જાપાનથી આવ્યા બુલેટ ટ્રેનના પાટા, વડોદરામાં પાથરી અપાશે ટ્રેનિંગ

20 ટ્રેક સ્લેબ, 200 મીટર લાંબા ટ્રેક

પ્રશાંત રુપેરા, વડોદરા: પીએમ મોદીએ ખાતમૂર્હુત કર્યાના એક વર્ષ બાદ હવે વડોદરામાં બુલેટ ટ્રેનના ટ્રેક પાથરીને તેની ટ્રેનિંગ આપવાની તૈયારીઓ શરુ થઈ ગઈ છે. જાપાનથી તેના માટે 20 ટ્રેક સ્લેબ, 200 મીટર રેલવે ટ્રેક તેમજ 13 મિલિમીટર ડાયામીટરના સળિયા વડોદરા પહોંચી ચૂક્યા છે.

પાંચ એકર જમીનમાં પથરાશે પાટા

બુલેટ ટ્રેન પ્રોજેક્ટ માટે વડોદરામાં બની રહેલી હાઈ સ્પીડ રેલ ટ્રેનિંગ ઈન્સ્ટિટ્યૂટ (HSRTI)માં જાપાનથી આવેલા બુલેટ ટ્રેનના પાટા પાથરવામાં આવી રહ્યા છે. HSRTIને વડોદરાની રેલવે યુનિવર્સિટીના જ કેમ્પસમાં પાંચ એકર જેટલી જમીન પર બનાવાઈ રહી છે.

હાઈ કેપેસિટીના ટ્રેક સ્લેબ

જાપાનથી કોંક્રિટના જે હાઈ કેપેસિટીના ટ્રેક સ્લેબ આવ્યા છે, તે શિન્કાસેન ટેક્નોલોજીથી બનાવાય છે, અને હાલ આખા વિશ્વમાં માત્ર જાપાન જ તેનું ઉત્પાદન કરે છે. ભારતમાં પણ આ જ ટેક્નોલોજીથી બુલેટ ટ્રેન બની રહી છે.

કુલ 508 કિમી લાંબો ટ્રેક બનશે

જાપાનથી બુલેટ ટ્રેન માટે જે સળીયા બનાવાયા છે, તેવા 13 મિલિમિટરના સળિયા પણ ભારતમાં હાલ કોઈ બનાવતું ન હોવાથી તેને જાપાનથી લવાયા છે. બુલેટ ટ્રેન માટે 508 કિલોમીટરનો ટ્રેક બની રહ્યો છે, આટલી લંબાઈમાં ટ્રેક પાથરવા માટે એખ લાખથી પણ વધુ ટ્રેક સ્લેબનો ઉપયોગ કરવામાં આવશે.

જાન્યુઆરી એન્ડ સુધી થશે તૈયાર

વડોદરામાં હાલ જે ટ્રેઈનિંગ ટ્રેક બનાવાઈ રહ્યો છે તે જાન્યુઆરીના મધ્ય સુધીમાં બનીને તૈયાર થઈ જાય તેવી શક્યતા છે. જાપાનના કોન્ટ્રાક્ટ વર્કર ભારતીય કામદારો સાથે તેના પર કામ કરી રહ્યા છે તેમ પ્રોજેક્ટના ચીફ મેનેજર પ્રદીપ અહીરકરે જણાવ્યું હતું.

એક ટ્રેક સીધો, બીજો વળાંકવાળો

બુલેટનું સિંગલ ટ્રેક સ્લેબ આઠ સ્લીપર્સની ક્ષમતા ધરાવે છે. વડોદરામાં હાલ 100 મીટરના બે ટ્રેઈનિંગ ટ્રેક્સ બનાવાશે. જેમાં 100 મીટરનો એક ટ્રેક બિલકુલ સીધો હશે, જ્યારે બીજો ટ્રેક વળાંકવાળો હશે. ટ્રેકની સાથે અહીં હોસ્ટેલ પણ બનાવાશે, અને ફેબ્રુઆરીથી મેનપાવર ટ્રેઈનિંગ શરુ થઈ જશે.

from Page Array – I Am Gujarat https://ift.tt/2EvIQqz