ડ્રાઈવિંગ લાઈસન્સને આધાર સાથે લિંક કરવાનું ફરજિયાત બનાવશે સરકાર

બેન્ક એકાઉન્ટ બાદ ડ્રાઈવિંગ લાઈસન્સનો વારો

ફગવાડાઃ બેન્ક એકાઉન્ટ સાથે આધાર કાર્ડ લિંક કર્યા બાદ હવે ટૂંક જ સમયમાં સરકાર ડ્રાઈવિંગ લાઈસન્સને પણ આધારકાર્ડ સાથે જોડવાની કવાયત કરી રહી છે. કેન્દ્રીય મંત્રી રવિશંકર પ્રસાદે જણાવ્યું હતું કે, સરકાર ટૂંક સમયમાં ડ્રાઈવિંગ લાઈસન્સ-આધાર લિંક કરવાને ફરજિયાત બનાવી શકે છે. આધાર કાર્ડના ફરજિયાતપણાને લઈને અગાઉ પણ ભારે વિવાદ થયો હતો. જેને લઈને સરકારને કેટલીક શરતો પર સુપ્રીમ કોર્ટમાંથી લીલી ઝંડી મળી હતી.

અમારા ન્યૂઝ WhatsApp પર મેળવવા માટે અહીં ક્લિક કરો

આવી રહ્યો છે આવો કાયદો

ઈન્ડિયન સાઈન્સ કોંગ્રેસમાં કેન્દ્રીય કાયદામંત્રી રવિશંકરે ઉમેર્યું હતું કે, આવનારા થોડા સમયમાં એક કાયદો લાગુ થશે જે આઘારકાર્ડ-ડ્રાઈવિંગ લાઈસન્સ લિંકિંગને ફરજિયાત બનાવશે. અત્યાર સુધી એવું બનતું આવ્યું છે કે, અકસ્માતને અંજામ આપીને શખસો ભાગી જાય છે અને બીજું ડ્રાઈવિંગ લાઈસન્સ કઢાવી લે છે. આમ તે બચી જાય છે. પણ આધાર સાથેના જોડાણ બાદ વ્યક્તિ નામ તો બદલી શકે છે પણ બાયોમેટ્રિક્સ બદલી નહીં શકે. આંગળીઓના નિશાન બદલી નહીં શકે.

આ રીતે કામ કરશે સિસ્ટમ

જો કોઈ વ્યક્તિ પોતાનું બીજું લાઈસન્સ કઢાવશે ત્યારે સિસ્ટમ તેને એલર્ટ કરશે કે, આ વ્યક્તિનું અગાઉથી લાઈસન્સ છે અને બીજા કાર્ડ માટે મંજૂરી આપવામાં ન આવે. ડિજિટલ ઈન્ડિયા પ્રોગ્રામ અંતર્ગત મંત્રીએ દાવો કર્યો હતો કે, ડિજિટલ માધ્યમથી શહેર અને ગ્રામ્ય વિસ્તારો વચ્ચેનું અંતર ઘટી જશે. દેશની ડિજિટલ પ્રોફાઈલ અપડેટ થઈ રહી છે. 123 કરોડ આધાર કાર્ડ, 121 કરોડ મોબાઈલ ફોન, 44.6 કરોડ સ્માર્ટફોન, 56 કરોડ ઈન્ટરનેટ યુઝર્સ, ઈ-કોમર્સમાં 51 ટકા તેજી પ્રવર્તી રહી છે. દેશમાં ડિજિટલ ટ્રાંઝેક્શનની સંખ્યામાં દિનપ્રતિદિન વધારો થઈ રહ્યો છે.

 

from I Am Gujarat http://bit.ly/2AAjZyp