IPL 2019: સૌથી વધુ સિક્સર ફટકારનાર બેટ્સમેન બન્યો ગેઈલ

IPLમાં ફટકારી 300 સિક્સ

મોહાલીઃ ક્રિસ ગેઈલ ઈન્ડિયન પ્રીમિયર લીગમાં 300 સિક્સર્સ પૂરી કરનાર પહેલો બેટ્સમેન બન્યો છે. શનિવારે કિંગ્સ ઈલેવન પંજાબના દમદાર બેટ્સમેને મુંબઈ ઈન્ડિયન્સ સામે આ સિદ્ધિ મેળવી હતી. પંજાબ ક્રિકેટ એસોસિએશન મોહાલીના મેદાન પર તેણે મિશેલ મેકલેનગનના બોલને મિડ ઓન ઉપરથી બાઉન્ડ્રી લાઈનની બહાર મોકલ્યો હતો. આ મેચ પહેલા તેને આ સિદ્ધિ મેળવવા માટે બે સિક્સની જરુર હતી. તેણે ત્રીજી ઓવરમાં બે સિક્સર ફટકારીને સિક્સરની ત્રેવડી સદી બનાવી હતી.

115મી મેચમાં કરી કમાલ

વેસ્ટ ઈન્ડીઝના આ દમદાર બેટ્સમેન ગેઈલે પોતાની 115મી મેચમાં 300નો આંકડો પસાર કર્યો હતો. આઈપીએલમાં સૌથી વધારે સિક્સર્સ લગાવનાર બેટ્સમેનની વાત કરવામાં આવે તો ગેઈલ પોતાના સાથી ખેલાડીઓથી ક્યાંય આગળ છે. તેના પછી રોયલ ચેલેન્જર્સ બેંગ્લોરમાં તેનો સાથી રહેલો એબી ડી વિલિયર્સ 143 મેચમાં 192 સિક્સર ફટકારી છે.

ટી20માં ગેઈલની 917 સિક્સર

ભારતીય બેટ્સમેનની વાત કરવામાં આવે તો મહેન્દ્ર સિંહ ધોની 177 મેચમાં 187 સિક્સર લગાવી છે તો સુરેશ રૈનાએ 178 મેચમાં 186 અને વિરાટ કોહલીએ 176 મેચમાં 185 સિક્સર ફટકારી છે. ટી20 ક્રિકેટમાં સૌથી વધારે બેટ્સમેનમાં ગેઈલ સૌથી આગળ છે. 374 મેચમાં 917 સિક્સર લગાવી ચૂક્યો છે. કેરોન પોલાર્ડ 586 સિક્સર સાથે બીજા નંબરે છે.

સૌથી વધારે રનનો રેકોર્ડ

ટી20 ક્રિકેટમાં સૌથી વધારે રન બનાવવાનો રેકોર્ડ પણ ગેઈલના નામે જ છે. તેણે આ મેચ પહેલા 12417 રન બનાવ્યાં હતાં. ટી20 ક્રિકેટમાં દસ હજારથી વધારે રન બનાવનાર તે એકમાત્ર બેટ્સમેન છે. એક જ ઈનિંગમાં સૌથી વધારે રન (175) અને ટી20 ક્રિકેટમાં સૌથી વધારે ઝડપી સદી (30 બોલ) પણ ગેઈલના નામે જ છે. આટલું જ નહીં ટી20 ક્રિકેટમાં એક ઈનિંગમાં સૌથી વધારે સિક્સર્સ લગાવવાનો રેકોર્ડ પણ ગેઈલના નામે જ છે. તેણે બાંગ્લાદેશ પ્રીમિયર લીગની એક મેચમાં 18 સિક્સર ફટકારી હતી.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat https://ift.tt/2I7RpsC