વૉટસનના ઝંઝાવાતી 96, હૈદરાબાદને હરાવી ચેન્નઈ પ્લેઑફમાં પહોંચ્યું

ફોર્મમાં આવ્યો વૉટસન, SRHને તારા દેખાડી દીધા

ઓપનર શેન વૉટસનના 53 બોલમાં 9 ચોગ્ગા અને 6 છગ્ગા સાથેના ઝંઝાવાતી 96 રનની મદદથી ચેન્નઈ સુપરકિંગ્સે સનરાઈઝર્સ હૈદરાબાદને 6 વિકેટે હરાવી પોઈન્ટ્સ ટેબલમાં ટોચનું સ્થાન મેળવવાની સાથે પ્લેઑફમાં પોતાની જગ્યા પાક્કી કરી લીધી છે. CSK IPL12ની પ્લેઑફમાં ક્વૉલિફાઈ કરનારી પ્રથમ ટીમ બની છે. SRHના 176 રનના ટાર્ગેટને ચેન્નઈ એક બોલ બાકી રહેતા પાર કરી લીધો હતો.

હવે એક મેસેજ મોકલી Whatsapp પર મેળવો ન્યૂઝ, શરુ કરવા માટે અહીં ક્લિક કરો

ચાર રન માટે સેન્ચુરી ચૂકી ગયો

176 રનના ટાર્ગેટનો પીછો કરવા ઉતરેલી CSKની શરૂઆત સારી રહી નહોતી અને 3 રનના સ્કોરે જ ઓપનર ફાફ ડુ પ્લેસિસ (1)ની વિકેટ ગુમાવી દીધી હતી. બાદમાં સુરેશ રૈના(38) અને શેન વોટસન(96)એ મળીને બીજી વિકેટ માટે 77 રનની ભાગીદારી નોંધાવી હતી. રૈનાના આઉટ થયા બાદ વોટસને ફટકાબાજી ચાલુ રાખી હતી અને અંબાતી રાયુડૂ (21) સાથે ત્રીજી વિકેટ માટે 80 રનની ભાગીદારી નોંધાવી હતી. તે 96 રનના અંગત સ્કોરે આઉટ થયો ત્યારે મેચ લગભગ ચેન્નઈ તરફ આવી ગઈ હતી પણ છેલ્લી ઓવરમાં રોમાંચકતા વધી ગઈ હતી પણ આખરે ચેન્નઈએ એક બોલ બાકી રહેતા જીત મેળવી લીધી હતી.

પાંડેના 83*, SRHએ બનાવ્યા 175

અગાઉ યજમાન ચેન્નઈ સુપર કિંગ્સે ટૉસ જીતી હૈદરાબાદને બેટિંગ આપી હતી. છેલ્લી કેટલીક મેચોથી શાનદાર ફોર્મમાં રહેલો જ્હોની બેરસ્ટો ખાતુ ખોલાવ્યા વિના જ આઉટ થયો હતો. જોકે, ડેવિડ વૉર્નરે શાનદાર ફોર્મ જાળવી રાખ્યું હતું અને 45 બોલમાં 57 રનની ઈનિંગ રમી હતી. ત્રીજા ક્રમે આવેલા મનીષ પાંડેએ પણ જબરદસ્ત બેટિંગ કરતા 49 બોલમાં 7 ચોગ્ગા અને 3 છગ્ગાની મદદથી અણનમ 83 રનની ઈનિંગ્સ રમી હતી. આ બંનેએ સાથે મળીને બીજી વિકેટે માટે 115 રનની ભાગીદારી નોંધાવી હતી. બાદમાં પાંડેએ વિજય શંકર (26) સાથે ત્રીજી વિકેટ માટે 47 રનની ભાગીદારી કરી હતી. પાંડેની આ ઈનિંગના પ્રતાપે સનરાઈઝર્સે 20 ઓવરમાં ત્રણ વિકેટે 175 રન બનાવ્યા હતા.

from Cricket News in Gujarati, ક્રિકેટ સમાચાર, Cricket Updates – Page Array – I Am Gujarat http://bit.ly/2Zxgh3E