વિરાટસેના ફોર્મમાં આવી, પંજાબને 17 રનથી આપ્યો પરાજય

RCBનો 17 રનથી વિજય

રોયલ ચેલેન્જર્સ બેંગ્લોર IPL12ની 42મી મેચમાં કિંગ્સ ઈલેવન પંજાબને 17 રનના અંતરથી પરાજય આપ્યો. RCBના 203 રનના ટાર્ગેટના જવાબમાં KXIPની ટીમ 20 ઓવરના અંતે સાત વિકેટ ગુમાવી 185 રન જ બનાવી શકી હતી. આ બેંગ્લોરની ચોથી જીત છે અને હવે તે પૉઈન્ટ્સ ટેબલમાં છેલ્લા સ્થાનેથી ઉપર ઉઠીને સાતમા ક્રમે આવી ગઈ છે.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

છેલ્લી બે ઓવરમાં RCBના બોલરોએ મારી લીધી બાજી

203 રનના ટાર્ગેટનો પીછો કરવા ઉતરેલી પંજાબની ટીમે શરૂઆત તો તોફાની કરી હતી પણ 42 રનના સ્કોરે ક્રિસ ગેઈલ (23) આઉટ થઈ ગયો હતો. બાદમાં કે એલ રાહુલ (42) અને મયંક અગ્રવાલ(35) 59 રનની મજબૂત ભાગીદારી કરી હતી પણ બાદમાં 4 રનના ગાળામાં તે બંને આઉટ થઈ જતા પંજાબ મુશ્કેલીમાં આવી ગયું હતુ. ચોથા ક્રમે આવેલા ડેવિડ મિલર (24) અને નિકોલસ પૂરન (46) વચ્ચે 67 રનની શાનદાર ભાગીદારી થતા લાગ્યું કે પંજાબ આસાની જીતી જશે પણ છેલ્લી બે ઓવરમાં તેમણે મેચ પરથી પકડ ગુમાવી દીધી હતી અને આખરે 17 રનથી મેચ ગુમાવી દીધી. RCB તરફથી ઉમેશ યાદવે સૌથી વધુ ત્રણ જ્યારે નવદીપ સૈનીએ 2 વિકેટો લીધી હતી.

ફરી એકવાર ડિ વિલિયર્સની સ્પેશિયલ ઈનિંગ્સ

અગાઉ ટૉસ હારી પ્રથમ બેટિંગ કરવા ઉતરેલી RCBએ એબી ડિ વિલિયર્સના 82*, માર્કસ સ્ટોયનિસના 46* અને પાર્થિવ પટેલના 43 રનની મદદથી 20 ઓવરમાં 4 વિકેટે 202 રન બનાવ્યા હતા. ડિ વિલિયર્સે 7 છગ્ગા અને 3 ચોગ્ગાની મદદથી 44 બોલમાં અણનમ 82 રનની ઈનિંગ રમી હતી. તેણે સ્ટોયનિસ સાથે ચોથી વિકેટ માટે અણનમ 121 રનની ભાગીદારી નોંધાવી હતી. એક સમયે બેંગ્લોરે 81 રનમાં 4 વિકેટ ગુમાવી દીધી હતી પણ બાદમાં આ બંને 20 ઓવરના અંત સુધી કોઈ વિકેટ પડવા દીધી નહોતી.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2DwmxPq