આ છે મુંબઈના ઢોંસા કિંગ, 104 ટાઈપના ઢોંસા બનાવી ઊભો કર્યો 70 કરોડનો બિઝનેસ!

સપનાની નગરી મુંબઈમાં તામિલ નાડુનો યુવકઃ

મુંબઈને કંઈ અમસ્તી સપનાની નગરી નથી કહેવાતી. આખા દેશમાંથી અહીં લોકો પોતાના સપના સાકાર કરવા આવે છે. એ વાત અલગ છે કે તેમાંથી ઘણા ઓછા લોકો પોતાના સપના પૂરા કરી શકે છે. આવા આંગળીના વેઢે ગણાય તેવા લોકોમાં પ્રેમ ગણપતિનું નામ ચોક્કસ લેવું પડે. મુંબઈના ઢોંસા કિંગ ગણાતા પ્રેમ ગણપતિની સક્સેસ સ્ટોરી કોઈ ફિલ્મી કહાનીથી કમ નથી. તામિલનાડુના ગરીબ પરિવારમાં ઉછરેલા પ્રેમ ગણપતિ 17 વર્ષની ઉંમરે જ્યારે મુંબઈ રોજગારની તલાશમાં આવ્યા ત્યારે તેમના ખીસ્સા સાવ ખાલી હતા. હોટેલ-રેસ્ટોરાંમાં ડિશ ધોઈને તેમણે શરુઆત કરી પણ કોણે કલ્પના કરી હતી કે એક દિવસ 17 વર્ષનો આ યુવક કરોડોમાં આળોટશે?

હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો

આટલી મુશ્કેલ હતી શરૂઆતઃ

પ્રેમ ગણપતિ માતા-પિતાને જણાવ્યા વિના ખીસ્સામાં ફક્ત 200 રૂપિયા લઈ મુંબઈ આવી ગયા પણ મુશ્કેલી તેમની રાહ જોઈને જ બેઠી હતી. કોઈએ ઓળખાણ બનાવી તેમના આ રૂપિયા પણ લૂંટી લીધા અને તેમને ઉપર આભ અને નીચે ધરતી જેવી સ્થિતિ ઊભી થઈ ગઈ. આ ઉપરાંત તેમને મુંબઈમાં કોઈની ભાષા પણ સમજાતી નહતી. ખીસ્સામાં પૈસા ન હોવાથી પાછા જવાનો તો સવાલ જ ઊભો નહતો થતો. આથી તેમણે મુંબઈમાં જ રહીને નસીબ અજમાવાનું નક્કી કર્યું.

નાના પાયે કરી ધંધાની શરૂઆતઃ

તેમને માહિમની એક બેકરીમાં મહિને રૂ. 150ના પગાર સાથે ડિશ ધોવાનું કામ મળી ગયું. બે વર્ષ સુધી તેમણે જુદી જુદી રેસ્ટોરાંમાં આવું જ કામ કર્યું. તેમની પાસે 1000 રૂપિયા ભેગા થયા ત્યારે તેમણે જરૂર પૂરતા વાસણો અને બેઝિક સામગ્રી વસાવી પોતાનો ફૂડ બિઝનેસ વાશી ટ્રેન સ્ટેશનની સામે શરૂ કર્યો.આ સાથે જ તેમણે તેમના બે ભાઈ મુરુગન અને પરમાશિવનને મદદ માટે મુંબઈ બોલાવી લીધા. તેમણે સફાઈ અે ક્વોલિટી પર ખાસ ધ્યાન આપ્યું. આ સાથે તેમનો પહેરવેશ સ્વચ્છ હતો અને બધા જ ટોપી પહેરતા. મુંબઈમાં રોડ સાઈડ પર આટલો સ્વચ્છ ફૂડ સ્ટોલ કોઈએ પહેલા ક્યારેય નહતો જોયો. બસ, તેમની દુકાન ચાલી પડી.

આ રીતે ખરીદી દુકાનઃ

વર્ષો વીતતા ગણપતિએ ઢોંસાની વિવિધ વેરાયટી ઈન્ટ્રોડ્યુસ કરવા માંડી જેને કારણે ગ્રાહકો તેમન દુકાનમાં ખેંચાઈ આવતા. ધીરે ધીરે તે મહિને 20,000 રૂપિયાનો નફો કરતા થઈ ગયા. તેમણે વાશીમાં નાની જગ્યા અને રસોડુ પણ ઊભુ કરી લીધું જ્યાં તે બધા જ ઈન્ગ્રેડિયન્ટ્સ તૈયાર કરી શકતા હતા. જો કે આ સફર પણ આસાન નહતી. લારીને લાયસન્સ ન મળતા અનેક વાર મ્યુનિસિપાલિટીએ તેમની લારી સી કરી દીધી હતી અને દરેક વાર છૂટવા માટે તેમણે દંડ ભરવો પડતો હતો. છેવટે 1997માં આ ભાગદોડથી કંટાળી તેમણે 50,000ની ડિપોઝિટ ચૂકવી પ્રેમ સાગર ઢોસા પ્લાઝા નામની નાની દુકાન શરૂ કરી. કોલેજિયન્સમાં આ દુકાન ફેમસ બની ગઈ.

ઢોંસાની અગણિત વેરાયટીઃ

ઢોંસા ખાવા આવતા યુવાનો ગણપતિના ફ્રેન્ડ્સ બની ગયા અને તેમણે ઈન્ટરનેટના માધ્યમથી તેમને જાતજાતની નવી રેસિપી શીખવાડી. તેમાંથી પ્રેરણા લઈ પ્રેમ ગણપતિએ ઢોંસા સાથે અખતરા શરૂ કર્યા અને સેઝવાન ઢોંસા, પનીર ચિલ્લી, સ્પ્રિંગ રોલ ઢોંસા જેવી 26 જેટલી નવી નવી ફ્લેવર ઑફર કરી. 2002 સુધીમાં તેમણે ઢોંસાની 105 જેટલી વેરાયટી તૈયાર કરી અને તેમની દુકાન ખૂબ જ પોપ્યુલર બની ગઈ. નસીબે સાથ આપતા મેક ડોનાલ્ડ્સ અને પિઝા હટ જેવી બ્રાન્ડેડ ઈટરીની બાજુમાં તેમને શોપ ખોલવાનો મોકો મળ્યો.

વિદેશોમાં પણ ઢોંસા પ્લાઝાનો ડંકોઃ

એક વખત મોલમાં પોપ્યુલારિટી મળ્યા બાદ ફ્રેન્ચાઈઝી માટે ઈન્ક્વાયરી આવવા માંડી. આ તમામ ફ્રેન્ચાઈઝીમાં ઢોંસાનું ખીરુ અને બાકીની સામગ્રી ગણપતિ જ પૂરી પાડે છે. પહેલી ફ્રેન્ચાઈઝી થાણેના વંડર મૉલમાં 2003માં ખૂલી હતી. આજે તેમના આઉટલેટ ન્યુ ઝીલેન્ડ, ઓસ્ટ્રેલિયા, સિંગાપોર, દુબઈ, અબુધાબી, બહેરિન અને કતારમાં છે. ઈન્ડિયામાં તેમની 10થી 15 રેસ્ટોરાં છે. આ ઉપરાંત હવે તે લંડન અને અમેરિકામાં પણ પોતાની ઈટરી ખોલવા જઈ રહ્યા છે. તેમણે માત્ર 1000 રૂપિયાથી શરૂ કરેલો બિઝનેસ આજે 70 કરોડને આંબી ગયો છે.

from Page Array – I Am Gujarat http://bit.ly/2Uf4cRo