મૂવી રિવ્યુઃ કલંક

સ્ટોરીઃ

ભારત-પાકિસ્તાનના ભાગલા સમયે આકાર લેતી પ્રેમ કથા છે કલંક. રૂપ (આલિયા ભટ્ટ) તેના પતિ દેવ (આદિત્ય રોય કપૂર) પ્રત્યેના માન અને તેના પ્રેમી ઝફર (વરૂણ ધવન) વચ્ચે પીસાય છે. તેમના જીવનમાં આ વાવાઝોડુ ઓછું હોય તેમ ભારત-પાકિસ્તાનનો ઈતિહાસ એક નવો મોડ લે છે અને ત્યાંથી પાછા ફરવું કોઈના માટે શક્ય નથી.

હવે એક મેસેજ મોકલી WhatsApp પર મેળવો અમારા ન્યુઝ, Start કરવા અહીં ક્લિક કરો

રિવ્યુઃ

ફિલ્મના ટાઈટલને અનુરૂપ આ ફિલ્મ સમાજની નીતિ, ધારાધોરણો, ખાસ કરીને પ્રેમ અને પરિવારની બાબતે સમાજના વલણ સામે પ્રશ્નો ઊઠાવે છે. ફિલ્મ દર્શાવે છે કે સાચો પ્રેમ સમાજ અને ધર્મના દાયરાથી પર છે. તે માણસે બનાવેલી કોઈ સીમામાં બાંધી શકાતો નથી. ફિલ્મની એક ડ્રામેટિક ક્ષણમાં આદિત્ય રોય કપૂરનું પાત્ર કહે છે કે કોઈની પત્ની કોઈ બીજા પુરુષ સાથે પ્રેમમાં હોય તો લગ્નનો કોઈ અર્થ ખરો? આ દૃષ્ટિએ ડિરેક્ટર અભિષેક વર્મનની ફિલ્મ આ મુદ્દાને ખરા અર્થમાં ન્યાય આપે છે.

ભાગલા પહેલાના સમયમાં લઈ જશે ફિલ્મઃ

ફિલ્મની વાર્તા લાહોર નજીકના હુસ્નાબાદમાં આકાર લે છે. વાત ભારત અને પાકિસ્તાનના ભાગલા પહેલાની છે. આ શહેરમાં લુહારોની સારી એવી વસ્તી છે અને મોટાભાગના મુસ્લિમ છે. ચૌધરી પરિવાર હુસ્નાબાદનો સૌથી અમીર પરિવાર છે. દેવ અને તેના પિતા બલરાજ (સંજય દત્ત) ચૌધરી ડેઈલી ન્યુઝ નામનું ન્યુઝપેપર પણ ચલાવે છે. દેવના જીવનમાં મોટો વળાંક ત્યારે આવે છે જ્યારે વિશિષ્ટ સંજોગોમાં તેણે રૂપ સાથે લગ્ન કરવા પડે છે. પરંતુ આ તો વાર્તાની માત્ર શરૂઆત જ છે.

ફ્રેશ છે ટ્રીટમેન્ટઃ

બહાર બેગમના કોઠાની મુલાકાત દરમિયાન રૂપની મુલાકાત ઝફર સાથે થાય છે. ઝફર લુહાર છે અને બંને એકબીજા સાથે લાગણીના બંધને બંધાઈ જાય છે. ટ્રેલર જોતા તો લાગે છે કે સ્ટોરીમાં કંઈક નવું હશે પરંતુ સંબંધોની ગૂંચવણો પર આધારિત ફિલ્મો ઘણીવાર પ્રેડિક્ટેબલ બની જતી હોય છે. કલંક અંગે વિશેષ વાત એ છે કે તેની ટ્રીટમેન્ટ ઘણી જ ફ્રેશ અને અલગ છે. આ પિરિયડ ડ્રામા ઘણા મોટા સ્કેલ પર બનાવાયો છે. એટલે તમને સેટ્સથી માંડી કોશ્ચ્યુમ્સ વગેરે મોટા પરદે જોવાની મજા આવશે.

