ક્રૂડ ઘટ્યું છતાં એવિએશન ઉદ્યોગને રાહત મળે તેવી શક્યતા ઓછી

67419633

બીરજુ શાહ

અમદાવાદ:તહેવારોમાં કોઈ દુકાનમાં ઘરાકી ના હોય એનો અર્થ એ થયો કે ગ્રાહક પાસે પૈસા નથી એટલે મંદી છે અથવા દુકાનદાર પાસે એવો માલ નથી જે ગ્રાહકને જોઈએ છે કે પછી દુકાનદારની સર્વિસ સારી નથી. બસ એવિએશન ઉદ્યોગની સ્થિતિ પણ દુકાનદાર જેવી જ છે. આ વર્ષે તહેવારોની સીઝનમાં એવિએશન ઉદ્યોગે છેલ્લાં સાડા ચાર વર્ષનો સૌથી નીચો પેસેન્જર ટ્રાફિક જોયો છે. જેનો અર્થ એ થયો કે ઉદ્યોગ મંદીમાં છે અથવા તેઓની સર્વિસ કથળી ગઈ છે કે પછી ગ્રાહકોને પરવડી શકે તેવા ટિકિટના દર રાખવામાં નિષ્ફળ ગયું છે.

હાલમાં જ પેસેન્જર કારના વેચાણમાં પણ પાંચ વર્ષનો સૌથી નીચો ગ્રોથ જોવાયો હતો. ક્રૂડના ભાવ ઘટ્યા હોવા છતાં આ બન્ને ઉદ્યોગને તેનો કોઈ ફાયદો થયો નથી એ તેમની કામગીરી સૂચવે છે. ભારતમાં સામાન્ય રીતે નવેમ્બર મહિનો તહેવારનો અને વેકેશનનો હોય છે અને એ સમયે પેસેન્જરનો ટ્રાફિક ઊંચો હોય છે. પરંતુ ઉદ્યોગનો સરેરાશ ગ્રોથ ગયા વર્ષના સમાન ગાળાની સરખામણીએ લગભગ છ ટકા નીચો રહ્યો હતો. ઇન્ડિગો સિવાયની અન્ય બધી ફ્રન્ટલાઇન એરલાઇન્સનો પેસેન્જર ટ્રાફિક ચાર્ટ ઘટાડા તરફી નોંધાયો હતો.

એવિએશન ઉદ્યોગની નવેમ્બરમાં કામગીરી નબળી રહેતાં તેની અસર ડિસેમ્બરને અંતે પૂરા થયેલા ત્રિમાસિક ગાળાની કામગીરી પર જોવાશે એમ જણાવીને CMS રિસર્ચના અનંત જયદેવે ઉમેર્યું હતું કે, ચાલુ વર્ષના બીજા ત્રિમાસિક ગાળામાં એવિએશન ઉદ્યોગે જંગી ખોટ નોંધાવી હતી. આમાં રાહત મળે તેમ જણાતું નથી. આ ગાળામાં ક્રૂડના ભાવ નીચે આવ્યા છે પણ પેસેન્જર ટ્રાફિક સહિત રેવન્યુ પેસેન્જર કિલોમીટરની આવક નીચે જોવાઈ છે, જેને કારણે ઓવરઓલ ઉદ્યોગની સ્થિતિ ખરાબ હોવાના નિર્દેશ મળે છે.

ત્રણ લિસ્ટેડ કંપનીઓમાં જેટ એરવેઝ અને સ્પાઇસજેટ કરતાં ઇન્ડિગોની કામગીરી કંઈક અંશે સારી જોવાઈ હોવા છતાં કંપનીઓની જંગી ખોટને જોતાં રોકાણકારોએ મોટી આશા રાખવા જેવી નથી. જેટ એરવેઝમાં નવું ફન્ડિંગ ક્યારે અને કેટલું મળે છે તે જ માત્ર મહત્ત્વના ન્યૂઝ રહેશે જે ટૂંકા ગાળાની ભાવની ચાલ પર અસર કરી શકે છે એમ વધુમાં તેમનું માનવું હતું.

