સેમસંગની આવક વધી પણ ચાઈનીઝ હરીફોને લીધે નફો 11% ઘટ્યો

67361150

વૃતાંકર મુખરજી

કોલકાતા: સેમસંગ ઇન્ડિયાએ ચીનની હરીફ કંપનીઓ સાથે સ્પર્ધામાં આગળ રહેવા માટે નીચા ભાવે ફોન લોન્ચ કર્યા હોવાથી નાણાકીય વર્ષ 2017-’18માં તેનો નેટ પ્રોફિટ 11 ટકા જેટલો ઘટ્યો હતો, પરંતુ આવક 10 ટકા વધીને ₹60,000 કરોડના આંકને વટાવી ગઈ હતી.

દક્ષિણ કોરિયાની આ મહાકાય કંપનીએ ગયા નાણાકીય વર્ષની વિગતો રજિસ્ટ્રાર ઓફ કંપનીઝ (RoC)માં જમા કરાવી છે પરંતુ તેના નેટ પ્રોફિટમાં ઘટાડા માટે કોઈ પરિબળ જવાબદાર ગણાવ્યું નથી પરંતુ ઉદ્યોગજગતનાં બે સિનિયર એક્ઝિક્યુટિવ્સના મતે, સેમસંગે શાઓમી, ઓપ્પો, વિવો અને વનપ્લસને સ્પર્ધા આપવા માટે માર્જિન નીચા રાખીને આક્રમક ભાવે સ્માર્ટફોન લોન્ચ કરવા પર ફોકસ કર્યું હોવાથી તેની નફાકારકતા પર અસર પડી હતી.

2017-’18માં સેમસંગની કુલ આવક ₹61,065.6 કરોડ થઈ હતી જે અગાઉના 2016-’17ના વર્ષની ₹55,511.9 કરોડની આ‌વક કરતાં વધારે છે જ્યારે નેટ પ્રોફિટ 10.7 ટકા ઘટીને ₹3,712.7 કરોડ થયો હતો. સેમસંગ ઇન્ડિયાને આ અંગે મોકલેલી ઇ-મેઇલ પ્રશ્નોત્તરીનો બુધવારે મોડી સાંજ સુધી કોઈ જવાબ મળ્યો નહોતો.

વિશ્વની સૌથી મોટી હેન્ડસેટ ઉત્પાદક ગણાતી સેમસંગે ભારતમાં તેના મોબાઇલ ફોન બિઝનેસમાં સતત વૃદ્ધિ કરી હોવાથી આ બિઝનેસની આવક 37 ટકા વધીને ₹37,349 કરોડ થઈ હતી અને ભારતના સ્માર્ટફોન માર્કેટમાં તેની રેવન્યુ લીડ જળવાઈ રહી હતી.

હરીફ શાઓમીએ 2017-’18માં ₹22,947 કરોડની આવક નોંધાવી હતી જ્યારે ઓપ્પો મોબાઇલ્સ ઇન્ડિયાએ ₹11,994 કરોડ અને વિવો મોબાઇલ ઇન્ડિયાએ ₹11,179 કરોડની આવક નોંધાવી હતી. એપલ ઇન્ડિયાની 2017-’18ની આવક ₹13,097 કરોડ હતી.

ગયા નાણાકીય વર્ષમાં સેમસંગને મોબાઇલ બિઝનેસમાંથી થતો ચોખ્ખો નફો ₹3,474.1 કરોડથી ઘટીને ₹3,415.9 કરોડ થયો હતો છતાં તે ભારતમાં સૌથી વધુ નફો કરતી કન્ઝ્યુમર ઇલેક્ટ્રોનિક્સ અને સ્માર્ટફોન કંપની તરીકે યથાવત્ સ્થાને રહી હતી. શાઓમી, સોની, LG અને હુઆવી જેવી હરીફ કંપનીઓ નફો કરે છે પરંતુ આ તમામ કંપની સેમસંગ કરતાં ઘણી પાછળ છે જ્યારે ઓપ્પો અને વિવો તો ખોટ કરે છે.

જોકે, સેમસંગનો ટીવી બિઝનેસ ગયા નાણાકીય વર્ષમાં ઘટ્યો હતો અને તેનું વેચાણ 3 ટકા ઘટીને ₹4,512 કરોડ થયું હતું, પરંતુ ગ્રોસ પ્રોફિટ 88 ટકા વધીને ₹222 કરોડ થયો હતો. ટેલિવિઝન ઉદ્યોગના એક્ઝિક્યુટિવ્સ તીવ્ર સ્પર્ધાને અને 32 ઇંચના સેગમેન્ટમાં વેચાણ પર અસર થવાથી સેમસંગનું એકંદર વેચાણ ઘટ્યું હોવાનું જણાવે છે.

ભારતના કુલ ટીવી માર્કેટમાં ૩૨ ઇંચના સેગમેન્ટનો હિસ્સો 50 ટકા જેટલો છે. ટીવી માર્કેટમાં સેમસંગને Vu, BPL, શાઓમી અને થોમ્સન જેવી કંપનીઓ તરફથી તગડી સ્પર્ધા મળી રહી છે. સેમસંગે હવે ઊંચું માર્જિન ધરાવતા અને મોટા કદના ટીવી પર ધ્યાન કેન્દ્રિત કર્યું છે.

from Page Array – I Am Gujarat http://bit.ly/2FawLqy