો પાડી વિસ્મય, તેની પત્ની અને ચાર અન્ય લોકોને ઝડપી લીધાં હતાં.
વિસ્મય પોતાના અડાલજમાં આવેલા બાલાજી કુટિર ફાર્મ હાઉસમાં પાર્ટી કરી રહ્યો હતો ત્યારે અચાનક જ પોલીસ ત્રાટકી હતી અને તેની પત્ની સહિત કુલ પાંચ લોકોને ઝડપી લીધા હતા. પોલીસને સ્થળ પરથી સાત હુક્કા, સાત બોટલ વિદેશી દારુ, આઠ બીયર ટીન અને એક મર્સિડિસ કાર સહિતનો મુદ્દામાલ જપ્ત કર્યો છે.
પોલીસ આ તમામ લોકોનું મેડિકલ પરીક્ષણ કરવા માટે ગાંધીનગર સિવિલ હોસ્પિટલ લાવી હતી. ઉલ્લેખનીય છે કે, વિસ્મયના 13 ડિસેમ્બરના રોજ લગ્ન થયા હતા, અને તેની જ તેણે પાર્ટી રાખી હતી. વિસ્મય શાહે તાજેતરમાં જ ગુજરાત હાઈકોર્ટમાં પોતાને વિદેશ હનિમૂન કરવા જવાનું હોવાથી પાસપોર્ટ આપવા વિનંતી કરી હતી, જોકે કોર્ટે ભારતમાં પણ ફરવા લાયક ઘણી જગ્યા છે તેમ કહી તેની માગણી ફગાવી દીધી હતી.
બે યુવકોના ભોગ લેનારા હિટ એન્ડ રન કેસમાં વિસ્મયને 2015માં સેશન્સ કોર્ટે દોષિત ઠેરવી તેને પાંચ વર્ષની કેદની સજા ફટકારી હતી. વિસ્મયે 24 ફેબ્રુઆરી 2013ના રોજ અકસ્માત કરી રાહુલ અને શિવમ નામના બે યુવાનોને ઉડાવી દીધા હતા. હાલ તેને સુપ્રીમ કોર્ટ તરફથી જામીન મળ્યા બાદ તે બહાર છે. વિસ્મયે જામીન માટે ટ્રાયલ કોર્ટ તેમજ હાઈકોર્ટમાં પણ અરજી કરી હતી, જેને ફગાવી દેવાઈ હતી.
from Page Array – I Am Gujarat http://bit.ly/2EMOm7S
No comments:
Post a Comment