સારા અને નબળા પાસા

પ્રેમ અમર હોય છેના નારાને આગળ ધપાવતી આ ફિલ્મનો સ્ક્રીનપ્લે થિયેટ્રિકલ ડ્રામા અને ઈમોશન્સ વચ્ચે ઝોલા ખાય છે. પરંતુ ફિલ્મમાં અમુક એવી ક્ષણો છે જે તમારુ ધ્યાન જરૂર ખેંચશે. જેમ કે, નવપરિણિત દેવ અને રૂપ વચ્ચેના સંબંધો, સત્યા અને દેવ વચ્ચે નજરોમાં થતી વાતો તથા રૂપ અને ઝફર વચ્ચેના રોમેન્ટિક સીન્સ. ફિલ્મના અન્ય મજબૂત પાસા છે દેવ અને બલરાજ વચ્ચે ડામાડોળ થતા પિતા-પુત્રના સંબંધો તથા બહાર બેગમ અને રૂપ વચ્ચે ગુરૂ શિષ્યનો સંબંધ. આવી ક્ષણો ફિલ્મમાં વધારે હોત તો ફિલ્મ જોવાની વધારે મજા આવત.

પરફોર્મન્સઃ

ફિલ્મની સૌથી મોટી હાઈલાઈટ તેની સ્ટાર કાસ્ટ છે. આ ઉપરાંત બધા જ કલાકારોએ પાત્રોને સરસ ન્યાય આપ્યો છે. આલિયા ભટ્ટનું પાત્ર તેની લાચારી અને હિંમત બંનેનું સરસ મિશ્રણ છે. વરૂણ ધવન તેના ટોન્ડ બૉડી સાથે ખૂબ જ સરસ લાગે છે અને તે તેના પાત્રમાં ગજબનું ઊંડાણ લાવી શક્યો છે. આદિત્ય રોય કપૂરના ખાસ વખાણ કરવા પડે. મૌન રહીને પણ માત્ર હાવભાવથી તેનું પાત્ર ઘણું કહી જાય છે. માધુરી દિક્ષિત, સંજય દત્ત અને સોનાક્ષી સિન્હાએ પણ પોતાના પાત્રને પરદા પર જીવંત કર્યા છે. ઝફરના મિત્ર અબ્દુલ તરીકે કુણાલ ખેમુએ પણ ગ્રે શેડ રોલ જબરદસ્ત રીતે નિભાવ્યો છે. સ્ટારકાસ્ટના વિશેષ પ્રયત્નોને કારણે મોટા સ્કેલ પર બનેલી કલંક જોવાલાયક બની છે.

થિયેટરમાં જોવાની મજા આવશેઃ

1940ના દાયકામાં આકાર લેતી લવસ્ટોરીમાં વિઝ્યુઅલ ડિટેઈલિંગ પર ખાસ્સુ ધ્યાન અપાયું છે. કલંક હિન્દી સિનેમાના ઈતિહાસમાં ભવ્યતાને એક અલગ જ સ્કેલ પર લઈ જાય છે. ફિલ્મમાં 1940ની દુનિયાને ફરી જીવંત કરવાનો પ્રયત્ન કરાયો છે પરંતુ તે વાસ્તવિકતાથી થોડી દૂર લાગે છે. ફિલ્મમાં ગ્રાન્ડ વિઝ્યુઅલ છે અને બિનોદ પ્રધાને સરસ સિનેમેટોગ્રાફી કરી છે. પ્રીતમે ફિલ્મમાં કર્ણપ્રિય સંગીત આપ્યું છે. ફિલ્મ 2 કલાક 48 મિનિટની છે. થોડુ એડિટિંગ ટાઈટ હોત તો ફિલ્મ ટૂંકી બની શકી હોત. આ ફિલ્મની અમુક ક્ષણો કાયમ માટે તમારા દિલમાં વસી જશે. ફિલ્મને અમારા તરફથી 3.5 સ્ટાર્સ.

from Entertainment News in Gujarati: Latest Entertainment News, Read Breaking Entertainment News – Page Array – I Am Gujarat http://bit.ly/2IHAMUW