વનેશ પંચાલ, ડિરેક્ટર, બિલાઇન બ્રોકિંગ
ભારતીય માર્કેટ છેલ્લાં કેટલાંક સપ્તાહોથી વૈશ્વિક બજારોને આઉટપર્ફોર્મ કરી રહ્યું છે. નવા નાણાકીય વર્ષની શરૂઆતમાં પણ આ ક્રમ જળવાયો હતો. બેન્ચમાર્ક ઇન્ડેક્સ સેન્સેક્સ તેના ઇતિહાસમાં પ્રથમવાર 39,000ની સપાટી પર જોવા મળ્યો હતો. નવા સપ્તાહે એશિયન બજારો મજબૂત હતાં અને તેથી નિફ્ટી ઇન્ટ્રા-ડે 11,700ને પાર કરી ગયો હતો. જોકે દિવસના આખરી હિસ્સામાં પ્રોફિટ બૂકિંગ જોવા મળ્યું હતું અને લગભગ અડધો સુધારો ધોવાઈ ગયો હતો.
મારા મતે બજાર ઓવરબોટ છે. માર્ચ સિરીઝની શરૂમાં 10,600ના સ્તરેથી શરૂ થયેલી તેજીમાં બેન્ચમાર્ક 8 ટકા વધ્યો છે, જે ટૂંકા ગાળામાં નોંધપાત્ર વળતર સૂચવે છે. ચૂંટણીમાં એનડીએની સરકાર જળવાઈ રહેવાનો મુદ્દો વર્તમાન ભાવ સપાટીએ ડિસ્કાઉન્ટ થઈ ચૂક્યો છે. ચૂંટણી શરૂ થવા અગાઉના સરવે હજુ રજૂ થયા નથી. આગામી દિવસોમાં વિવિધ માધ્યમોના સરવે આવશે અને બજાર પર તેની સારી-નરસી અસર જોવા મળી શકે છે. જોકે હાલમાં બજારનું સેન્ટિમેન્ટ પોઝિટિવ છે અને તેથી ઘટાડે ખરીદીનો વ્યૂહ જ યોગ્ય રહેશે.
બજારમાં લાર્જ-કેપ શેરોમાં નોંધપાત્ર સુધારો આવી ચૂક્યો છે અને મને જણાય છે કે આગામી એક-દોઢ મહિના દરમિયાન મિડ-કેપ્સ અને સ્મોલ-કેપ્સ લાર્જ-કેપ્સને આઉટપર્ફોર્મ કરી શકે છે. સોમવારે આ પ્રકારના સંકેતો પણ હતા, કારણ કે બજારમાં માર્કેટ-બ્રેડ્થ ખૂબ સારી હતી. બીએસઇ ખાતે 1,600થી વધુ શેર પોઝિટિવ બંધ આવ્યા હતા જે એવો સંકેત આપે છે કે કોર્પોરેટ અર્નિંગ્સ સીઝન અગાઉ મિડ-કેપ્સમાં લેવાલી જોવા મળી રહી છે અને તે ટૂંકા ગાળામાં ટકી રહેશે. આ સમયગાળામાં નિફ્ટી ટૂંકા ગાળા માટે કોન્સોલિડેશનમાં જઈ શકે છે.
નિફ્ટીને અગાઉની તેની સર્વોચ્ચ ટોચ એક અવરોધ તરીકે નડી શકે છે. નિફ્ટીને નજીકના ગાળામાં 11,580-11,600નો સપોર્ટ મળે તેવી શક્યતા છે. તેની નીચે 11,400નો સપોર્ટ રહેશે. મારા મતે હાલમાં આ સ્તરની નીચે નિફ્ટી નહીં જાય અને તેથી જ્યારે પણ બજારમાં પ્રોફિટ બૂકિંગ જોવા મળે ત્યારે ઘટાડે ખરીદી કરવામાં લાભ રહેશે.
સોમવારે બેંકિંગ ક્ષેત્રે અન્ડરપર્ફોર્મન્સ દર્શાવ્યું હતું. જોકે મારા મતે ખાનગી બેંકિંગ શેર્સ તેમનો સારો દેખાવ જાળવી રાખશે, કારણ કે આ શેરો નવી ટોચ પર ટ્રેડ થઈ રહ્યા છે. પીએસયુ બેંક્સમાં પણ વધુ ખરીદી જોવા મળી શકે છે. ખાસ કરીને નાની પીએસયુ બેંક્સના શેર્સમાં સોમવારે તીવ્ર ખરીદી જોવા મળી હતી.
એપ્રિલ મહિનાથી ત્રણ પીએસયુ બેંક્સ બેંક ઓફ બરોડા, દેના બેંક અને વિજયા બેંકનું મર્જર અમલી બન્યું હતું. પીએસયુ બેંક્સની કોન્સોલિડેશનની પ્રક્રિયાની આ પ્રથમ ઘટના હતી અને તે સફળ રીતે તે પાર પડી છે. જેને બજાર પોઝિટિવ રીતે ગણનામાં લેશે. ઓટોમોબાઇલ ક્ષેત્રના શેર્સમાં બાઉન્સ ટકતા નથી. તેઓ કોન્સોલિડેટ થશે અને બને કે નવી નીચી સપાટી પણ દર્શાવે.
<b>ડિસ્ક્લેમર :</b>વિવિધ બ્રોકરેજ , વિશ્લેષકો અને ફંડ મેનેજરો દ્વારા આ પાના પર દર્શાવાયેલા વિચારો તેમના પોતાના છે. વાચકોએ આ ભલામણોનો અમલ કરતાં પહેલાં વ્યાવસાયિક સલાહકારોની સલાહ જરૂરી છે. ઈટી અહીં દર્શાવેલી પસંદગી માટે જવાબદાર નથી. www.economictimes.com પર ઈટીના સિદ્ધાંતોની આચારસંહિતા ચકાસવા વિનંતી છે.
from Page Array – I Am Gujarat https://ift.tt/2Ie9BRo
No comments:
Post a Comment