સુરત: સાંઈબાબાના દર્શન કરી રહેલી મહિલાનો અકસ્માતમાં ચમત્કારિક બચાવ

મહિલાનો ચમત્કારિક બચાવ

યજ્ઞેશ મહેતા, સુરત: શહેરના ઉધના વિસ્તારમાં બનેલી એક ચોંકાવનારી ઘટનામાં કચરાની ગાડી નીચે આવી ગયેલી મહિલાનો ચમત્કારિક બચાવ થયો છે. રવિવારે સવારે બનેલી આ ઘટનામાં મહિલા રસ્તા પર ઉભી રહીને મંદિરના દર્શન કરી રહી હતી ત્યારે રિવર્સમાં આવી રહેલી કચરાની ગાડી તેના પર ચઢી ગઈ હતી.

સીસીટીવીમાં કેદ થઈ ઘટના

પ્રાપ્ત વિગતો અનુસાર, અકસ્માતમાં ચમત્કારિક રીતે બચી જનારી મહિલાનું નામ રમીલાબેન સોલંકી હતું, અને તેઓ સુરત મ્યુનિસિપલ કોર્પોરેશનમાં સફાઈ કામદાર તરીકે ફરજ બજાવે છે. આ સમગ્ર ઘટના સીસીટીવીમાં કેદ થઈ ગઈ હતી, જેમાં સ્પષ્ટ જોઈ શકાય છે કે, ગાડીએ તેમને અડફેટે લીધા બાત આખી તેમના પરથી પસાર થઈ ગઈ હતી.

સાંઈબાબાએ બચાવી લીધી: રમીલાબેન

જોકે, કચરાની ગાડી રમીલાબેન પરથી પસાર થઈ જવા છતાંય તેઓ જાતે જ ઉભાં થઈ ગયાં હતાં. રમીલાબેનને માત્ર સામાન્ય ઈજા થઈ છે. આ ઘટના બની ત્યારે તેઓ સાંઈબાબાના મંદિરના દર્શન કરી રહ્યા હતા. તેમણે જણાવ્યું હતું કે, સાંઈબાબાએ જ તેમનો ચમત્કારિક બચાવ કર્યો છે.

રસ્તા પર ઉભાં રહી દર્શન કરી રહ્યાં હતાં

આ ઘટના રવિવારે સવારે આઠ વાગ્યે બની હતી, રમીલાબેન ઉધના વિસ્તારમાંથી પસાર થતાં હતાં ત્યારે બીઆરસી ગેટ પાસેના મંદિરના દર્શન કરવા તેઓ રસ્તા પર જ ઉભાં રહી ગયાં હતાં, અને ચપ્પલ કાઢી દર્શન કરી રહ્યાં હતાં. તેઓ હાથ જોડી ભગવાનને પ્રાર્થના કરી રહ્યાં હતાં ત્યારે જ કચરાની ગાડી તેમના પર ચઢી ગઈ હતી.

ડ્રાઈવરને ખબર જ ન પડી

ગાડીની ટક્કર વાગવાથી રમીલાબેન નીચે પડી ગયાં હતાં. જોકે, ડ્રાઈવરને તેની ખબર જ નહોતી અને તેણે ગાડી ચલાવવાનું ચાલુ રાખ્યું હતું. આખી ગાડી પસાર થઈ ગયાં બાદ રમીલાબેન જાતે જ ઉભાં થઈ ગયાં હતાં.

જુઓ વીડિયો

from Page Array – I Am Gujarat http://bit.ly/2QrtNzV