B’day Special : …જ્યારે કપિલ દેવે દાઉદ ઈબ્રાહિમને ડ્રેસિંગ રૂમમાંથી બહાર કાઢ્યો!

ભારતને પ્રથમ વર્લ્ડ અપાવનારો કેપ્ટન

ભારતને પ્રથમ ક્રિકેટ વર્લ્ડ કપ અપાવનારા મહાન ઑલરાઉન્ડર અને પૂર્વ કેપ્ટન કપિલ દેવનો આજે 60મો જન્મદિવસ છે. 6 જાન્યુઆરી 1959ના રોજ ચંડીગઢમાં જન્મેલા કપિલે ક્રિકેટના મેદાન પર અનેક કમાલ કરી છે પણ આજે અમે તમને તેમની નિડરતાનો એક રસપ્રદ કિસ્સો જણાવી રહ્યાં છીએ જેના વિશે તમને ભાગ્યે જ ખબર હશે.

1987માં બન્યો હતો આ કિસ્સો

આ કિસ્સાને ‘શારજાહ ડ્રેસિંગ રૂમ કાંડ’ના નામે ઓળખવામાં આવે છે. 1987માં શારજાહ ટૂર્નામેન્ટમાં ભારત અને પાકિસ્તાન વચ્ચે મેચ રમાવાની હતી. આગામી દિવસે પ્રેક્ટિસ પૂરી કરી ભારતીય ટીમ ડ્રેસિંગ રૂમમાં પહોંચી. ત્યારે જાણીતા કૉમેડિયન મેહમૂદ પોતાની સાથે એક એવા શખસને લઈને આવ્યા જેને દિલીપ વેંગસરકર સિવાય કોઈ ઓળખી ન શક્યું.

જ્યારે ભારતીય ડ્રેસિંગ રૂમમાં આવ્યો દાઉદ

તે શખસ હતો અન્ડરવર્લ્ડ ડોન દાઉદ ઈબ્રાહિમ. તે જમાનામાં દાઉદની ગણતરી સ્મગલર્સમાં થતી હતી. મહેમૂદે ખેલાડીઓ સાથે દાઉદનો પરિચય કરાવતા કહ્યું કે, આ મારો છે અને અહીં જ બિઝનેસ કરે છે. મહેમૂદે ખેલાડીઓને કહ્યું કે, દાઉદ તેમને એક ઑફર આપવા માગે છે.

ક્રિકેટર્સને આપી આવી ઑફર

ત્યારબાદ દાઉદે પોતાની વાત રજૂ કરતા કહ્યું કે, ‘જો આવતીકાલે થનારી મેચમાં ભારતીય ટીમ પાકિસ્તાનને હરાવી દે તો તે તમામ ખેલાડીઓને એક-એક ટોયોટા કોરોલા કાર ગિફ્ટ આપશે.’ ઑફર સાંભળતા જ તમામ ક્રિકેટર્સ એકબીજાની સામે જોવા લાગ્યા. આવામાં કપિલ દેવ પ્રેસ કૉન્ફરન્સ ખતમ કરીને ડ્રેસિંગ રૂમમાં આવ્યો.

કપિલ દેવે કહ્યું, ‘ચલ નીકળ…’

તેમણે પહેલા મહેમૂદને કહ્યું કે – તમે બહાર નીકળી જાઓ. પછી તેમણે દાઉદને જોઈને કહ્યું – આ કોણ છે. ચલ બહાર નીકળ ચલ. કપિલનો જવાબ સાંભળતા જ દાઉદ ડ્રેસિંગ રૂમમાંથી બહાર નીકળી ગયો.

વેંગસરકરે કર્યો ખુલાસો

બાદમાં 1999માં કપિલ દેવનું નામ મેચ ફિક્સિંગમાં આવ્યું હતું પણ બાદમાં આ આરોપોને ફગાવી દેવાયા હતા. 2013માં દિલીપ વેંગસરકરે પહેલીવાર આ વાતને સાર્વજનિક કરી હતી.

આવું રહ્યું કેપ્ટનનું કરિયર

જણાવી દઈએ કે, કપિલ દેવે 131 ટેસ્ટની 184 ઈનિંગમાં 5248 રન બનાવ્યા હતા જેમાં 27 અર્ધ સદી અને 8 સદી શામેલ છે. જ્યારે 225 વન-ડેની 198 ઈનિંગ્સમાં 3783 રન બનાવ્યા જેમાં 14 અર્ધ સદી અને 1 સદી શામેલ છે. આ ઉપરાંત તેમણે 434 ટેસ્ટ અને 250થી વધુ વન-ડે વિકેટ ઝડપી છે.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2H1NWwX