પિતાની હાર્ટ સર્જરી ચાલી રહી હતી, પૂજારા ઑસ્ટ્રેલિયા સામે અડીખમ ઊભો હતો

સિડનીમાં ચેતેશ્વર પૂજારાની યાદગાર ઈનિંગ

સિડની: ભારતની નવી ‘દિવાલ’ તરીકે જાણીતા બેટ્સમેન ચેતેશ્વર પૂજારાએ ઑસ્ટ્રેલિયા સામે ચોથી ટેસ્ટમાં શાનદાર સદી ફટકારી. તે 7 રન માટે બેવડી સદી ચૂકી ગયો પણ તેની આ ઈનિંગે ભારતને મેચમાં મજબૂત સ્થિતિમાં લાવી દીધી. બધા તેની આ ઈનિંગની પ્રશંસા કરી રહ્યાં છે પણ બહુ ઓછા લોકો જાણતા હશે કે, જ્યારે પૂજારા બેટિંગ કરી રહ્યો હતો ત્યારે તેના પિતા હોસ્પિટલમાં એડમિટ હતા.

પિતા હોસ્પિટલમાં, ચેતેશ્વર મેદાન પર

મીડિયા રિપોર્ટ્સ અનુસાર ચેતેશ્વર પૂજારાના પિતા અરવિંદને હૃદયની બીમારી છે અને આને કારણે તેમને હોસ્પિટલમાં ભરતી કરવામાં આવ્યા હતા. ચેતેશ્વરની પત્ની પૂજા પોતાના સસરાને લઈ મુંબઈની હોસ્પિટલમાં પહોંચી હતી. સિડની ટેસ્ટના પ્રથમ દિવસે જ્યારે ચેતેશ્વર સદી તરફ વધી રહ્યો હતો ત્યારે બીજી બાજુ તેના પિતા હોલી ફેમિલી હોસ્પિટલના રસ્તા પર હતા.

પિતા પાસેથી મેળવ્યું કોચિંગ

ઉલ્લેખનીય છે કે, ચેતેશ્વર જ્યારે 7 વર્ષનો હતો ત્યારથી તેના પિતા તેને કોચિંગ આપતા હતા. તેના પિતા જ તેના પ્રથમ કોચ રહ્યાં છે. પુત્રને કોચિંગ આપી આ સ્તરે પહોંચાડનારા અરવિંદ ક્યારેય પોતાના દીકરાને બેટિંગ કરતો જોવાની તક ચૂકતા નથી, જોકે, આ વખતે વાત અલગ હતી. જ્યારે પૂજારા સેન્ચુરી ફટકારી ત્યારે હોસ્પિટલમાં તેના પિતાની તપાસ ચાલી રહી હતી. તે પુત્રની બેટિંગ તો નહોતા જોઈ શક્યા પણ સતત સ્કોરની અપડેટ લઈ રહ્યાં હતા.

પુત્રના પ્રદર્શનથી પિતા ખુશ

સર્જરી બાદ અરવિંદે કહ્યું કે, ‘હું સાંભળી રહ્યો હતો કે, કેવી રીતે દુનિયાભરમાં તેની પ્રશંસા થઈ રહી છે. કોઈના મનમાં તેના બેટિંગ માટે કોઈ શંકા હશે તો તે હવે દૂર થઈ ગઈ હશે. હું હોસ્પિટલથી ઘરે જઈને તેની બેટિંગની રેકોર્ડિંગ જોઈશ.’

ચેતેશ્વર સાથે ચર્ચા બાદ કરાયા એડમિટ

ચેતેશ્વરની વાઈફ પૂજાએ કહ્યું કે, પહેલા દિવસના પહેલા સેશન બાદ અમે રાજકોટથી મુંબઈની ફ્લાઈટ પકડી. જ્યારે અમે મુંબઈ પહોંચ્યા ત્યારે ચેતેશ્વર સદીની નજીક પહોંચી રહ્યો હતો. ચેતેશ્વરને પિતાની તબિયત વિશે ખબર હતી અને તેની સાથે વિચાર-વિમર્શ કર્યા બાદ જ પિતાને મુંબઈ લઈ જવાયા હતા.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2AwZUsO