રાહુલના વિજયી 71*, પંજાબે હૈદરાબાદને 6 વિકેટે હરાવ્યું

પંજાબનો એક બોલ બાકી રહેતા વિજય

IPLની 12મી સીઝનની 22મી મેચમાં કિંગ્સ ઈલેવન પંજાબે ઓપનર કે એલ રાહુલના અણનમ 71 અને મયંક અગ્રવાલના 55 રનની મદદથી સનરાઈઝર્સ હૈદરાબાદને છ વિકેટે પરાજય આપ્યો. હૈદરાબાદના 151 રનના ટાર્ગેટને પંજાબે એક બોલ બાકી રહેતા 6 વિકેટ ગુમાવી મેળવી લીધો. આ પંજાબનો આ સીઝનમાં ચોથો વિજય છે.

રાહુલ-અગ્રવાલની વિજયી ભાગીદારી

અગાઉ 151 રનના ટાર્ગેટનો પીછો કરવા ઉતરેલી પંજાબની ટીમને 18 રનના સ્કોર જ ક્રિસ ગેઈલ (16)ની વિકેટના રૂપમાં મોટો ઝટકો લાગ્યો હતો. જોકે, બાદમાં કે એલ રાહુલ(71) અને મયંક અગ્રવાલ (55) મળી શતકીય ભાગીદારી કરી હતી, પણ ધીમા રનરેટના કારણે મેચ છેલ્લી ઓવર સુધી પહોંચી હતી. અહીં રાહુલ અને સેમ કરને મળી જરૂરી 11 રન બનાવી એક બોલ બાકી રહેતા ટીમને વિજય અપાવ્યો હતો.

વૉર્નરે ફોર્મ જાળવી રાખ્યું, બાકીના ફેલ

અગાઉ કિંગ્સ ઈલેવન પંજાબે ટૉસ જીતી સનરાઈઝર્સ હૈદરાબાદને બેટિંગ માટે આમંત્રણ આપ્યું હતું. ઈન ફોર્મ જ્હૉની બેરસ્ટો (1) નિષ્ફળ રહ્યો હતો પણ ડેવિડ વૉર્નરે પોતાનું ફોર્મ જાળવી રાખ્યું હતું. જોકે, તે પ્રમાણમાં ધીમું રમ્યો હતો અને છેક સુધી નોટઆઉટ રહ્યો હતો. તેણે 62 બોલમાં છ ચોગ્ગા અને 1 છગ્ગાની મદદથી અણનમ 70 રન બનાવ્યા હતા. જોકે, બીજા છેડાથી તેને કોઈનો સાથ મળ્યો નહોતો જેના કારણે SRH 20 ઓવરમાં 4 વિકેટે 150 રન જ બનાવી શક્યું હતું.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2UFwpAp