પંજાબના બોલરોનો મેચ વિનિંગ દેખાવ, રાજસ્થાનને 12 રને હરાવ્યું

પંજાબે રાજસ્થાનને બીજીવાર હરાવ્યું

કેપ્ટન અશ્વિન અને આકાશદીપ સિંહની શાનદાર બોલિંગની મદદથી કિંગ્સ ઈલેવન પંજાબે રાજસ્થાન રૉયલ્સને IPL12ની 32મી મેચમાં 12 રનથી પરાજય આપ્યો. પંજાબના 6 વિકેટે 182 રનની સામે રાજસ્થાનની ટીમ 20 ઓવરના અંતે 7 વિકેટે 170 રન જ બનાવી શકી હતી અને 12 રનની મેચ હારી ગઈ હતી. આ રાજસ્થાનનો 8મી મેચમાં છઠ્ઠો પરાજય છે.

નિર્ણાયક ક્ષણે આવી રાજસ્થાને ગુમાવી પકડ

183 રનના ટાર્ગેટનો પીછો કરવા ઉતરેલી રાજસ્થાનની શરૂઆત સારી રહી હતી અને પ્રથમ બે વિકેટોએ 97 રન જોડ્યા હતા પણ ત્યારબાદ રનની ગતિ ધીમી પડી હતી અને અંતિમ ઓવરોમાં ઉપરાછાપરી વિકેટો પડી હતી જેના કારણે સ્થિતિ પંજાબના પક્ષમાં જતી રહી હતી. રાહુલ ત્રિપાઠી(50)એ અર્ધસદી જમાવી હતી પણ ખૂૂબ જ ધીમી બેટિંગ કરી હતી. બીજી તરફ સ્ટુઅર્ટ બિન્નીએ 11 બોલમાં 33 રનની આક્રમક ઈનિંગ રમી હતી પણ તે ટીમને જીત સુધી પહોંચાડી શક્યો નહોતો. પંજાબના બોલરોએ નિયમિત અંતરે વિકેટો લેવાની સાથે રાજસ્થાનના બેટ્સમેનોને બાંધી રાખ્યા હતા. કેપ્ટન અશ્વિન, મોહમ્મદ શમી અને આકાશદીપ સિંહે 2-2 વિકેટો ઝડપી હતી.

રાહુલ (52)નું ફોર્મ યથાવત, પંજાબે બનાવ્યા 182 રન

અગાઉ રાજસ્થાનને ટૉસ જીતી પંજાબને બેટિંગ આપી હતી. ક્રિસ ગેઈલ (30) અને કે એલ રાહુલ(52)એ ટીમને સારી શરૂઆત અપાવી હતી. મયંક અગ્રવાલ (27) અને ડેવિડ મિલર (40)એ પણ ઉપયોગી ઈનિંગ્સ રમી હતી. પણ, અસલ અંતર કેપ્ટન અશ્વિને પેદા કર્યું, જેણે 4 બોલમાં અણનમ 17 રન બનાવ્યા અને ટીમને 180 રનની પાર પહોંચાડ્યું હતું.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2GsfSYH