ચોટીલાની કોર્ટમાં ઘૂસી ગયો દીપડો, લાંબી મથામણ બાદ પાંજરે પૂરાયો

કોર્ટમાં થઈ ગઈ દોડધામ

રાજકોટ: રાજ્યમાં દીપડાએ આતંક મચાવ્યો હોય તેમ આજે ચોટીલાની એક કોર્ટમાં દીપડો ઘૂસી જતા જોરદાર દોડધામ થઈ ગઈ હતી. સવારથી જ દીપડાને પાંજરે પૂરવા મથી રહેલા વનવિભાગે આખરે સાંજના સમયે દીપડાને પકડવામાં સફળતા મેળવી હતી.

કર્મચારીઓમાં મચી નાસભાગ

સુરેન્દ્રનગર જિલ્લાના ચોટીલાની કોર્ટમાં આજે દીપડો ઘૂસી ગયો હતો. કોર્ટના કર્મચારીઓ અને મુલાકાતીઓની નજરે દીપડો ચઢતા જ નાસભાગ મચી ગઈ હતી. જેના કારણે કોર્ટનું કામકાજ અટકાવી તેને બંધ કરવાની ફરજ પડી હતી.

એક કર્મચારી બિલ્ડિંગમાં ફસાયો

કોર્ટનો એક કર્મચારી પણ બિલ્ડિંગમાં ફસાઈ ગયો હતો, જેને બારીની ગ્રીલ તોડીને બચાવવામાં આવ્યો હતો. કેટલાક સ્ટાફે તો પોતાને રુમમાં બંધ કરી લીધો હતો.

જૂનાગઢથી ટીમ બોલાવાઈ

દીપડાને પકડવા માટે જૂનાગઢથી ટીમ બોલાવાઈ હતી. જેણે ખાસ્સી મથામણ બાદ સાંજે દીપડાને પાંજરે પૂરી દીધો હતો. સૌરાષ્ટ્રમાં દીપડાની વધતી જતી સંખ્યાને કારણે હવે દીપડા જંગલ વિસ્તાર છોડી રહેણાંક વિસ્તારોમાં પણ આવી રહ્યા છે. વન ખાતાના અંદાજ અનુસાર ગુજરાતમાં 1400 જેટલા દીપડા વસવાટ કરે છે.

સચિવાલયમાં પણ ઘૂસ્યો હતો દીપડો

ઉલ્લેખનીય છે કે, થોડા દિવસ પહેલા જ ગાંધીનગરમાં દીપડો સચિવાલયમાં ઘૂસી ગયો હતો, જેના કારણે આખો દિવસ સચિવાલય બંધ રાખવું પડ્યું હતું. હાલ દાહોદમાં પણ માનવભક્ષી દીપડો પકડાયો હતો.

જુઓ વીડિયો

from Page Array – I Am Gujarat https://ift.tt/2RVvHtX