જેએસકે સિક્યોરિટીઝના એનાલિસ્ટ રિશી મલ્હોત્રાનું કહેવું હતું કે, જાન્યુઆરીથી એવિએશન ઉદ્યોગ માટે ઠંડી સીઝન શરૂ થશે. સામાન્ય રીતે વર્ષનો ચોથો ત્રિમાસિક ગાળો આ ઉદ્યોગ માટે નબળો હોય છે. જે કંપનીઓ ઓવરસિઝ કામકાજ ધરાવે છે તેઓને બિનરહીશ ભારતીયોનો તથા દેશના કેટલાક વિસ્તારોમાં યોજાતા સમિટનો લાભ મળે છે.

દા.ત., ગુજરાતમાં યોજાતા વાઇબ્રન્ટ સમિતને કારણે વેસ્ટર્ન પાર્ટમાં ટ્રાવેલિંગ વધતું હોવાનું જોવા મળે છે. પરંતુ દેશમાં ઠંડીની મોસમને કારણે શેડ્યુલિંગ ખોરવાતા હોવાથી અને વાર્ષિક પરીક્ષાઓનો સમયગાળો નજીક આવતો હોવાથી ટૂરિસ્ટ ટ્રાવેલ્સની સંખ્યા ખાસ્સી નીચી રહેતી હોવાથી એવિએશન કંપનીઓની કામગીરી પર તેની અવળી અસર થતી હોવાનું મલ્હોત્રાનું જણાવવું હતું.

ભારતીય એવિએશન ક્ષેત્રનો નવેમ્બર 2018માં પેસેન્જર ગ્રોથ 11 ટકાનો નોંધાયો હતો જે સાડા ચાર વર્ષની સૌથી નીચી સપાટીએ હતો. એરલાઇન ટર્બાઇન ફ્યુઅલ (ATF)ના દર ઊંચા રહેતાં તેની મોટી અસર કંપનીઓના માર્જિન પર થઈ હતી. આને કારણે વાર્ષિક ધોરણે લોડ ફેક્ટરમાં 506 બેસિસ પોઇન્ટ અને રેવન્યુ પેસેન્જર કિલોમીટર (RPK)માં 322 બેસિસ પોઇન્ટનો ઘટાડો નોંધાયો હતો. હવે કંપનીઓને ક્રૂડના ઘટેલા ભાવનો કેટલો લાભ મળે છે તે જોવાનું રહેશે.

ડિસેમ્બરમાં બ્રેન્ટ ક્રૂડના ભાવ ગબડીને નીચામાં 50 ડોલર સુધી આવ્યા હતા જે પાછા સુધરીને 57 ડોલરે પહોંચ્યા છે. એવિએશન કંપનીઓમાં જેટ એરવેઝ કરતાં ઇન્ડિગોને ક્રૂડના નીચા ભાવનો વધુ લાભ થાય તેવી સંભાવના એનાલિસ્ટો જોઈ રહ્યા છે કેમ કે ઇન્ડિગોની લોડ ફેક્ટરથી લઈને પેસેન્જર ટ્રાફિક ગ્રોથ અને આરપીકે સ્થિતિ વધુ સારી જોવાઈ હતી.

નવેમ્બરમાં ઇન્ડિગોનો પેસેન્જર ગ્રોથ 9.5 ટકાથી વધીને 21.2 ટકા સામે જેટ એરવેઝનો 18થી ઘટીને નેગેટિવ 9.2 ટકા રહ્યો હતો. સ્પાઇસજેટની કામગીરી સાધારણ અંડરપર્ફોર્મર ગણાવાતી હતી. આને કારણે એનાલિસ્ટો એવિએશન સેક્ટરમાં જેટ એરવેઝ કરતાં ઇન્ડિગો અને સ્પાઇસજેટ વધુ પસંદ કરતા હતા.

from Page Array – I Am Gujarat http://bit.ly/2C4VV6L