NIIT ટેક્‌નોને ખરીદવા માટે આવતા સપ્તાહે પ્રથમ રાઉન્ડ

66919561

ઇન્દુલાલ પીએમ/અરિજિત બર્મન

મુંબઈ:NIIT ટેક્‌નોલોજિસને ખરીદવામાં બેઇન કેપિટલ, બ્લેકસ્ટોન, કાર્લાઇલ, એપાક્સ પાર્ટનર્સ અને એડ્વન્ટ સહિતના પ્રાઇવેટ ઇક્વિટી (PE) ફંડ્સને રસ પડ્યો હોવાથી આ સોદાની પ્રક્રિયાએ વેગ પકડ્યો છે એમ પરિચિત લોકોએ જણાવ્યું હતું.

NIITના સ્થાપક પ્રમોટર્સ તેમનો હિસ્સો વેચવા માંગે છે અને આવતા સપ્તાહે બિન-બંધનકર્તા ઓફર્સનો પ્રથમ રાઉન્ડ યોજાવાનો છે એમ આ સૂત્રોએ જણાવ્યું હતું. ટેક મહિન્દ્રા જેવી સ્થાનિક કંપનીઓનો પણ સંપર્ક સાધવામાં આવ્યો છે, જોકે આ નામ માટે સ્વતંત્ર રીતે પુષ્ટિ મળી શકી નહોતી. ટેક મહિન્દ્રાએ આ વાતને રદિયો આપ્યો હતો.

ભારતમાં કોમ્પ્યુટર કોચિંગ અને IT ટ્રેઇનિંગ ક્ષેત્રનો પાયો નાખનાર NIIT લિની લિસ્ટેડ ટેક્‌નોલોજી સર્વિસિસ કંપની NIIT ટેક્‌નોલોજિસની સ્થાપના રાજેન્દ્ર સિંઘ પવાર અને વિજય થાડાણીએ કરી હતી. કુલ 30.61 ટકા હિસ્સો વેચવા માટે મૂકનાર NIIT ટેક્‌નોલોજિસનો 23.54 ટકા હિસ્સો પેરન્ટ NIIT લિ પાસે છે. આ સોદાથી તેનો વધુ 26 ટકા હિસ્સો ખરીદવા માટે ખરીદદારે ફરજિયાતપણે ઓપન ઓફર કરવાની થશે, જેથી નવા માલિકે આ કંપનીનો 51 ટકાથી પણ વધારે હિસ્સો ખરીદવાનો આવશે.

શુક્રવારના બંધ ભાવ પ્રમાણે, NIIT ટેક્‌નોનું માર્કેટ કેપિટલાઇઝેશન ₹6,725.32 કરોડ છે. તેનો શેર છેલ્લાં ત્રણ વર્ષમાં 90 ટકા વધ્યો છે અને એક વર્ષમાં તો 70 ટકા વધ્યો છે, જેની સામે બેન્ચમાર્ક સેન્સેક્સ માત્ર 9.2 ટકા વધ્યો છે. આથી, કંપનીના સ્થાપકોએ હિસ્સો ઊંચા ભાવે વેચીને મહત્તમ કમાણી કરવાનો નિર્ણય લીધો છે એમ ઉપરોક્ત માહિતી આપનાર લોકોએ જણાવ્યું હતું. ખરીદદાર શોધવાની ઔપચારિક પ્રક્રિયા ચલાવવાની જવાબદારી ક્રેડિટ સુઇસને સોંપવામાં આવી છે.

“આઇટી સેક્ટરના તેજીમય મૂડને ધ્યાનમાં રાખીને અને શેરના ભાવમાં થયેલા વધારાનો લાભ લેવા માટે કેટલાક ભાગીદારોએ હિસ્સો વેચવાના વિકલ્પો ચકાસ્યા છે. તેઓ કંપનીનું સંચાલન પ્રોફેશનલ મેનેજમેન્ટના વડપણ હેઠળ કરાવવા માંગે છે.” એમ સૂત્રોએ જણાવ્યું હતું. કંપનીએ ટિપ્પણી કરવાનો ઇનકાર કર્યો હતો. NIIT ટેક્‌નોના પ્રવક્તાએ કહ્યું હતું કે, “ઘણાં વર્ષોથી આવી અફવાઓ આવતી રહે છે. અત્યારે ટિપ્પણી કરવા લાયક અમારી પાસે કશું નથી.”

from Page Array – I Am Gujarat https://ift.tt/2PftYxy