મુંબઈ:રૂપિયામાં સ્થિરતાને કારણે ભારતીય ચલણમાં હેજિંગની માંગ ઘટી રહી છે. ક્રૂડના ભાવમાં તીવ્ર ઘટાડાને કારણે રૂપિયાની વોલેટિલિટીમાં ભારે ઘટાડો નોંધાયો છે. ફોરવર્ડ પ્રીમિયમમાં ૪૫ પૈસા સુધીના ઘટાડાને કારણે હજુ મહિના પહેલાં વિદેશી કરન્સીમાં પેમેન્ટ માટે ધસારો કરનારા આયાતકારોને નુકસાન થઈ રહ્યું છે.
બ્લૂમબર્ગના ડેટા મુજબ ચાલુ વર્ષે એશિયન ચલણોમાં સૌથી વધુ ઘટેલા રૂપિયાનું પ્રદર્શન ગયા મહિને સૌથી સારું રહ્યું છે. DBS બેન્કના એક્ઝિક્યુટિવ ડિરેક્ટર અને ટ્રેડિંગ હેડ આશિષ વૈદ્યએ જણાવ્યું હતું કે, “છેલ્લા બે-ત્રણ મહિનામાં રૂપિયાની ચાલ એટલી ઝડપી રહી છે કે હેજર્સ અસરકારક લોટ સાઇઝમાં હેજિંગ કરી શક્યા નથી. તેને લીધે ઘણી કંપનીઓ મૂંઝવણમાં છે.
રૂપિયો રેકોર્ડ સ્તરે પહોંચ્યો ત્યારે આયાતકારોએ લીધેલી પોઝિશનમાં આયાતકારોને નુકસાન થઈ રહ્યું છે.” તેમણે કહ્યું હતું કે, “વૈશ્વિક પરિબળો સ્થિર રહેશે અને ડોલરમાં થોડી નબળાઈ નોંધાશે તો રૂપિયો 69-70.50ની રેન્જમાં મોટી ઊથલપાથલ નહીં દર્શાવે.”
રૂપિયો 11 ઓક્ટોબરે ડોલર સામે 74.48ની રેકોર્ડ નીચી સપાટીને સ્પર્શ્યો હતો. જોકે, નવેમ્બરમાં તે લગભગ 6 ટકા વધ્યો છે. બ્લૂમબર્ગનો એક મહિનાનો ઇમ્પ્લાઇડ વોલેટિલિટી ઇન્ડેક્સ છેલ્લા બે મહિનામાં 0.97 ટકા ઘટ્યો છે. ઇન્ડેક્સ 8 ઓક્ટોબરના 8.86 ટકાની તુલનામાં ગયા શુક્રવારે 7.89 ટકાના સ્તરે હતો. આ બાબત એક્સ્ચેન્જ રેટમાં સ્થિરતા દર્શાવે છે.
કોટક સિક્યોરિટીઝના કરન્સી એનાલિસ્ટ અનિંદ્ય બેનરજીએ જણાવ્યું હતું કે, “રૂપિયામાં કોઈને પણ ટ્રેન્ડમાં આવા અચાનક ફેરફારનો અંદાજ ન હતો.” તેમણે કહ્યું હતું કે, “આયાતકારોને બે તરફ નુકસાન થઈ રહ્યું છે: ફોરવર્ડ્સ પ્રીમિયમ અને સ્પોટ રેટ્સમાં ઘટાડો. કેટલાકે હેજિંગ કોન્ટ્રાક્ટ્સ સુલટાવી ખોટ બૂક કરી હશે, જ્યારે અન્ય કેટલાકને વર્તમાન સ્તરે કાગળ પર નુકસાન થઈ રહ્યું છે.” જેમ કે, રૂપિયો ડોલર સામે 74.48ની રેકોર્ડ નીચી સપાટીને સ્પર્શ્યો એ પહેલાં 10 ઓક્ટોબરથી 12 મહિનાના ફોરવર્ડ કોન્ટ્રાક્ટનું પ્રીમિયમ લગભગ 45 પૈસા ઘટ્યું છે. એવી રીતે સમાન ગાળામાં બે-ત્રણ મહિનાના કોન્ટ્રાક્ટના પ્રીમિયમમાં 10-25 પૈસાનો ઘટાડો નોંધાયો છે.
કરન્સી હેજિંગ કરનારી કંપની ઓવર-ધ-કાઉન્ટર ફોરવર્ડ્સ માર્કેટ અથવા એક્સ્ચેન્જ ટ્રેડેડ ફ્યુચર્સમાંથી કોન્ટ્રાક્ટ ખરીદે છે. કાર્યકારી સરળતાને કારણે ફોરવર્ડ્સ માર્કેટ વધુ પ્રચલિત છે. ફોરવર્ડ્સ માર્કેટના પ્રીમિયમમાં ઘટાડો નોંધાયો છે, જે માંગમાં ઘટાડો સૂચવે છે. સ્ટાન્ડર્ડ ચાર્ટર્ડ બેન્કના ઇન્ડિયા ફાઇનાન્શિયલ માર્કેટ્સના એમડી ગોપાલક્રિષ્નન એમ એસના જણાવ્યા અનુસાર “રૂપિયો નવેમ્બરની શરૂઆત સુધી ઘટી રહ્યો હતો. ત્યારની તુલનામાં અત્યારે આયાતકારોની હેજિંગ એક્ટિવિટી પ્રમાણમાં ઓછી છે.” સ્ટાન્ડર્ડ ચાર્ટર્ડ બેન્કના મતે ક્રૂડના ભાવમાં ઘટાડો રૂપિયાની મજબૂતાઈનું મહત્ત્વનું કારણ છે.
from Page Array – I Am Gujarat https://ift.tt/2Sq7lsh
No comments:
Post a Comment